Panagpayunir—Nainsiriban a Panangusar iti Tiempotayo!

¹ ‘Nagadu nga as-asikasuek! Talaga kadi a nainsiriban nga itan ti panagpayunirko?’ Kasta ti napanunot ti maysa a sister bayat nga inimdenganna ti maysa a payunir a panglakayen a nangiparang iti paset iti asamblea sirkito a napauluan “Panangikagumaan iti Ministerio a Kinapayunir.” Pinampanunot ti maysa a baro iti dayta met la a tallaong, ‘Kasano a nakapagpayunir? Saanak a panglakayen, ngem nakaad-adun ti pakakumikomak!’

² Bayat nga intultuloy nga insalaysay ti panglakayen dagiti bendision ti panagpayunir, ininterbiuna ti sumagmamano a payunir iti dayta a sirkito ket imbagada no ania a panagbalbaliw ti inaramidda tapno makapagpayunirda ken no kasano a sibabaknang a binendisionan ni Jehova ti panagreggetda. Baldado daydiay maysa, ti maysa ket di manamati ti asawana, ken ti maysa tinallikudanna ti nailubongan a karerana ngem adda umdas a pagbiagna. Idi nangngegda no kasano a nagballigi dagitoy a payunir a buyogen ti tulong ni Jehova, ti kabsat a lalaki ken babai iti tallaong rinugianda a sinukimat manen ti mismo a panagpampanunot ken sirkumstansiada. Awisendakayo a mangaramid met iti kasta, nangnangruna ta ti bimmaba nga oras a makalikaguman kadagiti payunir ket nalaklakan nga abuten ti ad-adu nga agibumbunannag iti naimbag a damag.

³ Ammotayo a ni Jehova ti Namarsua ken Sapasap a Soberano ket utangtay kenkuana ti biagtayo. (Dan. 4:17; Ara. 17:28) Nabatad kadatayo a maymaysa laeng nga organisasion ti us-usaren ni Jehova. Pribilehiotayo ti makipagserbi a sisusungdo iti dayta, a suportarantayo “ti matalek ken masirib nga adipen” a mangikasaba iti Pagarian sakbay nga umay ti panungpalan. (Mat. 24:45; 25:40; 1 Ped. 2:9) Ita ta agbibiagtayon iti arinunos ti “maudi nga al-aldaw,” mabigbigtayo a bassiten ti tiempotayo a mangasaba. (2 Tim. 3:1) Kabayatanna, masapul a suportarantayo ti material a kasapulan ti pamiliatayo. (1 Tim. 5:8) Ti mateggedan ti maysa a tao kasla saanen a mabennat no idilig iti naglabas. Nalabit saanen a kas idi ti salun-attayo. Ken kinapudnona, tarigagayantayo nga adda koma met bassit a tiempo ken kuarta a para iti bagitayo. (Ecl. 3:12, 13) Gapuna, nalabit pampanunotentayo no talaga a nainsiriban ti panangipangag iti awis a panagpayunir.

⁴ Datayo a mismo ti rumbeng a mangusig a siaannad iti bukodtay a sirkumstansia ken mangikeddeng no kabaelantay ti agpayunir. (Roma 14:12; Gal. 6:5) Makaparegta a makita ti umad-adu a mangipangpangag iti awis a panagpayunir. Iti laksid dagiti rigat ken problema kadagitoy maudi nga al-aldaw, ipakita ti report ti serbisio a naipablaak iti 1999 Yearbook a gistay 700,000 a tattao ni Jehova iti intero a lubong ti sigagaget a nagtultuloy iti ministerio a kinapayunir. Nupay agserserbida iti sidong dagiti narikut a kasasaad ti panagbiag, narigat ti transportasion, adda sagubanitda, wenno aglaklak-amda iti dadduma pay a parikut ken pakarigatan, saan a kimmapuy dagitoy a kakabsat iti panagaramid iti nasayaat, ket makomendaran daytoy. (Gal. 6:9) Inakseptarda ti singasing ni Jehova a panangsubokda kenkuana. (Mal. 3:10) Mamatida a ti panagpayunir ket nainsiriban unay a pangusaranda iti limitado a tiempo ken sanikuada ket pudno a binendisionan ni Jehova ida gapu kadagiti inaramidda a nasken a panagbalbaliw tapno sumrek ken agtalinaedda iti trabaho a kinapayunir.

