Kasapulan—Ad-adu Pay a Panangyadal iti Biblia
1 Bembendisionan ni Jehova a Dios ti naindagaan nga organisasionna iti agtultuloy nga irarang-ay. Iti napalabas a tawen serbisio, 375,923 ti nabautisaran iti intero a lubong—agpromedio iti nasurok a 1,000 a baro nga adalan iti kada aldaw, wenno agarup 43 iti tunggal oras! Iti nadumaduma a paset ti lubong, dumurdur-as ti trabaho iti Pagarian ket adda dagiti naisangsangayan a nagrang-ayan, iti laksid ti pakarigatan a sinagaba dagiti kakabsattayo iti adu a dekada. Makapainteres a basaen dagiti nagrang-ayan ti pannakaisaknap ti naimbag a damag!
2 Iti napalabas a tawen serbisio, nakitatay met dagiti nagrang-ayan ti sanga iti Pilipinas no maipapan iti promedio a pakadagupan dagiti agibumbunannag ken auxiliary pioneer, oras a nabusbos iti panangasaba, ken kaadu ti naipaima a bokleta, broshur, ken magasin. Immadu ti nabautisaran ken dayta pay laeng ti kangatuan a bilang ti timmabuno iti Memorial. Ti ngay panagsarungkar ken panangyadal iti Biblia? Bimmassit ti pakadagupan ti naaramidantayo a panagsarungkar ken agarup 5-porsiento ti bimmabaan ti panangyadal iti Biblia. Ngem dagitoy a paset ti ministerio ket nasken iti trabaho a panagaramid-adalan. Aniat’ maaramidan ti tunggal maysa kadatayo tapno saan nga agtultuloy daytoy a panagpababa iti panagsarungkar ken panangyadal iti Biblia?
3 Pabilgen ti Tarigagay a Mangyadal: Masapul nga ipamaysatayo a mismo ti agbalin a nabileg ken aktibo iti naespirituan. Dagiti pudno a pasurot ni Kristo ket “naregta iti nasayaat nga ar-aramid.” (Tito 2:14) No usigentay manen ti ministeriotayo, maikunatay kadi a magagarantayo unay a mangsurnad iti amin a literatura a naipaima iti tay-ak? Narayraytay kadi a mangitukon kadagiti panangyadal iti Biblia iti amin a mangipakita iti interes? (Roma 12:11) Wenno nasken kadi a parang-ayentay ti tarigagaytayo nga agsarungkar ken mangirugi kadagiti panangyadal iti Biblia iti pagtaengan?
4 Ti personal a panagbasa iti Biblia, regular a pannakigimong, ken panagadal kadagiti publikasion taginayonennatayo a nabiag iti naespirituan ken mapabilegtayo babaen ti espiritu ti Dios. (Efe. 3:16-19) Daytoy ti mangpabileg iti pammati ken panagtalektayo ken Jehova ken ti ayattay iti padatayo a tao. Matignaytayo a mangisuro iti kinapudno kadagiti sabsabali, ket iti kasta mapagbalintay a makapainteres, naballigi, ken makapagagar ti ministeriotayo. Wen, tarigagayantay koma ti ad-adu pay a panangyadal iti Biblia!
5 Iyadalan nga Umuna ti Pamilia: Dagiti Kristiano a nagannak nga addaan annak a makipagnanaed kadakuada maseknanda koma a maaddaan iti regular a panagadal ti pamiliada iti Biblia. (Deut. 31:12; Sal. 148:12, 13; Prov. 22:6) Nasayaat unay no iyadal dagiti nagannak kadagiti annakda ti broshur a Kalikaguman sa kalpasanna ti libro a Pannakaammo a mangisagana kadakuada para iti pannakakualipikarda kas di bautisado nga agibumbunannag ken iti dedikasion ken bautismo. Siempre, mabalinda ti mangusig iti kanayonan a material, depende iti kasapulan ken edad ti anak. Ti naganak a mangyadal iti di nabautisaran nga anak mabalinna nga ireport dayta kas panangyadal, oras, ken panagsarungkar, kas naibalabala iti “Saludsod” iti Hunio 1987 a Ministeriotayo iti Pagarian.
