Kitkitaenyo Laeng Aya ti Makinruar a Langa?
1 Bayat a mangasabatayo iti publiko, mabalin nga agsarimadengtayo a mangiburay iti naimbag a damag iti dadduma a tattao gapu iti damo nga impresiontayo kadakuada. Kas pagarigan, aniat’ reaksionyo no adda narungsot ti panaglanglangana a lalaki a kanayon a naatap ti panagkitkitana kadakayo no sarungkaranyo ti kaarrubana a nangipakita iti interes iti kinapudno? Ti payunir a sister a makinkapadasan iti daytoy inkeddengna nga asitgan ti lalaki ket kasaritana. Nasabrak ti panangkablaawna iti sister. Ngem nakaskasdaaw ta dimngeg ti lalaki iti mensahe ti Biblia ken adda panaggagarna nga immanamong nga agadal. Gapu ta saan a kinita ti sister ti makinruar a langa, naipaayan daytoy a lalaki ken ti asawana iti gundaway a mangammo iti kinapudno.
2 Maysa pay a sister ti napabutngan idi damo gapu iti makinruar a langa ti agtutubo a lalaki nga atiddog ti buokna ngem intultuloyna a kinasabaan iti apagbiit tunggal umay iti paglakuan a pagtartrabahuanna. Nasayaat ti imbunga ti panagreggetna, ket nabautisaranen dayta nga agtutubo a lalaki a kas maysa a Saksi. Aniat’ manglapped kadatayo tapno saantay a dagus nga ipagarup a di mangipangag ti kakasta a tattao?
3 Panangtulad iti Ulidan ni Jesus: Ammo idi ni Jesus nga itedna ti biagna para iti isuamin. Gapuna, saan a naupay iti makinruar a langa dagiti sabsabali. Nabigbigna nga uray dagidiay dakes ti reputasionda ket nalabit situtulokda nga agbalbaliw no maipaayan iti umiso a tulong ken pakatignayan. (Mat. 9:9-13) Inkagumaanna a tulongan nga agpadpada dagiti nabaknang ken napanglaw. (Mat. 11:5; Mar. 10:17-22) Sapay koma ta ditay ukomen dagiti tattao a madanontayo iti ministerio gapu laeng iti makinruar a langada, a saantayon a kitaen ti nalabit nasayaat a kasasaad ti pusoda. (Mat. 7:1; Juan 7:24) Aniat’ makatulong kadatayo a mangtulad iti naisangsangayan nga ulidan ni Jesus?
4 Babaen ti panagadaltayo iti Biblia, nabigbigtayo nga adda bileg ti Sao ti Dios a mangbalbaliw iti panagpampanunot, kondukta, ken personalidad ti maysa a tao. (Efe. 4:22-24; Heb. 4:12) Gapuna, kanayon koma a positibotayo a mangasaba ket ipabiangtayon ti dadduma a bambanag ken ni Jehova, Daydiay makabasa iti puso ti tattao.—1 Sam. 16:7; Ara. 10:34, 35.
5 Sapay koma ta makatulongtayo iti naindaklan a panagani kadagitoy maudi nga al-aldaw babaen ti awan panangidumdumana a panangiranudtayo iti naimbag a damag kadagiti amin a kita ti tattao, aniaman ti makinruar a langada.—1 Tim. 2:3, 4.