Nagannak—Sanayenyo Dagiti Annakyo a Mangasaba
1 Naparaburan dagiti kongregasiontayo iti adu nga annak a napasnek ti tarigagayda nga agserbi iti Dios. (Ecl. 12:1) Mairamanda kadagidiay inawis ni Jehova a mangidayaw kenkuana. (Sal. 148:12-14) Gapuna, ti inaldaw-aldaw a panangsanay dagiti nagannak kadagiti annakda rumbeng a ramanenna ti panangisuro no kasano nga iburayda ti pammatida kadagiti sabsabali iti trabaho a panangikasaba iti Pagarian.—Deut. 6:6, 7.
2 Progresibo a Panangsanay Kadagiti Annak: Kabayatan ti kinaubingda maiparbeng a masanay dagiti annak a makikuyog kadagiti nagannak iti ministerio. Sakbay a mapankayo iti pangasabaan, isaganayo ti makaay-ayo a pannakipaset dagiti annakyo. Ikeddengyo a nasaksakbay no ania ti kayatyo nga aramidenda iti ruangan. Dagiti ubbing pay nga annak mabalinda ti mangted iti tracts ken handbills ken agawis kadagiti tattao a mapan iti Kingdom Hall. Dagiti ubbing a nalaingen nga agbasa mabalin a pagbasaen ida kadagiti kasuratan iti bumalay. Mabalinda ti agitukon kadagiti magasin babaen iti ababa a presentasion. Bayat a manayonan ti kapadasanda, sanayenyo ida a mangusar iti Biblia iti presentasionda. Adu dagiti ubbing nga agibumbunannag ti mismo a nangirugi iti rutada iti magasin ken regular nga agsarungkar. Kasayaatan no makipagtrabaho ti maysa nga ubing a kaduana ti nataengan imbes a ti padana nga ubing. Mabalin nga ilawlawag ti nataengan iti bumalay nga agdama a masansanay ti ubing iti ministerio.
3 Nagpatulong ti maysa a balasitang kadagiti panglakayen tapno makualipikar kas agibumbunannag iti Pagarian. Nupay lima laeng idi ti tawenna ken dina ammo ti agbasa, maisangona a sieepektibo ti mensahe ti Pagarian kadagiti ruangan. Inkabesana ti ayan dagiti kasuratan, ukagenna dagitoy, ipabasana iti bumalay, sana ilawlawag.
4 Rumbeng met a maisuro kadagiti annak babaen ti ehemplo dagiti nagannak ti pateg ti nasayaat nga eskediul iti regular a pannakiraman iti ministerio. Masapul a mangituyang dagiti nagannak iti di agbaliwbaliw a linawas a rutina iti panagserbi ket kanayon a surotenda dayta, tapno ammo dagiti annak no ania nga aldaw ti kanayon a nailatang iti panangasaba.
5 No masanay dagiti annak manipud iti kinaubingda a mangipateg ken mangtagiragsak iti ministerio, matignaydanto a mangragpat kadagiti dakdakkel a pribilehio iti masanguanan, nalabit pati panagpayunir. (1 Cor. 15:58) Datayo amin paregtaentay koma dagiti annak nga adda iti nagtetengngaantayo tapno rumang-ayda kas managdaydayaw ken Jehova.