Ganetgetan ti Panangasaba Bayat nga Umas-asideg ti Panungpalan
1 Ti panagani ket naragsak a tiempo. Tiempo met dayta iti panagbannog. Limitado laeng ti tiempo a panangummong kadagiti apit. Saan a mabalin nga agpampamayan dagiti trabahador.
2 Iti simboliko a panagsao, inyarig ni Jesus ti “panungpalan ti sistema ti bambanag” iti panagani. (Mat. 13:39) Agbibiagtayo iti panungpalan daytoy a sistema ti bambanag, ket limitado ti tiempo a nabati tapno makasabaan ti “isuamin a mapagnaedan a daga.” (Mat. 24:14) Bayat nga ad-adda nga umasideg ti panungpalan, masapul a naparpartaktayo koma a makiraman iti ministerio. Apay? Inlawlawag ni Jesus: “Ti anien dakkel, ngem bassit dagiti managobra.”—Mat. 9:37, 38; Roma 12:11.
3 Aramiden a Sigaganat: Idi inrugi ni Jesus ti naindaklan a trabahona a panangasaba, addaan laeng iti tallo ket kagudua a tawen a mangiringpas iti naituding nga aramidenna. Nangasaba a buyogen iti kinaganat, a kunkunana: “Masapul nga ideklarak ti naimbag a damag ti pagarian ti Dios, agsipud ta naibaonak a maigapu iti daytoy.”—Luc. 4:43.
4 Intukit ni Jesus kadagiti adalanna ti umasping a kinaganat. (Mar. 13:32-37) Dayta ti makagapu nga “iti tunggal aldaw idiay templo ken iti binalay-balay nagtultuloyda nga awan sardayna a mangisursuro ken mangidekdeklara iti naimbag a damag maipapan iti Kristo, a ni Jesus.” (Ara. 5:42) Saanda nga impangpangruna iti biagda dagidiay di unay nasken nga aktibidad. Nupay bassitda, nagballigida a nangikasaba iti naimbag a damag “kadagiti isuamin a parsua nga adda iti baba ti langit.”—Col. 1:23.
5 Adda pay dakdakkel a makagapu no apay a patanorentayo ti kasta met laeng a kinaganetget itan, bayat a “ti panungpalan dagiti isuamin a bambanag immasidegen.” (1 Ped. 4:7) Nangituding ni Jehova iti aldaw ken oras a panagpatingga daytoy a sistema ti bambanag. (Mat. 24:36) Mairingpasto ti trabaho a panangasaba iti tiempo a nabati. Dayta ti makagapu nga itultuloytayo a nayonan ti panagreggettayo a mangidanon iti naimbag a damag iti ad-adu pay a tattao.
6 No ganetgetantayo ti makiraman iti trabaho a panangasaba bayat nga umas-asideg ti panungpalan, mapnektayto nga agkuna ken Jehova, kas ken Jesus iti: ‘Naturposmi ti trabaho nga intedmo kadakami nga aramidenmi.’—Juan 17:4.