No Kasano ti Panagaramid Kadagiti Adalan Babaen ti Libro a Pannakaammo
1 Ti tartarigagayan a kalat ti amin a Kristiano isu ti panangisuro iti kinapudno kadagiti sabsabali ken panagaramid adalan kadagidiay “siuumiso a maikari iti biag nga agnanayon.” (Ara. 13:48; Mat. 28:19, 20) Inikkannatay ti organisasion ni Jehova iti maysa a nakaskasdaaw a kagawaan tapno maibanag daytoy—ti libro a Pannakaammo a Mangiturong iti Biag nga Agnanayon. Itampok ti paulona ti pateg ti panangyadal iti Biblia kadagiti pagtaengan, gapu ta agpannuray ti biag nga agnanayon iti panangammo ken Jehova ken ti Anakna, ni Jesu-Kristo.—Juan 17:3.
2 Ti libro a Pannakaammo isut’ kangrunaan a publikasion ita ti Sosiedad a mausar a pangikondukta kadagiti panagadal ti Biblia iti pagtaengan. Babaen ti panangusartayo iti dayta, maisurotay a nalaka, nalawag, ken nabibiit ti kinapudno. Tumulong daytoy a mangdanon ti puso dagidiay maisursuro. (Luc. 24:32) Siempre, kasapulan dagiti mangidadaulo ti panagadal ti agaramat kadagiti nasayaat a wagas ti panangisuro. Naisagana daytoy nga insert agpaay iti daytoy a panggep. Mangted kadagiti singasing, ken ibalabalana dagiti metodo ti panangisuro a napaneknekan nga epektibo iti panaglabas dagiti tawen. Buyogen ti pannakaawat, ken sigun iti kasasaad ti indibidual, mabalin nga agin-inut nga iyaplikaryo ti sumagmamano wenno amin a maidatag ditoy. Idulinyo daytoy nga insert, ket kanayon nga agkonsultakayo iti dayta. Matulongannakayo nga ad-adda nga epektibo nga agaramid iti ad-adalan, nga usaren ti libro a Pannakaammo.
3 Mangikondukta iti Narang-ay a Panagadal ti Biblia: Maaddaan iti napudno a personal nga interes iti estudiante kas manamnama a Kristiano nga adalan ken naespirituan a kabsat. Nabarakayo koma, mannakigayyem, ken narayray. No nalaingkay a dumngeg, maam-ammoyo ti kinasiasino ti sabali—ti nalikudan ken kasasaadna iti biag—a tumulong kadakayo a mangtarus no kasanot’ kasayaatan a panangtulong kenkuana iti naespirituan. Situtulokkayo koma a mangipaay iti bagiyo maipaay a pagimbagan ti estudiante.—1 Tes. 2:8.
4 Apaman a maipasdek ti panagadal, kaykayattayo nga adalen dagiti kapitulo ti libro a Pannakaammo sigun iti panagsasarunoda. Daytoy palubosanna ti estudiante a gumun-od iti agin-inut a pannakaawat iti kinapudno, tangay ti libro putarenna dagiti suheto ti Biblia iti kasayaatan a lohikal a panagsasaruno. Pagtalinaedenyo a simple ken makapainteres ti panagadal tapno nabiag ken agtultuloy. (Roma 12:11) Agpannuray iti kasasaad ken kaalisto ti estudiante, nalabit a masaklawyo dagiti kaaduan a kapitulo iti maysa a sesion iti maysa nga oras wenno nasursurok, a di agap-apura iti panagadal. Nasaysayaat ti panagrang-ay dagiti estudiante no agpadpada nga itungpal ti mangyad-adal ken ti estudiante ti tulaganda nga agadal iti kada lawas. Iti kasta, kadagiti kaaduan a tattao, mabalin a maileppas dagiti 19 a kapitulo ti libro iti agarup innem a bulan wenno nasursurok.