6 Parang-ayen ti Personal nga Organisasion: No panunotentay ti kinaadu ti naipaima a magasin, broshur, ken libro, di pagduaduaan a nakaad-adu ti bin-i a naiwaris. Dagitoy a naimula a bin-i ti kinapudno dakkel unay ti pangnamnamaan a mangibunga kadagiti baro nga adalan. Ngem mapnek kadi ti maysa a mannalon wenno hardinero no kanayon ti panagmulana sa, kalpasan amin dagita a panagbannogna, dina met pulos napadasan ti nagapit? Saan. Umasping iti dayta, nasken ti panangsurnad iti ministerio.
7 Adda kadi regular nga eskediulyo nga agsarungkar? Dagdagusenyo a sublian amin a masarakan nga interes. Agsarungkar buyogen ti kalat a mangirugi iti panangyadal iti Biblia. Addaankay kadi iti nadalimanek, umiso, ken organisado a rekord dagiti sasarungkaranyo? Malaksid pay iti nagan ken direksion ti bumalay, siguraduenyo nga irekord ti petsa ti damo a pannakisarita, aniaman a naipaima, ababa a deskripsion iti napagsaritaan, ken ti punto a mapagsaritaan iti sumaganad nga isasarungkar. Mangibati iti espasio iti rekordyo para iti ad-adu pay nga impormasion a mainayon kalpasan ti kada isasarungkar.
8 Usigen no Kasano ti Agsarungkar: Aniat’ sumagmamano a punto a laglagipen no sarungkaran ti interesado a tao? (1) Napasnekkayo koma, mannakigayyem, narayray, ken simple. (2) Pagsaritaanyo dagiti tema wenno saludsod a paginteresanna. (3) Taginayonenyo a simple, makapainteres, ken Nainkasuratan ti saritaan. (4) Kada panagsarungkar, ikagumaanyo nga isuro ti bumalay iti aniaman a personal a maipategna. (5) Gutugotenyo a mangsegga iti tema a pagsaritaanyonto iti sumaganad nga isasarungkar. (6) Dikay unay agbaybayag. (7) Dikay agsalsaludsod kadagiti makapabain iti bumalay wenno mangparigat kenkuana. (8) Usarenyo ti pannakaawat tapno saanyo a kondenaren dagiti di umiso a panangmatmat wenno dakes a kababalin ti bumalay no dina pay napatanor ti naespirituan a panangapresiarna.—Kitaenyo ti suplemento ti Marso 1997 a Ti Ministeriotayo iti Pagarian para iti kanayonan a tulong iti naballigi a panagsarungkar ken panangirugi kadagiti panangyadal iti Biblia.
9 Padasen ti Tunggal Posibilidad: Iti maysa a kongregasion, naalada ti nagnagan ken numero ti apartment dagiti amin nga agnanaed iti maysa a pasilidad a nainget ti pannakaguardiana. Napatulodan ti kada residente iti personal a surat, ken nailukon ti dua a tracts. Iti ngudo ti surat, naitukon ti panagadal iti Biblia iti pagtaengan ken nairagpin ti lokal a numero ti telepono a mabalin nga awagan ti immawat iti surat. Iti sumagmamano nga aldaw, immawag ti maysa a lalaki nga agpapayadal. Nasarungkaran iti simmaganad nga aldaw, ket naipasdek ti panagadal iti libro a Pannakaammo. Iti dayta met laeng a rabii timmabuno iti Panagadal iti Libro ti Kongregasion, ket intultuloyna ti tumabuno iti amin a gimong. Gistay dagus a rinugianna ti regular a panagbasa iti Biblia iti inaldaw. Nagtultuloy a rimmang-ay agingga a nabautisaran.
10 Dagiti agibumbunannag iti maysa a grupo inyurnosda nga agdadanggayda nga agsarungkar. Iti maysa a sinarungkaran ti sister, dina nadanon ti tao a birbirokenna, ngem adda sabali nga agkabannuag a babai a simmungbat iti ruangan, a kunkunana: “Nabayagen a pinadpadaanankayo.” Nakagun-oden ti bumalay iti libro a Pannakaammo manipud iti maysa nga am-ammona. Iti daydi nga isasarungkar dagiti kakabsat a babbai iti pagtaenganna, naminduan a nabasana ti libro ket nagustuanna unay ti impormasion a linaonna. Kinunana a saan a nasdaaw a makakita kadagiti Saksi a sumarungkar kenkuana iti dayta nga aldaw gapu ta inkarkararagna ti iyaayda ken panangyadalda iti Biblia kenkuana. Nairugi ti panagadal, rinugianna ti nakigimong iti kongregasion, ket nakaparpartak ti panagrang-ayna.
