Usarenyo Dagiti Tract a Pangirugi iti Saritaan
1 Dikay kadi umanamong nga agpannuray ti epektibo a panangasaba kangrunaanna iti panagreggetyo a mangirugi iti saritaan? Ti karit isu ti panangisawang iti makatukay iti interes ti maysa a tao ken mangawis kenkuana a makisarita. Ngem kasano a sieepektibo a maaramid daytoy?
2 Natakuatan ti adu nga agibumbunannag a mabalin nga irugi ti saritaan babaen ti sumagmamano a maitutop a sasao ken panangitukon iti maysa kadagiti naibatay-Biblia a tract-tayo. Makaguyugoy dagiti paulo, ken nabiag ken makaawis dagiti ilustrasion. Ti tract dina gabsuonan ti maysa a tao iti adu nga impormasion. Kaskasdi, makapainteres ken mabalin nga usaren iti panagadal iti Biblia ti ababa a mensahe a linaon dagiti tract.
3 Kastoy ti kapanunotan ti maysa a Saksi: “Iti daytoy lubong nga adu ti aramiden, masansan a di kayat dagiti tao ti mangbusbos iti adu a tiempo nga agbasa, ngem kalalainganna ti kaatiddog ti napateg a mensahe a linaon dagiti tract, isu a maiwayaan a basaen dagiti tao. Naammuak ti kinapudno babaen ti panangbasak iti adu a tract.” Pulos a ditay koma tagibassiten ti bileg ti Sao ti Dios kas nailawlawag kadagitoy ababa, naimaldit a mensahe.—Heb. 4:12.
4 Uppat a Nalaka nga Addang: Adu ti nagballigi babaen ti panangusarda iti simple a pamay-an. (1) Ipakitayo iti tao a kapatpatangyo ti sumagmamano a tract ket damagenyo no ania kadagita ti paginteresanna. (2) No nakapilin, mangibangonkayo iti nasayaat pannakaisaganana a saludsod a mangitampok iti napateg a punto iti tract. (3) Kas sungbat iti saludsod, mangibasakayo iti maitutop a parapo wenno kasuratan iti tract. (4) No interesado, ituloyyo a pagsaritaan ti linaon ti tract wenno iturongyo ti atensionna iti maysa a leksion iti broshur a Kalikaguman wenno kapitulo iti libro a Pannakaammo a mangipaay iti kanayonan a komento. Iti kastoy a pamay-an, mabalin a makairugikayo a dagus iti panagadal iti Biblia. Tulongannakayo dagiti sumaganad a singasing a mangisagana iti ibagayo babaen ti panangusaryo iti uppat kadagiti tract.
5 Mabalin nga idatag a kas saludsod ti paulo ti tract a “Sino a Talaga ti Agturay ti Lubong?”:
◼ No “Dios” wenno “Diak ammo” ti sungbat ti tao a kasasaoyo, basaenyo ti umuna a dua a sentensia iti panid 2 ken ti umuna a parapo iti panid 3. Itampokyo ti 1 Juan 5:19 ken Apocalipsis 12:9. Pagduaduaanna man wenno saan ti kaadda ni Satanas a Diablo wenno bigbigenna ti impluensiana iti lubong, mabalinyo nga usaren a makirinnason ti subtitulo a “Pangripiripan Kadagiti Kasasaad ti Lubong” tapno maituloy ti saritaan. No interesado, ilawlawagyo no sadino ti nagtaudan ti Diablo, nga usarenyo dagiti punto iti panid 3 ken 4 ti tract.
6 Mabalin a mangtukay a dagus iti interes ti tract nga “Aniat’ Namnama Kadagiti Ing-ingungoten a Natayen?” Mabalinyo a rugian ti saritaan babaen ti panangisaludsod iti kastoy:
◼ “Iti panagkunayo makitatayto pay ngata dagiti pimmusay a patpatgentayo?” Kalpasan ti isusungbatna, ipakitayo ti maikadua a parapo iti panid 4 ti tract sayo basaen ti Juan 5:28, 29. Kalpasanna ilawlawagyo a makatulong ti panangtarus iti impormasion iti umuna a subtitulo ti tract. Ibagayo a kayatyo a pagsaritaan a dua dayta.
7 Makaawis kadagiti pamilia ti tract a “Tagiragsakenyo ti Biag ti Pamilia.” Iti panangusaryo iti dayta, mabalinyo a kunaen:
◼ “Nalabit umanamongkayo a maat-atakar ita ti pamilia. Ania ti panagkunayo a mangpalagda iti singgalut ti pamilia?” Kalpasan ti isusungbatna, iturongyo ti atensionna kadagiti punto iti umuna a parapo iti panid 6. Mangpilikayo iti maysa kadagiti kasuratan a naadaw iti panid 4 ken 5 ti tract, sayo ilawlawag ti kaipapananna. Kalpasanna itukonyo ti libre a panagadal iti Biblia iti pagtaengan.
8 Mabalinyo nga usaren ti tract a “No Apay a Mapagtalkanyo ti Biblia” babaen ti kastoy a presentasion:
◼ “Nangnangngegen ti kaaduan a tattao ti pakasaritaan da Cain ken Abel a masarakan iti umuna a libro ti Biblia. Nadakamat met iti salaysay ti Genesis nga adda asawa ni Cain. Inut-utobyo kadin no nangalaanna iti asawana?” Usarenyo ti maudi a parapo iti panid 2 ti tract a pangsungbat iti dayta. Ilawlawagyo a salaysayen met ti tract dagiti napateg nga ibagbaga ti Biblia maipapan iti masanguanan. Mangrugi iti maikatlo a parapo iti panid 5, ituloyyo ti saritaan, nga usarenyo dagiti pangsuporta a kasuratan.
9 Nabayagen a napaneknekan nga epektibo a panangiparang iti naimbag a damag ti panangiwaras kadagiti tract a naibatay iti Biblia. Gapu ta nalaka nga itugot iti sadinoman a papananyo, mabalinyo nga usaren dagitoy a sieepektibo iti panagbalaybalayyo ken iti di pormal a panangasaba. Napateg ti paset dagiti tract iti panangitungpal iti ministeriotayo. Siguraduenyo ti mangitugot iti nadumaduma a tract, ket patinayon nga usarenyo dagitoy a pangirugi iti saritaan.—Col. 4:17.