5 Irugi ti kada sesion iti ababa a komento a mangbiag iti interes iti material. Mapaliiwyo a ti paulo ti kada kapitulo isu ti temana, a masapul a maipaganetget. Kada subtema ilasinna ti kangrunaan a punto, a tumulong kadakayo a mangipamaysa iti panunot ti tema ti kapitulo. Annadanyo a dikay koma agsao iti adu unay. No di ket, padasenyo a paruaren dagiti kapanunotan ti estudiante. Ti panagusar kadagiti makaiturong a saludsod iti estudiante, a naibasar kadagiti ammonan, isut’ tumulong kenkuana nga agrason ken dumteng iti umiso a konklusion. (Mat. 17:24-26; Luc. 10:25-37; kitaenyo ti Giya ti Eskuelaan, panid 51, parapo 10.) Surotenyo a sisisinged ti naimaldit nga impormasion iti libro a Pannakaammo. Ti panangiserrek iti kanayonan a detalye mabalin a singaenna wenno libegenna dagiti kangrunaan a punto ket paundayenna ti panagadal. (Juan 16:12) No tumaud ti saludsod a saan a mainaig iti tema a maad-adal, kaaduanna mabalinyo a sungbatan iti ngudo ti sesion. Palubosannakay daytoy a mangwanas iti leksion iti dayta a lawas a di masingsinga. Ilawlawag iti estudiante nga inton agtanoy kaaduan kadagiti saludsodna masungbatanto bayat ti panagadal.—Kitaenyo ti Giya ti Eskuelaan, panid 94, parapo 14.
6 No natibker ti pammati ti estudiante iti Trinidad, imortalidad ti kararua, impierno, wenno iti dadduma nga ulbod a doktrina, ket saan a mapnek iti naidatag iti libro a Pannakaammo, mabalin nga itedyo kenkuana ti libro a Panakirinnason wenno sabali a publikasion a mangilawlawag iti suheto. Ibagayo kenkuana a pagsaritaanyonto dayta kalpasan a mausigna ti nabasana.
7 Ti panagkararag iti rugi ken ngudo ti panagadal a maipaay iti panangidalan ken bendision ni Jehova padaegenna ti okasion, a pagbalinenna a naraem ti panagpampanunot ti maysa, ken iturongna ti atension ken Jehova kas ti pudno a Mannursuro. (Juan 6:45) No agtabtabako pay laeng ti estudiante, inton agtanoy mabalin a kiddawen kenkuana a liklikanna dayta bayat iti panagadal.—Ara. 24:16; Sant. 4:3.
8 Mangisuro a Sieepektibo Babaen ti Kasuratan, Ilustrasion, ken Pangrepaso a Salsaludsod: Uray mano a daras a naadalna idin ti material, repasuen ti nasigo a mannursuro ti tunggal leksion a pampanunotenna ti mismo nga estudiante. Tumulong daytoy tapno maisaganaanna ti dadduma a saludsod ti estudiante. Tapno makaisuro a sieepektibo, maaddaankay iti nalawag a pannakaawat kadagiti kangrunaan a punto iti kapitulo. Luktan dagiti kasuratan tapno kitaen no kasano nga agaplikarda iti material, ken ikeddeng no ania kadagitoy ti mabasa bayat iti panagadal. Panunotenyo no kasano a mangisurokayo babaen ti panangusar kadagiti ilustrasion ken ti pangrepaso a saludsod iti ngudo ti kapitulo.
9 Babaen ti epektibo a panangusar kadagiti kasuratan, matulonganyo ti estudiante a mangipateg a ti Biblia isut’ pudno nga ad-adalenna. (Ara. 17:11) No usarenyo ti kahon a “Kabesaduenyo ti Bibliayo,” iti panid 14 ti libro a Pannakaammo, isuroyo kenkuana no kasano ti panangsapulna kadagiti kasuratan. Ipakita kenkuana no kasano nga ilasinna dagiti naadaw a bersikulo iti leksion. No ipalubos ti tiempo, kitaen ken basaen dagiti naisitar a kasuratan a saan a naadaw. Pagkomentuen ti estudiante no kasano a suportaran wenno lawlawaganda ti naibaga iti parapo. Igunamgunam dagiti panulbek a paset dagiti teksto tapno maipategna dagiti rason a maipaay kadagiti kangrunaan a punto iti leksion. (Neh. 8:8) Kaaduanna, saan a kasapulan a nayonan ti mangyad-adal iti teksto dagidiay addan iti libro. Komentuan ti pateg ti panangammo kadagiti nagan ken panagsasaruno dagiti libro ti Biblia. Mabalin a makatulong iti estudiante no basaenna ti pinanid 27-30 ti Hunio 15, 1991, a Pagwanawanan. No mayanatup, iparegta ti panangusar iti New World Translation. Mabalin nga in-inut nga idemostrayo no kasano nga usaren dagiti nagduduma a bennegna, kas iti marhinal a reperensia ken ti indese dagiti sasao ti Biblia.
