“Babbai nga Agtartrabaho a Sipipinget iti Apo”
1 Babaen kadagita a sasao, dineskribir ni Pablo da Trifena ken Trifosa, dua a nagaget a kakabsat a babbai iti kongregasion ti Roma. Ti maysa pay, maipapan ken ni Persida, kinunana: “Nangaramid kadagiti adu a panagbannog iti Apo.” Nagsayaat met ti panangdakamatna ken Febe kas “manangikanawa kadagiti adu.” (Roma 16:2, 12) Iti Kasuratan, nadakamat ni Dorcas nga “aduan kadagiti naimbag nga ar-aramid ken kadagiti sagut ti asi.” (Ara. 9:36) Anian a bendision dagiti naespirituan a babbai iti kongregasion!
2 Ap-apresiarentayo kadi dagiti kakabsat a babbai nga agtartrabaho a sipipinget iti kongregasiontayo? Isuda ti mangar-aramid iti kadaklan a paset ti trabaho a panangasaba, kaaduan a panangyadal iti Biblia, ken tultulonganda ti adu kadagiti kabbaro. Adu met a tiempo ti us-usarenda iti panangtulong kadagiti ubbing a rumang-ay iti naespirituan. Ar-aramiden dagiti Kristiano a babbai ti pasetda iti panangparayray iti espiritu ti ayat, rag-o, talna, ken regta iti kongregasion. Iti adu a wagas, situtulokda a sumuporta tapno ad-adu ti maaramidan dagiti assawada ken dadduma pay a kameng ti pamilia a panagserbi ken Jehova.
3 Dagiti Kakabsat a Babbai iti Amin-Tiempo a Serbisio: Karaman dagiti misionera kadagidiay agtartrabaho a sigaganetget iti Apo, nga adu ti makiramraman tapno maidur-as ti trabaho kadagiti sabali a pagilian. Kadagiti kongregasion a pagserserbian dagiti assawada, okupado iti tay-ak ti ministerio ti assawa dagiti agdaldaliasat a manangaywan, a mangparparegta iti adu a kakabsat a babbai. Ditay koma liplipatan dagiti kakabsat a babbai idiay Bethel, a naregta a mangar-aramid iti sagrado a serbisio kas panangsuporta iti organisasion ni Jehova. Ken babaen ti matalek a panangikagumaan dagiti regular pioneer a kakabsattayo a babbai a mangidayaw iti Dios, rinibu ti matultulonganda a mangammo iti kinapudno.
4 Napalalo a pannakapnek ti magun-od dagitoy a matalek a babbai gapu iti kinamanagsakripisioda. (1 Tim. 6:6, 8) Maikarida iti komendasion ken aniaman a pammaregta ken suporta a maipaaytayo kadakuada.
5 Nakapatpateg dagiti Kristiano a babbai iti organisasion ni Jehova, a mangipapaayda iti matalek a serbisio a pakabendisionan ti isuamin. Sapay koma ta itultuloytayo nga apresiaren dagita a babbai ken ikarkararagtayo ti pamendision ni Jehova kadakuada bayat nga itultuloyda ti “agtartrabaho a sipipinget iti Apo.”