Ania ti Ibagayo iti Maysa a Muslim?
1 Adda kadin nakasabaanyo a Muslim? No kasta, nalabit naammuanyo a nasged ti pammati dagiti Muslim iti Dios. Nupay kasta, bassit ti ammoda maipapan iti um-umayen a Paraiso ditoy daga a kas impadto dagiti propeta ni Jehova, ket kayattayo nga iburay dayta a namnama kadakuada. (1 Tim. 2:3, 4) Ti sumaganad nga impormasion matulongannakayo tapno makasabaanyo ida a naimbag.
2 Mamati dagiti Muslim ken ni Allah, wenno Dios, ket patienda a propeta ti Dios ni Muḥammad. Ti Koran ti nasantuan a libroda, ken maawagan ti relihionda iti Islam, a kayatna a sawen “panagpasakup.” Kuna ti Koran a dakes ti agulbod ken agrukbab kadagiti didiosen, a maymaysa ti Dios, ken saan a paset ti Trinidad. Kasta met, isursurona ti imortalidad ti kararua, umap-apuy nga impierno, ken nailangitan a paraiso. Admitiren dagiti Muslim a Sao ti Dios ti Biblia ngem mamatida a nabaliwanen, idinto ta ti Koran ket nagtalinaed iti orihinal a pagsasao, a saan a nalalaokan.
3 Mannakigayyem, Nataktika, ken Mannakaawatkayo Koma: No kasarsaritayo ti maysa a Muslim, mannakigayyem ken nataktikakayo koma. (Prov. 25:15) Laglagipenyo a natibker ti pannakairamutna dagiti patpatien ti Muslim ken kaaduan kadagita ti naadal babaen iti rutina. Gapuna, ti panangutob kadagiti narelihiosuan a pannursuro ken panangammoda a mismo iti pagayatan ti Dios ket saan a paset ti naespirituan a panagrang-ayda. (Roma 12:2) Tapno matulongan dagiti Muslim, nasken ti anus ken pannakaawat.—1 Cor. 9:19-23.
4 Dikay agus-usar iti sasao a pangipagarupan ti Muslim a pasetnakayo ti Kakristianuan. Ibatadyo nga awan pakainaiganyo iti relihion a Katoliko wenno Protestante, a naidumakayo. Tukoyenyo ti Biblia a Libro ti Dios. Yantangay di kayat dagiti Muslim ti sao nga “Anak ti Dios,” gagangay a nasaysayaat a saan nga usaren dayta wenno di pagsarsaritaan daytoy a tema agingga a rumang-ay iti naespirituan. Nupay kasta, mabalinyo a dakamaten ni Jesus, nga awaganyo iti propeta wenno mensahero. Dikay makisupiat. No madlawyo a mangrugin nga agpungtot, dagdagusenyo ti pumanaw a sidadayaw.
5 Kasayaatan a makisaritakayo a maymaysana, saan nga iti grupo. Gagangay a nasaysayaat no babbai ti mangasaba kadagiti babbai, ket lallaki kadagiti lallaki. Siempre, saan a kanayon a maitutop ti kastoy, ngem kasapulan ti panagmasirib. Kasta met, adu ti Muslim a masuron iti ibilbilangda a di natakneng a panagkawkawes ken panaglanglanga dagiti babbai. Nasken a sipapanunot iti daytoy dagiti kakabsat a babbai.—1 Cor. 10:31-33.
6 Dagiti Banag a Pakisaritaan: Sawenyo a sipaprangka ti maipapan iti kinadayag ti Dios ken iti ayatna. Dikay bumdeng a mangibaga a mamatikayo unay iti Dios, a maymaysa ti Dios (saan a Trinidad), ken dakes ti agrukbab kadagiti didiosen. Dakamatenyo ti maipapan iti kinadakes ditoy lubong itatta—gubgubat, sibil a riribuk, panagbibinnusor iti puli, ken ti panaginsisingpet a nabatad kadagiti adu a relihioso a tattao.
7 Ti broshur a The Guidance of God—Our Way to Paradise ipaayannakayo iti kanayonan a pannakaawat kadagiti topiko a mausar a pangirugi iti pannakisarita kadagiti Muslim. Nadisenio dayta a mangguyugoy kadagiti Muslim nga agnanaed iti lugar nga ammoda nga adda wayawayada nga agadal iti Biblia. Bassit ti abastotayo a broshur iti sanga nga opisina ket mangnamnamatayo a dandanin sumangpet ti ad-adu.
8 Kas panangipresentar, mabalinyo a kunaen:
◼ “Ikagkagumaak ti makisarita kadagiti Muslim. Addadan nabasak maipapan iti relihionyo ket panagkunak saanak nga agbiddut no ibagak a mamati dagiti Muslim iti maymaysa a pudno a Dios ken kadagiti amin a propeta. [Palubosanyo a sumungbat.] Kayatka a kasarita maipapan iti nagkauna a padto a mangibagbaga nga agbalinto a paraiso ti daga. Mabalin kadi nga ibasak kenka ti insurat ti propeta? [Basaenyo ti Isaias 11:6-9.] Gapu iti daytoy a padto pampanunotek ti sasao a naadaw iti Koran a masarakan iti daytoy a broshur.” Luktanyo iti panid 9 ti broshur a Guidance of God, ket basaenyo ti naadaw a sasao a naisurat iti napatak a letra maipapan kadagiti nalinteg a mangtawid iti daga. No aginteres, ituloyyo ti saritaan babaen ti panangusig iti parapo 7 agingga iti 9 iti bangir a panid. Ibatiyo ti broshur, ket iyurnosyo ti isasarungkar.
9 No awisenyo ti maysa a mangusig iti broshur a Guidance of God, nasaysayaat no awaganyo dayta a panagsarita, saan a panagadal iti Biblia. No mairingpasyo dayta a broshur, nakasagana koman ti estudiante a mangadal iti broshur a Kalikaguman wenno ti libro a Pannakaammo. Ti dadduma pay a publikasion a nangnangruna a nairanta kadagiti Muslim ket ti tract a How to Find the Road to Paradise ken ti bokleta a The Time for True Submission to God.
10 Babaen iti daytoy a pannakaammo maipapan kadagiti patpatien ti Islam ken no ania dagiti makasair kadakuada, maibagaytayo dagiti literatura nga itukontayo kadagiti Muslim ken ti wagas a panangasabatayo kadakuada. Sapay koma ta itultuloy a bendisionan ni Jehova ti panangikagumaantayo a mangtulong iti amin a kita ti tattao tapno umawagda iti naganna ket maisalakanda.—Ara. 2:21.