10 Ilawlawag ti Adalen 34 iti Giya ti Teokratiko nga Eskuelaan ti Panagministro a riingen dagiti ilustrasion ti panagpampanunot ti tao ken palakaenna ti panangtarus kadagiti baro a kapanunotan. Agpada nga abbukayenna ti bileg ti panagpanunot ken rikna, iti kasta mayukuok ti mensahe a sibibileg a saan a masansan a kasta babaen iti gagangay a sasao. (Mat. 13:34) Naglaon ti libro a Pannakaammo kadagiti nawadwad a simple ngem nabileg nga ilustrasion. Kas ehemplo, ti ilustrasion a nausar iti kapitulo 17 pabilgenna ti apresasion no kasano nga iti naespirituan a pamay-an ipaay ni Jehova ti taraon, kawes, ken paglinongan babaen ti kongregasion Kristiano. Mabalin nga usaren dagiti napintas a ladawan iti libro a Pannakaammo a sieepektibo a mangtignay iti emosion. Iti babaen ti subtema a “Ti Naragsak a Panagungar,” iti panid 185, ad-adda a napuersa ti parapo 18 no ipakita manen iti estudiante ti ladawan idiay panid 86. Mamagpanunot daytoy kenkuana a pudno ti panagungar iti sidong ti Pagarian ti Dios.
11 Masapul nga agprogreso iti naespirituan dagiti estudiante ti Biblia iti kada leksion. Gapu iti daytoy, dikay liplipatan nga irepaso dagiti saludsod iti kahon a “Subokenyo ti Pannakaammoyo” nga agparang iti ngudo ti kada kapitulo. Saan laeng a ti umiso a sungbat iti naadal ti denggenyo. Adu kadagitoy a saludsod ti nadisenio a mangaon iti personal a naimpusuan a sungbat. Kas ehemplo, kitaenyo ti panid 31, a sadiay masaludsodan ti estudiante: “Aniada a galad ni Jehova a Dios ti nangnangruna a makaallukoy kenka?”—2 Cor. 13:5.
12 Sanayen Dagiti Estudiante nga Agsagana Maipaay iti Panagadal: Ti estudiante nga agbasa a nasakbay iti leksion, a mangmarka kadagiti sungbat, ken mangutob no kasano nga iyebkasna ida iti bukodna a sasao ket nadardaras a rumang-ay iti naespirituan. Babaen ti ulidan ken pammaregtayo, masanayyo nga agsagana a maipaay iti panagadal. Ipakitayo kenkuana ti libroyo, a sadiay pinagminar wenno inugedanyo dagiti panulbek a sasao. Ilawlawagyo no kasano a saraken dagiti direkta a sungbat dagiti naimaldit a saludsod. Mabalin a makatulong iti estudiante ti panagsaganayo a dua iti kapitulo. Paregtaenyo a sumungbat iti bukodna a sasao. Babaen laeng iti dayta a nalawag a makitayo no maaw-awatanna ti material. No basaenna ti sungbatna manipud iti libro, mabalinyo a tignayen ti panunotna babaen ti panangkiddawyo no kasano nga ilawlawagna ti punto iti sabali a tao iti bukodna a sasao.