⁵ Mabembendisionan Dagiti Payunir: Inlawlawag ti maysa a sister idiay Cameroon, nga addaan iti ubing pay nga anak a babai: “Nanipud nayanak, kumuykuyogen a kanayon ti anakko iti ministerio. Uray sakbay pay a magna, iyabadayko iti likudak. Maysa nga agsapa iti ministerio, simmardengak iti maysa a tianggi. Pinanawannak ti anakko, a nangala iti sumagmamano a magasin iti bagko. Inkarkarigatanna ti napan iti bangir a tianggi. Nupay di unay makasao, naawisna ti atension ti maysa a babai ket impresentana ti magasin. Nasdaaw unay ti babai a nakakita iti bassit nga ubing a makiramraman iti daytoy a trabaho. Dagus nga inawatna ti magasin ken panagadal iti Biblia!”

⁶ Gapu ta natignay iti awis para iti ad-adu pay nga auxiliary pioneer, ti maysa a panglakayen ken ulo ti pamilia idiay Zambia nga agtartrabaho iti amin-tiempo inkeddengna ti ag-auxiliary pioneer nupay okupado unay. Kayatna ti mangipakita iti ehemplo iti kongregasion ken iti pamiliana. No dadduma, iparadana ti kotsena iti igid ti kalsada ket patokarenna ti audiocassette a The Secret of Family Happiness sa awisenna dagiti aglabas tapno umasideg ken dumngegda iti maibasbasa a sipipigsa. Iti kasta, nakaipaima iti 16 a libro a Kinaragsak iti Pamilia ken 13 a libro a Pannakaammo, ken nakairugi iti dua a panangyadal iti Biblia.

⁷ Napaliiw met ti nasayaat nga espiritu ti kinapayunir iti kabangibang a pagilian ti Zimbabwe. Idi Abril 1998, adda kongregasion a 117 ti agibumbunannagna a nangireport iti 70 nga auxiliary ken 9 a regular pioneer. Ti sabali pay a kongregasion nga addaan iti 94 nga agibumbunannag, 58 nga auxiliary pioneer ti nagreport. Maysa pay a kongregasion, nga addaan iti 126 nga agibumbunannag, inreportna a 58 ti nagaplikar nga auxiliary pioneer a kaduada ti 4 a regular pioneer. Naisalsalumina ti gapuanan ti Zimbabwe itay napalabas a tawen serbisio. Nupay okupado unay dagiti kakabsat sadiay kadagiti trabaho iti pamilia, aktibidad iti kongregasion, ken panagpatakder idiay sanga, impamaysada ti panangbusbos a nainsiriban iti tiempoda iti ministerio.

⁸ Mabigbig dagiti payunir a ti panangrugi ken panagtalinaed iti trabaho a kinapayunir ket saan nga agpannuray iti bukodda a bileg. Isuda ti umuna a mangadmitir nga aniaman a kabaelanda nga aramiden ket posible gapu ta “agpampannuray[da] iti bileg nga ipaay ti Dios.” (1 Ped. 4:11) Ti pammatida ti nakatulong kadakuada nga agtultuloy iti ministerioda iti inaldaw. Imbes a birokenda ti bukodda a pagnam-ayan ken pakabang-aran, mabigbig dagiti naballigi a payunir a tapno makapagtultuloyda, masapul ti ‘kasta unay a pannakidangadang,’ ngem adu a bendision ti awatenda kas resultana.​—1 Tes. 2:2.

⁹ Nasayaat a Tuladen ti Ehemplo ni Pablo: Inlanad ti Biblia dagiti gapuanan ni apostol Pablo iti ministerio ken ti nagsayaat a naitulongna kadagiti adu a tattao. Ngem awanen ti mas okupado pay idi ngem ni Pablo. Inibturanna ti pannakaidadanes ken pisikal a pakarigatan tapno maikasabana ti naimbag a damag ken mapabilegna dagiti kongregasion. Inan-anusanna pay ti nakaro a sakitna. (2 Cor. 11:21-29; 12:7-10) Determinado idi a mangbusbos a nainsiriban iti tiempona. Binigbigna a naaramidna amin a trabahona gapu iti tulong ni Jehova. (Fil. 4:13) Awan kadagidiay tinulongan ni Pablo ti nainkalintegan a makaibaga a nasayang ti tiempo ken bannogna iti serbisio ni Jehova wenno nasaysayaat koma no sabali ti nangusaranna. Ay ket, mabembenepisiarantay pay laeng agingga itatta iti nainsiriban a panangusar ni Pablo iti tiempona! Anian a yamantayo iti naipaltiing a balakadna a mangtulong kadatayo a mangusig kadagiti banag nga ipangpangrunatayo ket agtalinaedtay iti kinapudno kadagitoy narikut a tiempo!

