Tuladenyo ti Pammatida
1 Dinepinar ni apostol Pablo ti pammati a kas “ti sigurado a panangsegga kadagiti bambanag a namnamaen, ti nabatad a parangarang dagiti kinapudno nupay saan a nakita.” Innayonna a ‘no awan ti pammati, [ti Dios] di mabalin nga ay-aywen unay.’ (Heb. 11:1, 6) Ginutugotnatayo ni Pablo a mangalagad iti pammati, aglapusanan iti dayta, mangsurot iti dayta.—2 Cor. 4:13; Col. 2:7; 2 Tim. 2:22.
2 Adu dagiti nagpaiduma nga ulidan iti pammati a nadakamat iti Biblia. Idiay Hebreo 11, nangted ni Pablo iti atiddog a listaan dagiti saksi a nangipakita iti di madadael a pammati. Nairaman ni Abel iti daytoy a listaan, a kaunaan a martir gapu iti pammatina. Nailista ni Noe agsipud ta babaen iti pammatina impakitana ti nadiosan a buteng a nangsalbar iti sangakabbalayanna. Nakomendaran ni Abraham gapu iti pammati ken kinatulnogna. Napadayawan ni Moises agsipud ta gapu iti pammatina nagtalinaed a natibker a kasla kitkitaenna Daydiay saan a makita. Anian a yamantayo ta mabalintay a pabilgen ti pammatitayo babaen ti panangrepaso kadagiti “nasantuan a panagbibiag ken ar-aramid[da] ti nadiosan a debosion”!—2 Ped. 3:11.
3 Idi umuna a siglo, indatag ni Jesus ti saludsod nga: “Inton dumteng ti Anak ti tao, pudno aya a masarakannanto ti pammati ditoy daga?” (Luc. 18:8) Ay ket, no kasta, adda kadi dagiti sibibiag nga ulidan ti pammati iti nagbabaetantayo ita? Makakitatayo aya kadagiti lallaki ken babbai a mangiparparangarang iti di maisin a pammati ken Jehova a kas kadagiti tattao ti Dios idi tiempo ti Biblia?
4 Moderno-Aldaw nga Ulidan ti Pammati: Napalawlawantayo kadagiti nagpaiduma nga ulidan ti pammati! Maikari a tuladen ti pammati dagiti manangaywan a mangidadaulo kadatayo. (Heb. 13:7) Ngem saan laeng a dagitoy ti mapagulidanan iti pammati. Naitimpuyog iti kada kongregasion dagiti nasungdo a nabayagen nga agserserbi a simamatalek ken Jehova, a masansan a napasamak iti sidong dagiti narigat unay a kasasaad.
5 Masapul a padayawantayo dagiti matalek a kakabsattayo a babbai, nga agib-ibturen iti adu a tawtawen, iti ibubusor dagiti bumusbusor nga assawa a lallaki. Masapul a sanguen dagiti agsolsolo a nagannak ti karit ti panangpadakkel iti annak. Adda dagiti nataengan a balo iti tengngatayo a pulos a di lumanglangan kadagiti aktibidad ti kongregasion uray no awan miembro ti pamiliada a tumulong kadakuada. (Idiligyo iti Lucas 2:37.) Masdaawtayo iti pammati dagidiay mangib-ibtur iti di umim-imbag a problema iti salun-at. Adu dagiti agtultuloy a sisusungdo nga agserserbi uray no addaanda kadagiti limitasion a manglapped kadakuada a maikkan iti kanayonan a pribilehio iti serbisio. Addada agtutubo a Saksi a situtured a nangalagad iti pammati iti laksid ti ibubusor idiay eskuelaan. Bumileg ti nadiosan a debosiontayo bayat nga imutektekantayo dagiti matalek a payunir nga agan-anus iti tinawtawen iti sango dagiti di mabilang a problema.
6 Dagitoy nga ulidan dagiti matalek ti mangted kadatayo iti liwliwa ken pammaregta. (1 Tes. 3:7, 8) Nagsayaat no tuladentayo ti pammatida agsipud ta “dagidiay agtigtignay a simamatalek makaay-ayoda ken [Jehova].”—Prov. 12:22.