13 Paregtaenyo a kitaen ti estudiante dagiti saan a naadaw a kasuratan kas paset ti linawas a panagsaganana, ta nalabit awan tiempo a mangbasa amin kadagita bayat ti panagadal. Komendaranyo iti ipapaayna a pinget kadagiti leksionna. (2 Ped. 1:5; kitaenyo iti Agosto 15, 1993, Pagwanawanan, pinanid 13-14, a maipaay kadagiti kanayonan a singasing no kasano nga agpada a parang-ayen ti mangyad-adal ken ti estudiante ti masursuroda iti panagadal ti Biblia.) Iti kastoy a pamay-an, masanay ti estudiante nga agsagana ken agkomento kadagiti gimong ti kongregasion. Maadalna no kasano a patanoren ti naimbag a kababalin iti personal a panagadal a mangkabal kenkuana nga agtultuloy a rumang-ay iti kinapudno kalpasan a makompletona nga adalen ti Biblia babaen ti libro a Pannakaammo.—1 Tim. 4:15; 1 Ped. 2:2.
14 Iturong Dagiti Estudiante iti Organisasion ni Jehova: Rebbengen ti agar-aramid ti adalan nga iturong ti interes ti estudiante iti organisasion ni Jehova. Nadardaras ti naespirituan a panagmataengan ti estudiante no bigbigenna ti organisasion ken mailasinna ti pateg ti panagbalin a paset dayta. Kayattayo a matagiragsakna ti makitimpuyog kadagiti tattao ti Dios ken mangnamnama a makikadua kadatayo idiay Kingdom Hall, a sadiay mabalinna ti umawat iti naespirituan ken emosional a suporta nga ipaay ti kongregasion Kristiano.—1 Tim. 3:15.
15 Napartuat ti broshur a Dagiti Saksi ni Jehova—Agkaykaysa a Mangar-aramid iti Pagayatan ti Dios iti Sangalubongan a mangyam-ammo iti tunggal tao iti kakaisuna a makitkita nga organisasion ni Jehova nga us-usarenna ita a mangibanag iti pagayatanna. Apaman a maipasdek ti panagadal, apay a dikay ikkan ti estudiante iti kopia? Manipud rugina unay, awan sarday nga awisenyo ti estudiante kadagiti gimong. Ilawlawagyo no kasano a maikonduktada. Mabalinyo nga ibaga kenkuana ti tema ti sumaganad a palawag publiko wenno ipakita kenkuana ti artikulo a mapagsasaritaan iti Panagadal ti Pagwanawanan. Nalabit a maipasiaryo iti Kingdom Hall no awan ti gimong tapno maalay-ayan ti aniaman a mangriribuk kenkuana maipapan iti iseserrekna iti baro a lugar a damona a papanan. Nalabit mabalinyo nga ilugan a mapan kadagiti gimong. No tumabuno, ipariknayo kenkuana a maawat ken komportable. (Mat. 7:12) Iyam-ammoyo kadagiti dadduma a Saksi, agraman kadagiti panglakayen. Sapay koma, ta iruginan a matmatan ti kongregasion a kas naespirituan a pamiliana. (Mat. 12:49, 50; Mar. 10:29, 30) Mabalinyo ti mangituyang iti kalatna, kas ti itatabuno iti maysa a gimong iti kada lawas, ket agin-inut a nayonan dayta a kalat.—Heb. 10:24, 25.
16 Bayat nga agtultuloy ti panagadal iti Biblia iti pagtaengan babaen ti libro a Pannakaammo, igunamgunamyo ti paset a mangitampok iti panagkasapulan ti regular a pannakilangen iti kongregasion kadagiti gimong. Siputanyo a nangnangruna ti pinanid 52, 115, 137-9, 159, agraman kapitulo 17. Iyebkasyo ti nauneg a panangipategyo iti organisasion ni Jehova. (Mat. 24:45-47) Agsaokayo a sipopositibo maipapan iti lokal a kongregasion ken maipapan iti maadalyo kadagiti gimong. (Sal. 84:10; 133:1-3) Nasayaat unay no mabuya ti estudiante dagiti video ti Sosiedad, a mangrugi iti Jehovah’s Witnesses—The Organization Behind the Name. Maipaay kadagiti kanayonan nga ideya no kasano nga iturong ti interes iti organisasion, kitaenyo ti Nobiembre 1, 1984, a Pagwanawanan, pinanid 14-18, ken ti Abril 1993 nga insert Ti Ministeriotayo iti Pagarian.
