Dagiti Magasin Ibunannagda ti Pagarian
1 Kas Saksi ni Jehova, agdindinamagtayo gapu iti kinaregtatayo a mangikasaba iti Pagarian ti Dios. Dagiti iwarwarastayo a magasin a Pagwanawanan ken Agriingkayo! ket nabileg a pangtulong kadagiti minilion a tattao a mangammo kadagiti panggep ti Dios. Pudno a naimbag a damag ti mensahe a linaonda gapu ta ibumbunannagda ti nailangitan a Pagarian ti Dios kas ti kakaisuna a namnama para iti sangatauan. Gapuna a ti Abril ken Mayo ket nagsayaat a gundaway a panagitukon kadagitoy a dua a magasin babaen ti suskripsion.
2 Dagiti magasin usigenda dagiti pudno a kasapulan ti tattao—emosional, sosial, ken naespirituan. Tangay mapukpukawen ti moralidad ken nasayaat a kababalin iti pamilia iti amin a lugar, Ti Pagwanawanan ken Agriingkayo! tulonganna dagiti tattao a mangpasayaat iti biagda babaen ti panangipakitana kadakuada no kasanoda nga iyaplikar dagiti prinsipio iti Biblia. Maragsakantayto a mangitampok kadagiti magasin iti Abril ken Mayo.
3 Pudno a Makaguyugoyda: Magun-odan Ti Pagwanawanan ken Agriingkayo! kadagiti pagsasao ti gistay isuamin a tattao. Gapu iti daytoy, nalatak dagiti magasintayo. Adtoy ti sumagmamano a makagapu no apay a magustuan dagiti tattao:
◼ Kas warnakan a natarnaw ken napudno, ibatadda ti paggidiatan ti naimbag ken dakes.
◼ Mangipaayda iti namnama maipapan iti umad-adanin a nalinteg a paraiso, maibatay iti kari ti Dios nga iturayanna ti daga babaen ti Pagarianna.
◼ Naidatag ti adu a nagduduma a naintiempuan a tema, a makaguyugoy kadagiti tattao a nagduduma ti kasasaad ken kulturada.
◼ Abbaba dagiti artikulo, edukasional, napaypayso, sa di mangidumduma ken saan a makikompromiso.
◼ Dagiti makakayaw nga ilustrasion nalaka a mangpataud iti interes, ken nalaka a basaen dagita a magasin gapu iti simple nga estilo ti pannakaisuratda.
4 Iwaras a Sisasaknap: Ti epektibo a panagiwaras iti magasin nangnangruna nga agpannuray iti kinasaettayo a mangisagana kadagiti presentasiontayo, mangyeskediul iti tiempotayo, ken panangorganisar iti panangasabatayo. Naitukon dagiti praktikal a singasing iti Enero 1996 ken Oktubre 1996 a ruar Ti Ministeriotayo iti Pagarian, a nasayaat a repasuen ken iyaplikar.
5 Ammuenyo a Mismo ti Linaon Dagiti Magasin: Bayat a basaenyo ti kada ruar, panunotenyo no siasino ti maragsakan a maaddaan iti kasta a kopia. Mangbirokkayo kadagiti espesipiko a punto wenno kasuratan a mabalinyo a dakamaten iti presentasionyo. Mangpanunot iti saludsod a mabalinyo a pangirugi iti saritaan ken pangtukay iti interes ti tao iti tema.
6 Ibagayyo ti Presentasion iti Tao: Mangisagana iti simple, nalaka nga ibagay a presentasion a maitutop iti lalaki, babai, nataengan, wenno agtutubo, am-ammoyo man wenno saan.
7 Kanayon Koma a Sisasaganakayo a Mangipaima iti Pagwanawanan ken Agriingkayo!: Tangay nalaka nga ikabil dagiti magasin iti bag, handbag, wenno bulsa, mabalintay ti mangitugot no agbibiahe wenno aggatgatangtayo. Itukonyo dagitoy kabayatan ti pannakisaritayo kadagiti kabagian, kaarruba, katrabahuan, kaeskuelaan, wenno mannursuro. Mangilasin iti maysa nga aldaw iti kada lawas, a nangnangruna a maisangrat iti panagiwaras kadagiti magasin.
8 Ipakita ti Panangipategyo Kadagiti Magasin: Nikaanoman saan nga agkupas ti pategda. Ti panaglabas ti tiempo dina kissayan ti pateg ti mensahe a linaonda. Siempre, no ikagumaantayo nga ipaima amin nga alaentayo a magasin, sigurado a saan a maurnong dagiti daan a ruar kadagiti estantetayo.
9 Epektibo ti Mangasaba Kadagiti Lansangan: Maysa daytoy kadagiti kasayaatan a wagas a panagitukon iti magasin kadagiti adu a tattao. Dadduma nga agibumbunannag agtrabahoda kadagiti lansangan a pagpagnaan ti adu a tattao iti tiempo ti panaggatang.
10 Nabunga ti Mangasaba Kadagiti Lugar ti Negosio: Iti panangasaba kadagiti tiendaan, manmano ti ditay madanon. Nadayaw ti kaaduan a negosiante, ket adu ti maragsakan a mangala kadagiti magasin. Mangitampok kadagiti artikulo a maibagay iti partikular a negosio a papanan.
11 Adda Manamnama Kadagiti Ruta iti Magasin: Tangay maipabpablaak dagiti magasin iti mamindua iti makabulan, mayanatup laeng a subliantay dagiti tattao nga agbasbasa kadagitoy ket ipakitatayo dagiti sumaganad a ruar. Agsarungkartayo koma a regular, saan laeng a tapno agipaima kadagiti magasin no di ket parang-ayentay ti interes ti tao iti Biblia. Dagiti ruta iti magasin ket nagsayaat a gubuayan dagiti manamnama a mayadalan iti Biblia.
12 Gundawayantayo iti Abril ken Mayo: Ti Pagwanawanan ken Agriingkayo! ket pagtalkan dagiti minilion a managyaman nga agbasbasa. Yantangay epektibo unay dagitoy iti pannakaibunannag ti Pagarian, ikagumaantay koma ti agitugot ken itukontay dagitoy iti amin a gundaway. Sapay koma ta ti Abril ken Mayo ket agbalin a naisangsangayan a bulbulan iti panagitukon kadagiti magasin!