Sekular nga Edukasion ken Dagiti Naespirituan a Kalatyo
1 Ti pananggun-od iti nasayaat a pamunganayan nga edukasion kabayatan ti kinaubingyo ket mangipaay iti akademiko a paglaingan a kasapulan tapno makabasa ken makapagsuratkayo a naimbag ken tapno adda pamalatpatanyo iti geograpia, historia, matematika, ken siensia. Kabayatan ti panageskuela, masursuroyo ti agpanunot a silalawag, manganalisar kadagiti impormasion, mangrisut kadagiti problema, ken mangpataud kadagiti nabagas a kapanunotan. Pagimbaganyonto iti intero a panagbiagyo ti kasta a panageskuela. Aniat’ pakainaigan ti sekular nga edukasionyo no maipapan kadagiti naespirituan a kalatyo iti biag ken kasano a makatulong dayta kadakayo a manggun-od iti “natarnaw a kinasirib ken kinaannad”?—Prov. 3:21, 22.
2 Mausarkay Koma iti Serbisio ti Dios: Bayat nga ages-eskuelakayo, agimdengkay a naimbag iti klase ken ikagumaanyo nga aramiden dagiti homework-yo. No nalaingkayo nga agbasa ken agadal, nalaklakayo a masukimat ti Sao ti Dios ket makapagtalinaedkayo a nabileg iti naespirituan. (Ara. 17:11) Ti nalawa a pannakaammo tulongannakayo a makilangen kadagiti tattao a masarakanyo iti ministerio a nagduduma ti kasasaadda iti biag, nagduduma ti paginteresan, ken pammatida. Ti edukasion a magun-odyo iti eskuelaan ket mausaryonto bayat nga ibaklayyo dagiti Nakristianuan a rebbengenyo iti organisasion ti Dios.—Idiligyo ti 2 Timoteo 2:21; 4:11.
3 Sursuruenyo a Suportaran ti Bagiyo: No igaedyo ti agadal, masursuroyo met dagiti laing a makatulong iti panagbirok ti pagbiag kalpasan ti panagturpos. (Idiligyo ti 1 Timoteo 5:8.) Pilienyo a naimbag dagiti asignaturayo. Imbes nga ipamaysayo iti kurso a mangparigatto kadakayo nga agbirok iti pagtrabahuan, panunotenyo ti agadal iti trabaho wenno paglaingan a makatulongto kadakayo nga agbirok iti mayanatup a pagsapulan iti sadinoman. (Prov. 22:29) Ti kasta a panagsanay tulongannakayto a mangsuportar iti bagiyo inton ikeddengyo ti agserbi iti lugar nga ad-adda nga agkasapulan.—Idiligyo ti Aramid 18:1-4.
4 Ti pananggun-od iti nasayaat a pamunganayan nga edukasion kabayatan ti panageskuela ket matulongannakayo a mangpalawa iti ministerioyo. Ikagumaanyo ti maaddaan kadagiti paglaingan a kasapulan tapno masuportaranyo ti bagiyo bayat nga umabantekayo iti serbisio ni Jehova. Iti kasta, matulongannakayto ti panageskuelayo a mangragpat kadagiti naespirituan a kalatyo.