Ti Nasakbay a Panagsagana Mangyeg iti Rag-o
1 Napalalo a rag-o ti iyeg kadatayo ti pannakiraman iti tay-ak ti ministerio. (Sal. 89:15, 16) Siempre, nasken ti panagsagana tapno mapasarantayo a naan-anay dayta a rag-o. No nasaysayaat ti panagsaganatayo, ad-adu ti magapuanantayo, ket no ad-adu ti magapuanantayo, ad-adda met ti rag-otayo.
2 Usarenyo Dagiti Naipaay nga Alikamen: Rugianyo ti agsagana babaen ti panangbasa ken panangusig iti material nga adda iti Ministeriotayo iti Pagarian. Masansan a mangipaay dayta kadagiti presentasion a naisagana a naimbag ken nairanta a tumulong kadakayo a mangipresenta iti mensahe ti Pagarian a silalaka ken sieepektibo. Makasarakkay kadagiti pagarigan no kasanoyo a mapagballigian dagiti gagangay nga isusupiat. Addada naisingasing nga espesipiko a kapanunotan no kasano ti agsarungkar nga epektibo, buyogen ti kalat a panangirugi iti panagadal iti Biblia. Nawayakayo a mangibagay kadagitoy a singasing agingga a makitayo a naannayasen ti panangusaryo kadagita. Malaksid iti daytoy, addaankayo iti libro a Panakirinnason, a mangipaay iti nadumaduma nga introduksion ken pangsungbat kadagiti panggupedda iti saritaan, iti kasta matulongandakayo nga agbalin nga ad-adda nga epektibo iti adu kadagiti situasion a pakaipasanguanyo.
3 Sukimatenyo ti publikasion nga itukonyonto, ket mangpilikayo iti maysa wenno dua a punto a makapainteres unay a mabalinyo nga ipakita iti bumalay. No adda makapainteres a damag a nangngeg wenno nabasayo, nalabit mausaryo dayta a pangirugi iti saritaan. Panunotenyo a nasaksakbay dagiti gagangay nga isusupiat a mabalin a pakaipasanguanyo, ket mangpanunotkayo iti sumagmamano a banag a mabalin a pangsungbatyo. Kalpasanna ensaywenyo iti sumagmamano a minuto no aniat’ ibagayo iti bumalay.
4 Kanayon a Tabunuanyo ti Gimong iti Serbisio: Agimdeng a naimbag iti Gimong iti Serbisio bayat a mausig, marepaso, ken maidemostra dagiti singasing a naidatag iti Ministeriotayo iti Pagarian. Imutektekanyo dagiti ideya a pagarupenyo a mabalin nga iraman iti presentasionyo. Lagipenyo ti sumagmamano kadagiti gagangay a situasion a nakaipasanguanyo iti ministerio, ket mangpanunotkayo kadagiti pamuspusan tapno ad-adda nga epektibo ti panangasabayo. Pakisaritaanyo dagitoy iti dadduma nga agibumbunannag sakbay ken kalpasan ti gimong.
5 Masiguradoyo a no ‘sisasagana[kayo] a maipaay iti tunggal naimbag nga aramid,’ masupapakankayto iti dakdakkel a rag-o ken balligi iti panangtulong kadagiti sabsabali a mangbirok iti dalan nga agturong iti biag.—2 Tim. 2:21.