“Aramidenyo ti Amin a Kabaelanyo”
1 Idi nagdedikartayo ken Jehova, inkaritayo nga itedtay kenkuana ti amin a kabaelantayo. Mayanatup ngarud ti panangparegta ni apostol Pedro kadagiti Kristiano idi umuna a siglo nga aramidenda ti amin a kabaelanda a mangsigurado iti takderda iti imatang ni Jehova. (2 Ped. 1:10) Sigurado a kayattayo nga aramiden ti amin a kabaelantayo a mangparagsak ken Jehova iti panagserbi kenkuana ita. Ania ti ramanen daytoy? Bayat a suminged ti relasiontayo ken Jehova ken utobentayo amin a naaramidanna para kadatayo, kanayon a tignayennatay ti pusotayo a mangaramid iti amin a kabaelantayo nga agserbi kenkuana. Kayattayo a parang-ayen ti kalidad ken, no mabalin, palawaentay ti ministeriotayo.—Sal. 34:8; 2 Tim. 2:15.
2 Maysa nga agtutubo a kabsat a kayatna a parang-ayen ti ministeriona natakuatanna a ti regular a panagadal iti Sao ti Dios isut’ nangpauneg iti apresasionna ken Jehova ken ad-adda a nangparegta kenkuana. Daytoy ti nangtignay kenkuana nga agpayunir. Maysa a kabsat a babai a marigatan a makisao kadagiti dina am-ammo sinanayna ti sumagmamano kadagiti presentasion iti libro a Panakirinnason ket di nagbayag natagiragsaknan ti nabalballigi a ministeriona. Nakaidaulo iti panagadal iti Biblia iti agassawa a nangawat iti kinapudno.
3 Agrag-okayo iti Maaramidanyo: Mapasaran ti dadduma kadatayo dagiti naririgat a kasasaad a kas iti nakapuy a salun-at, ibubusor ti pamilia, kinapanglaw, wenno di panangikankano iti teritoria. Adu pay a sabsabali a problema a gagangay kadagitoy maudi nga al-aldaw ti mabalin a manglapped iti panagserbitayo. (Luc. 21:34, ftn. iti Ingles; 2 Tim. 3:1) Kayat kadi a sawen daytoy a ditay natungpal ti dedikasiontayo ken Jehova? Saan no agserserbitayo kenkuana iti amin a kabaelantayo.
4 Di nainsiriban nga ukomentay ti bagbagitayo maibatay iti maaramidan ti sabsabali. Imbes ketdi, paregtaennatayo ti Kasuratan a “paneknekan koma ti tunggal maysa no ania ti bukodna nga aramid.” Ti naan-anay a panangipaaytay iti bagbagitayo agingga iti personal a kabaelantayo paragsakenna ni Jehova ken ikkannatayo iti “pakaigapuan ti panagrag-o.”—Gal. 6:4; Col. 3:23, 24.
5 Sapay koma ta ipangagtayo ti sasao ni Pedro nga ‘aramidentayo ti amin a kabaelantayo tapno masarakannatayo ti Dios iti kamaudiananna a di namulitan ken awan pakapilawanna ken sitatalna.’ (2 Ped. 3:14) Dayta nga espiritu pagbalinennatayo a natalged ken ikkannatayo iti talna ti panunot a ni laeng Jehova ti makaipaay.—Sal. 4:8.