Saludsod

◼ Aniat’ maaramidantayo tapno makatulongtay a mangpasayaat iti kinaepektibo dagiti gimongtayo?

Mabalin a panunoten ti dadduma a dagiti laeng panglakayen ken ministerial nga adipen ti responsable iti panagballigi dagiti gimong ti kongregasion gapu ta isuda ti mangidadaulo kadagitoy ken isuda ti kaaduan nga agpaset. Kinapudnona, datayo amin ket personal a makatulong tapno agbalin a makapainteres ken makagunggona dagiti gimong. Makatulongtayo a mamagbalin kadagiti gimong nga ad-adda nga epektibo babaen kadagitoy a sangapulo a wagas:

Agsagana a nasakbay. No agsaganatayo a naimbag, ad-adda nga aginterestayo kadagiti gimong. No aramidentay amin daytoy, ad-adda a naganaygay ken makapabileg dagiti gimong. Tumabuno a regular. Ad-adda a makaparegta kadagiti isuamin no ad-adu ti tumabuno, a pabilgenna ti apresasiontayo iti kinapateg ti itatabuno. Sumangpet a nasapa. No nakatugawtayon sakbay a mangrugi ti programa, mabalintay ti makidanggay iti panglukat a kanta ken kararag ket iti kasta magunggonaantayo a naan-anay iti gimong. Itugot amin a masapul iti gimong. Babaen ti panangitugot iti Bibliatayo ken dagiti publikasion a mausar iti gimong, mabalintay a suroten ken ad-adda a matarusantayo ti maisalsalaysay. Liklikan dagiti pakasingaan. Nasaysayaat ti panagimdengtayo no agtugawtay iti sango. Ti panagiinnarasaas ken panagkaraapan iti kasilias ket makasinga kadatayo ken kadagiti sabsabali. Makipaset. No ad-adutayo nga agitayag ken agkomento, ad-adu ti mapabileg ken maparegta babaen kadagiti ebkas ti pammati. Mangipaay kadagiti ababa a komento. Babaen iti daytoy, ad-adu ti maipaayan iti gundaway a makiraman. Ipamaysatay koma dagiti ababa a komentotayo iti material a maad-adal. Iparang dagiti paset. Kas estudiante iti Teokratiko nga Eskuelaan ti Panagministro wenno agpaset iti Gimong ti Serbisio, agsaganakayo a naimbag, agsanay a nasakbay, ken ikagumaanyo nga iparang dayta. Komendaran dagiti addaan paset. Ibagayo kadagiti sabsabali a maapresiar unay ti panagreggetda. Daytoy ti mangpabileg kadakuada ken mangtignay kadakuada nga ad-addanto pay a pasayaatenda iti masanguanan. Agpipinnaregta. Dagiti naayat a kablaaw ken makapabileg a panagsasarita, sakbay ken kalpasan dagiti gimong, nayonanna ti ragsak ken dagiti gunggona a magun-odtayo iti pannakigimong.