17 Paregtaen Dagiti Estudiante a Mangasaba iti Sabsabali: Ti kalattayo a mangyadal kadagiti tattao isut’ panangaramid kadagiti adalan a mangsaksi ken Jehova. (Isa. 43:10-12) Kaipapananna a masapul a paregtaen ti mangyad-adal ti estudiante a makisao iti sabsabali maipapan iti maad-adalna manipud ti Biblia. Maaramid daytoy babaen laeng ti panangisaludsod: “Kasano nga ilawlawagmo daytoy a kinapudno iti pamiliam?” wenno “Ania a kasuratan ti usarem a mangpaneknek iti daytoy iti maysa a gayyem?” Igunamgunamyo dagiti panulbek a lugar iti libro a Pannakaammo a pakaiparparegtaan ti panangsaksi, kas iti pinanid 22, 93-5, 105-6, kasta met ti kapitulo 18. Mabalin a maikkan ti estudiante iti sumagmamano a tract nga usarenna iti impormal a panangsaksi iti sabsabali. Isingasingyo nga awisenna dagiti miembro ti pamiliana a makipagadal a kaduana. Adda kadi gagayyemna a mayat a makiadal? Kiddawenyo nga iyam-ammonakayo kadagidiay interesado.
18 Babaen ti itatabuno iti Teokratiko nga Eskuelaan ti Panagministro ken iti Gimong ti Serbisio, mabalin nga umawat iti kanayonan a panagsanay ken pammaregta ti manamnama nga adalan a tumulong kenkuana nga agbalin nga agibumbunannag ti naimbag a damag. Inton iyebkasna ti interes nga agpalista iti eskuelaan wenno agbalin a di bautisado nga agibumbunannag, agaplikarto dagiti prinsipio a naituyang iti pinanid 98 ken 99 iti libro a Ti Ministeriotayo. No adda paset ti biagna a manglapped kenkuana a maikari, mabalinyo ti agsukimat kadagiti makatulong a material iti publikasion ti Sosiedad a mainaig iti dayta a banag ket iranudyo kenkuana. Kas pagarigan, mabalin a marigatan ti estudiante a mangparmek iti adiksion ti tabako wenno iti dadduma a droga. Ipakita ti libro a Panakirinnason dagiti nabileg a Nainkasuratan a rason no apay a dagiti Kristiano idianda dagiti kakasta a makadangran a bisio, ket iti panid 112 ituyangna dagiti wagas a napaneknekan a naballigi a pangtulong iti sabsabali a rumuk-at. Makipagkararagkayo kenkuana maipapan iti dayta a banag, isuroyo nga agpannuray iti tulong ni Jehova.—Sant. 4:8.
19 Naibalabala iti Enero 15, 1996, a Pagwanawanan, panid 16, parapo 6 ti pamay-an a masurot a mangikeddeng no ti maysa ket maikarin a makiraman iti publiko a ministerio. No kualipikadon ti estudiante, makatulong no adda sesion ti panaginsayo tapno maisagana iti umuna nga aldawna iti tay-ak ti serbisio. Iti positibo a wagas, pagsaritaan dagiti gagangay a tignay ken ibubusor dagiti tattao a masarakan iti teritoriayo. Iyunayo kenkuana ti trabaho a panagbalaybalay no mabalin, ken in-inut a sanayenyo kadagiti sabali a paset ti ministerio. No pagtalinaedenyo nga ababa ken simple dagiti panangiparangyo, nalaka a tuladenna. Makapabileg ken makaparegtakayo koma, nga ipakitayo ti rag-o iti trabaho, tapno mariknana ti regtayo ket aramidenna dayta. (Ara. 18:25) Ti kalat ti agdadamo nga adalan isu koma ti panagbalin a regular, naregta nga agibumbunannag ti naimbag a damag. Nalabit matulonganyo a mangaramid iti praktikal nga eskediul iti serbisio. Tapno rumang-ay ti abilidadna a mangasaba iti sabsabali, mabalin nga isingasingyo a basaenna dagiti ruar ti Pagwanawanan a Pebrero 15, 1985 (Agosto 15, 1984 iti Ingles), pinanid 15-25; Hulio 15, 1988, pinanid 9-20; Enero 15, 1991, pinanid 15-20; ken Enero 1, 1994, pinanid 20-5.
