Isursuronatayo ni Jehova
1 Iti sidong ti nadibinuan a panangiwanwan, agan-andaren iti 233 a dagdaga ti internasional a programa ti panangisuro. Awan maitukon daytoy a lubong a maipada iti dayta. Ti Naindaklan nga Instruktortayo a ni Jehova, isursuronatayo no kasano a magunggonaantay itan bayat nga isursuronatayo met a maipaay iti biag nga agnanayon.—Isa. 30:20; 48:17.
2 Dagiti Eskuelaan ti Nadibinuan nga Edukasion: Usigenyo dagiti eskuelaan a madama nga agan-andar a pakagunggonaan ti ili ni Jehova. Ti Teokratiko nga Eskuelaan ti Panagministro, a linawas a maang-angay iti agarup 87,000 a kongregasion, sanayenna ti minilion nga agibumbunannag ti Pagarian tapno agbalinda nga epektibo a ministro ti naimbag a damag. Nagpasalistakayon aya iti dayta? Karamankayo aya kadagiti rinibu a nagadal iti dua a lawas a Pioneer Service School? Nalabit ad-adun ti makapagpayunir ken makualipikar nga agadal iti daytoy nga eskuelaan gapu iti napabassit nga oras a makalikaguman kadagiti regular pioneer. Ti dua a bulan a Ministerial Training School, a maang-angay itan kadagiti kangrunaan a pagsasao iti intero a lubong, tultulonganna dagiti awanan assawa a panglakayen ken ministerial nga adipen a mangibaklay iti daddadakkel a teokratiko a responsabilidad. Regular nga umawat dagiti amin a panglakayen ken ministerial nga adipen iti naisangsangayan nga instruksion iti Kingdom Ministry School.
3 Maus-usar dagiti pasilidad ti Watchtower Educational Center idiay Patterson, New York, a pakaangayan ti tallo a naisangsangayan nga eskuelaan a mangipaay iti nangatngato a tukad ti teokratiko a pannakasanay. Ti lima a bulan a kurso ti Watchtower Bible School of Gilead isaganana dagiti ministro para iti trabaho a panagmisionero kadagiti sabali a pagilian. Dagiti miembro ti Branch Committee iti intero a lubong tabunuanda ti dua a bulan a kurso maipapan iti pannakaorganisar ti sanga. Idi Mayo 1999, nangrugi ti baro a dua a bulan a kurso para kadagiti agdaldaliasat a manangaywan iti klase a buklen ti 48 nga estudiante manipud iti Estados Unidos ken Canada. Pagangayanna, umawat dagiti amin nga adipen ni Jehova iti nagsasayaat a gunggona manipud iti panangsanay nga ipapaay ni Jehova babaen kadagitoy a nadumaduma nga eskuelaan.
4 Masursuruan Para iti Ania a Panggep? Kinuna ti maysa a miembro ti Bagi a Manarawidwid: “Ti agdama a programatayo a panangisuro ket nairanta a tumulong kadagiti amin a tattao ni Jehova iti sadinoman tapno rumang-ayda iti kinanataengan a kas ti nadeskribir iti Proverbio 1:1-4.” Sapay koma ta tunggal maysa kadatayo ket agtultuloy nga ipaayan ni Jehova iti “dila dagiti nasursuruan.”—Isa. 50:4.