¹⁰ Ad-adda itan a ‘napaababa ti tiempo a nabati iti panangikasaba iti naimbag a damag.’ (1 Cor. 7:29; Mat. 24:14) Gapuna, maikanatad nga iyimtuodtay iti bagbagitayo, ‘No agngudo a di mapakpakadaan ti biagko inton bigat, maibagak kadi ken Jehova itatta nga inusarko a nainsiriban ti tiempok?’ (Sant. 4:14) Apay a dikay agkararag ken Jehova ita, a pasingkedanyo kenkuana ti tarigagayyo a mangusar a nainsiriban iti tiempoyo kas maysa kadagiti Saksina? (Sal. 90:12) Ikararagyo ti tulong ni Jehova a mangpasimple iti biagyo. Nupay nalabit naikeddengyo idin a dikay makapagpayunir, mabalin ngata a mautobyo itan a mabalinyo ti agpayunir?

¹¹ Aprobetsarenyo Dagiti Sirkumstansiayo: Gapu kadagiti sirkumstansia pudno a saan nga amin nga agtarigagay ket mayeskediulda ti 70 nga oras iti kada bulan tapno makapag-regular pioneer. Nupay kasta, iyurnos ti adu nga agibumbunannag nga ipaayda ti 50 nga oras kada bulan iti ministerio kas auxiliary pioneer a masansan kas kabaelanda wenno patinayon. Dikay maupay no di ipalubos dagiti agdama a sirkumstansiayo ti ag-auxiliary wenno ag-regular pioneer. Itultuloyyo nga ikararag nga agbalbaliwto koma ti sirkumstansiayo. Kabayatanna, no talaga a di mabalin ti panagbalbaliw, maliwliwakayo koma iti pannakaammo a maragsakan unay ni Jehova iti aniaman a kabaelanyo nga aramiden a naimpusuan iti serbisiona. (Mat. 13:23) Mapaliiwna nga agtaktakderkayo a sititibker iti dasigna ken ikagkagumaanyo unay ti agbalin a matalek nga agibumbunannag a dikay pulos palubosan a lumabas ti maysa a bulan a dikay gundawayan ti mangasaba. Nalabit mabalinyo ti agprogreso babaen ti panangparang-ayyo iti laingyo a mangasaba, nga ikagumaanyo ti agbalin a nalaing a manangaskasaba ken mannursuro iti naimbag a damag.​—1 Tim. 4:16.

¹² Ita ta nakaas-asidegen ti “dakkel ken nakakigkigtot nga aldaw ni Jehova,” masapul nga usarentay a nainsiriban ti nabatbati a tiempo tapno mairingpastay ti trabaho a naipaannong kadatayo. (Joel 2:31) Ammo ni Satanas nga ababan ti tiempona, ket nakarkaro itan ti panangipakatna iti amin a pannakabalinna a mamagrikut iti biagtayo ket aramidenna a kasta tapno marigatantayo a mangipamaysa kadagiti banag a pudno a napateg. (Fil. 1:10; Apoc. 12:12) Diyo pulos tagtagilag-anen ti panaginteres ti Dios kadakayo. Matulongannakayo ni Jehova a mangpasimple iti biagyo ket maaramidyo ti amin a kabaelanyo iti ministerio. (Sal. 145:16) Makaparagsak ta, babaen ti panangusigda manen kadagiti sirkumstansiada, adu dagiti makapanunot a kabaelanda ti ag-auxiliary wenno ag-regular pioneer. Wen, maragsakan unay dagiti payunir a mangusar a nainsiriban iti tiempoda. Agbalinkayto kadi a maysa kadakuada?