20 Tignayen Dagiti Estudiante iti Dedikasion ken Bautismo: Mabalin a gun-oden ti maysa a nasingpet ti panagpuspusona nga estudiante ti umdas a sursuro iti panangadalna iti libro a Pannakaammo tapno makapagdedikar iti Dios ken maikari iti bautismo. (Idiligyo iti Aramid 8:27-39; 16:25-34.) Nupay kasta, sakbay a matignay ti maysa a tao nga agdedikar, masapul a mapatanorna ti debosion ken Jehova. (Sal. 73:25-28) Kabayatan ti kurso a panagadal, sumapulkayo kadagiti oportunidad tapno mapabileg ti panangipategna kadagiti kalidad ni Jehova. Iyebkasyo dagiti napasnek a riknayo a maipaay iti Dios. Tulonganyo ti estudiante nga agpanunot no kasano a mapatanorna ti nabara, personal a relasionna ken Jehova. No pudno a maam-ammo ken maayatna ti Dios, iti kasta agserbinto a simamatalek kenkuana, ta nainaig ti nadiosan a debosion iti riknatayo maipapan ken Jehova kas persona.—1 Tim. 4:7, 8; kitaenyo ti Giya ti Eskuelaan, panid 76, parapo 11.
21 Ikagumaanyo a danonen ti puso ti estudiante. (Sal. 119:11; Ara. 16:14; Roma 10:10) Masapul a makitana no kasano a personal nga apektaran ti kinapudno ken maikeddengna no ania ti aramidenna iti naadalnan. (Roma 12:2) Pudno kadi a patienna ti kinapudno a maidatag kenkuana iti linawanlawas? (1 Tes. 2:13) Iti dayta a punto, maammuanyo ti kapanunotan ti estudiante babaen ti panangibangon iti mangadaw-kapanunotan a salsaludsod, a kas iti: Kasano ti panagriknam iti daytoy? Kasano a mayaplikarmo daytoy iti biagmo? Babaen kadagiti komentona matinongyo no ania pay a tulong ti kasapulan tapno madanon ti pusona. (Luc. 8:15; kitaenyo ti Giya ti Eskuelaan, panid 52, parapo 11.) Ti kapsion kadagiti ladawan iti pinanid 172 ken 174 ti libro a Pannakaammo isaludsodna: “Nagdedikarkay kadin iti Dios babaen ti kararag?” ken “Ania ti makalapped kadakayo nga agpabautisar?” Mabalin nga epektibo dagitoy a manggutugot iti estudiante nga agtignay.
22 Ti pamay-an a masurot no ti di bautisado nga agibumbunannag ket agngayangay nga agbautisar ket naibalabala iti Enero 15, 1996, a Pagwanawanan, panid 17, parapo 9. Ti libro a Pannakaammo naisurat a nairanta a mangtulong iti tao a mangsungbat iti “Salsaludsod Agpaay Kadagiti Agngayangay a Mabautisaran,” a masarakan iti apendise iti libro a Ti Ministeriotayo, a dagitoy ti irepaso dagiti panglakayen kenkuana. No naipaganetgetyo dagiti sungbat iti naimaldit a salsaludsod iti libro a Pannakaammo, nakasagana koman a naimbag ti estudiante para kadagiti sesion ti saludsod nga imatonan dagiti panglakayen kas panagsagana iti bautismona.
