“Addanto Ngata Tiempo nga Agiinnayat Amin a Tattao?”
1 Adda nagpintas, makagutugot, ken makaparagsak a mensahe a maiwaragawag iti sangalubongan iti 169 a pagsasao. Ania daytoy a mensahe? Ken kasano ti pannakaipakaammona?
2 Ti mensahe ket maipapan iti ayat iti pada a tao. Masarakan dayta iti Kingdom News No. 35, a napauluan “Addanto Ngata Tiempo nga Agiinnayat Amin a Tattao?” Daytoy a Kingdom News salaysayenna iti ababa ti agdama a kasasaad iti intero a lubong, a mangipakita a ti kinaawan ayat dagiti tattao ti makagapu iti adu unay a saem ken ut-ot. Ilawlawagna no apay a limmamiis ti ayat iti pada a tao, nangnangruna iti kaaldawantayo, ken no ania ti kaipapanan daytoy iti masanguanan.
3 Kasta met, ipakita ti Kingdom News No. 35 a ti pudno nga ayat iti pada a tao masarakan itan kadagiti minilion nga agbibiag ditoy lubong. Ipabigbigna dagidiay mangan-annurot iti daydi immuna a siglo a panagdayaw, nga addaanda iti ayat iti padada a tao a kas iti insuro ni Jesu-Kristo.—Lucas 10:25-37.
4 Iti ngudo ti Kingdom News No. 35 ilawlawagna no kasano nga agiinnayatton dagiti tattao iti intero a lubong iti sidong ti administrasion ti Pagarian ti Dios baeten ken Kristo. Dagidiay mangbasa iti daytoy a mensahe maparegtada a gumun-od iti broshur nga Ania ti Kalikaguman ti Dios Kadatayo? ket ammuenda no kasano ti makipaset iti daytoy sangalubongan a naayat nga urnos a detalyado ti pannakailadawanna iti Sao ti Dios.
5 Siasino ti Mangipakaammo iti Daytoy a Mensahe? Dagiti Saksi ni Jehova iti sangalubongan iburayda daytoy a mensahe maipapan iti kasta nga ayat kadagiti gagayyem, kaarruba, ken kabagianda iti bulan ti Oktubre ken Nobiembre. Amin a kualipikado maparegtada a makipaset iti publiko a panagiwaras iti Kingdom News No. 35.
6 Ti kangrunaan a kalat daytoy a kampania ket tapno gutugoten ti interes dagiti tattao nga agadal iti Biblia iti broshur a Kalikaguman wenno iti libro a Pannakaammo. Kasta met, ti naimpusuan a panagregget ti tunggal maysa nga adipen ni Jehova mangipaay iti nadaeg a pammaneknek iti Dios ti ayat, ni Jehova, ken iti Anakna, ni Jesu-Kristo.