11 Maysa a sister, a gistay 25 a tawenen a nabautisaran, ti nabiit pay a nangted ken nanangna iti libro a Pannakaammo. Ni nanangna, a miembro ti relihion, rinugianna a basaen ti libro. Idi nalpasnan ti dua a kapitulo, inawaganna ti balasangna ket, iti pannakaklaat ti anak, kinunana: “Kayatko ti agbalin a Saksi ni Jehova!” Nangrugi a nagadal ti ina ket bautisado itan.
12 Padasenyo Dagitoy a Singasing: Pinadasyo kadin ti direkta a panangirugi kadagiti panangyadal? Kunaenyo laeng: “No kayatyo ti maaddaan iti libre a panagadal iti Biblia iti pagtaenganyo, mabalinko nga ipakita kadakayo iti sumagmamano laeng a minuto no kasano nga aramiden dayta. No magustuanyo, mabalinyo nga ituloy.” No kasta ti ibagayo, adu ti di bumdeng nga umawat iti tukon ket paliiwenda ti pannakaidemostra ti panagadal iti Biblia.
13 Kadagiti damo a panagadal, ipakita iti estudiante no kasano ti agsagana a nasakbay babaen ti panangbasa kadagiti naisitar a kasuratan ken pananguged kadagiti panulbek a sasao a pangsungbat kadagiti nayimprenta a saludsod. Ipamaysa kadagiti kangrunaan laeng a punto. Nupay kasapulan nga agbalintayo a mannakibagay kadagiti damo a sesion, nasken a regular ti panagadal iti Biblia. Panunotenyo no kasanoyo nga iserrek ti panagkararag kas napateg a paset ti panagadal ken no kasano ti Nainkasuratan a panangisaganayo iti estudiante a mangdaer iti ibubusor. Rumbeng a pagbalinen a makapainteres ti panagadal.
14 Siempre, saan nga agpapada ti kapartak ti irarang-ay ti tunggal estudiante iti Biblia. Dadduma dida matulad ti kinaanep dagiti sabsabali iti naespirituan wenno nakapkapuyda a mangtarus kadagiti maisuro kadakuada. Okupado unay ti dadduma ket dida maiwayaan ti tiempo a kasapulan tapno mawanas ti intero a kapitulo iti kada lawas. Gapuna, iti dadduma a kaso nalabit kasapulan a saan a pampaminsanen nga adalen ti maysa a kapitulo ken kasapulan ti kanayonan a bulan tapno maileppas ti libro. Iti dadduma a kasasaad, mabalin nga iyadaltay nga umuna ti broshur a Kalikaguman sa itultuloytayto iti libro a Pannakaammo; kadagiti dadduma, apaman a maileppas ti libro a Pannakaammo, mabalin a makitatayo a nasayaat nga iyadal ti broshur a Kalikaguman. Daytoy, agraman ti itatabunoda kadagiti gimong ti kongregasion, tulonganna ti kada estudiante a maaddaan iti natibker a pundasion iti kinapudno.
15 Kangrunaanna, ikararagyo a maaddaankay iti iyadalan iti Biblia! (1 Juan 3:22) Maysa kadagiti makapnek unay a kapadasan ti Kristiano ket ti panangusar ni Jehova kenkuana a tumulong iti sabali nga agbalin nga adalan ni Jesu-Kristo. (Ara. 20:35; 1 Cor. 3:6-9; 1 Tes. 2:8) Itan ti tiempo a panangipakita iti nasged a regta iti trabaho a panangyadal iti Biblia, nga agtalek a naan-anay iti nabaknang a pamendision ni Jehova iti panagreggettayo a mangirugi iti ad-adu pay a panangyadal!
[Blurb iti panid 3]
Ikarkararagyo kadi a makairugikayo iti baro a panangyadal iti Biblia?