No Kasano nga Agtitinnulong Dagiti Miembro ti Pamilia Tapno Makiramanda a Naan-anay—Iti Ministerio
1 Ania pay ti ad-adda a makaparagsak ngem iti pannakakita kadagiti assawa a lallaki ken babbai, dagiti nagannak ken annak nga agtutunos a makiraman iti Nakristianuan a ministerio, nga idaydayawda ti nagan ni Jehova iti publiko? (Sal. 148:12, 13) Maaddaan koma dagiti amin a pamilia iti nasayaat a rutina para iti regular a pannakiramanda iti tay-ak ti serbisio. Adda kadi naituding nga aldaw kada lawas nga iruruar ti pamiliayo iti ministerio? No adda, sigurado ngarud nga ammoyo aminen no ania ti iplanoyo ket mabalinyo ti makiraman a naan-anay.—Prov. 21:5a.
2 Sakbay ti aldaw a panagserbi ti pamilia, apay a dikay padasen ti agtitinnulong a mangisagana kadagiti presentasion nga usarento ti pamiliayo? Makatulong unay dagiti panagensayo, ken patanorenda ti pudpudno nga espiritu ti panagtitinnulong ti pamilia. Anian a makagunggona no ti ministerio iti tay-ak ket aramiden ti sangapamiliaan ken nakasagana a naimbag dagiti amin a miembro!
3 Kinuyog ti maysa nga agdaldaliasat a manangaywan ti maysa a pamilia iti trabaho a panagmagasin. Bayat a kaduana ti maysa kadagiti anak a babai iti panagbalaybalay, inimtuod ti anak: “Kasanot’ kapaut ti panangkuyogmo kaniak?” Kalpasanna inlawlawag ti anak a sumaruno ni tatang a pakikaduaanna. Nabatad a talaga a tagtagiragsakenda nga agama ti panagkaduada a mangasaba. Anian a nagsayaat nga espiritu ti pamilia!
4 Adda dagiti pamilia a makapag-auxiliary pioneer a sangsangkamaysa iti makabulan iti kada tawen. Wenno mabalin nga uray maysa la a kameng ti pamilia ti agserbi kas auxiliary pioneer nga agpatpatuloy wenno ag-regular pioneer pay ketdi. Buyogen ti nasayaat a panangorganisar ken panagtitinnulong, nalabit amin a kameng ti sangakabbalayan mabalinanda a parang-ayen ti personal a pannakiramanda iti serbisio babaen ti panangsuportada iti daydiay agpaypayunir. Sigurado a mabendisionanto ti pamilia babaen iti daytoy naparang-ay nga aktibidad ken babaen kadagiti naimbag a kapadasan a tagiragsakenda iti ministerio.—Mal. 3:10.
5 Ti naan-anay a pannakiraman iti trabaho a panagebanghelio ket tumulong a mamagtalinaed kadagiti pamilia a nasinged, naregta, nabunga, ken naragsak iti panagserbi ken Jehova!—Idiligyo ti Filipos 2:1, 2.