23 Tulongan Dagidiay Nakakompleton iti Panagadal ti Biblia iti Pagtaengan: Manamnama nga iti kanito a ti tao nakompletonan nga adalen ti libro a Pannakaammo, agminarton ti kinapasnek ken kinapinget ti interesna nga agserbi iti Dios. (Mat. 13:23) Dayta ti gapu a ti maudi a subtema ti libro isaludsodna, “Aniat’ Aramidenyo?” Dagiti pangserra a parapo allukoyenna ti estudiante a mangipamaysa ti relasion a masapul a patanorenna iti Dios, a masapul nga iyaplikarna ti pannakaammo a naadalna, ken masapul nga agtignay a dagus a mangidemostra iti ayatna ken Jehova. Awan ti probision a panangadal kadagiti kanayonan a publikasion kadagidiay nakakompleton iti libro a Pannakaammo. Siaanus ken sibabatad nga ilawlawagyo iti estudiante a saan a nagtignay iti pannakaammo ti Dios no ania koma ti inna aramiden tapno rumang-ay iti naespirituan. Mabalinyo a sarungkaran sagpaminsan, a bay-anyo a nakalukat ti dalan kenkuana nga umaddang nga agturong iti biag nga agnanayon.—Ecl. 12:13.
24 Adu pay ti panagdakkel nga aramiden ti baro nga adalan a mangabrasa iti kinapudno ken mabautisaran, iti pannakaammo ken pannakaawatna tapno naan-anay a natibker iti pammati. (Col. 2:6, 7) Imbes nga itultuloyna ti panagadal ti Biblia kalpasan a nakompletoyon ti libro a Pannakaammo, mabalin a sidadaankayo a mangipaay iti aniaman a personal a tulong a kasapulanna tapno agmataengan iti naespirituan. (Gal. 6:10; Heb. 6:1) Iti biangna, maan-anayna ti pannakaawatna babaen ti inaldaw a panagbasana iti Biblia, personal a panangadal Ti Pagwanawanan ken dagiti dadduma a publikasion ti matalek nga adipen, panagsagana a maipaay ken tumabuno kadagiti gimong, ken panangisarita iti kinapudno kadagiti kapammatian. (Mat. 24:45-47; Sal. 1:2; Ara. 2:41, 42; Col. 1:9, 10) No basaenna ti libro a Ti Ministeriotayo ket alagadenna ti linaonna agbanagto iti panagbalinna nga organisado a nateokratikuan a mangitungpal a naan-anay iti ministeriona.—2 Tim. 2:2; 4:5.
25 Patanoren ti Arte ti Panangisuro: Nakomisionantayo a ‘mangaramid kadagiti adalan a tattao . . . , nga isursurotayo ida.’ (Mat. 28:19, 20) Idinto ta ti arte ti panangisuro ket saan a naisina iti panagaramid ti adalan, kayattayo nga ikagumaan ti rumang-ay kas mannursuro. (1 Tim. 4:16; 2 Tim. 4:2) Maipaay kadagiti kanayonan a singasing no kasano a mapatanor ti arte ti panangisuro, mabalin a kayatyo a basaen dagiti tema a: “Panangparang-ay iti Panangisuro” ken “Panangdanon iti Puso Dagiti Agim-imdeng Kadakayo” idiay Giya ti Eskuelaan, kadagiti adalen 10 ken 15; “Teacher, Teaching” iti Insight, Tomo 2; ken dagiti artikulo ti Pagwanawanan a “Panangbangon Babaen Kadagiti Di Mauram iti Apuy a Materiales” ken “No Mangisurokayo, Danonenyo ti Puso,” Pebrero 1, 1985 (Agosto 1, 1984 iti Ingles); “Epektibo Kadi ti Pannakirinnasonyo Manipud kadagiti Kasuratan?” iti Marso 1, 1986; ken “No Kasanot’ Pananggun-od iti Rag-o iti Panagaramid ti Adalan,” Pebrero 15, 1996.
26 Bayat nga ikagumaanyo ti agaramid kadagiti adalan, babaen ti panangusar iti libro a Pannakaammo, kanayon nga ikararag ken Jehova, isu a “mangpadakkel iti dayta,” a bendisionanna ti pingetyo a mangdanon kadagiti puso ti tattao babaen ti naimbag a damag ti Pagarian. (1 Cor. 3:5-7) Sapay koma ta masagrapyo ti rag-o ti panangisuro iti sabsabali a mangtarus, mangipateg, ken agtignay iti pannakaammo a mangiturong iti biag nga agnanayon!