Saludsod
◼ Siasino ti rumbeng a mangikararag kadagiti gimong ti kongregasion?
Napateg a paset ti panagdayawtayo ti kararag iti kongregasion. Napateg a pribilehio ken nadagsen a responsabilidad ti mangibagi kadagiti sabsabali iti imatang ni Jehova. Gapu iti kinapateg dayta, nasken nga agmasirib dagiti panglakayen a mangeddeng no siasinoda a kakabsat ti kualipikado a mangikararag kadagiti gimong. Dagiti bautisado a kakabsat a lallaki a mangibagi iti kongregasion ket rumbeng a nataengan a Kristiano a ministro a pagaammo kas nasasayaat a pagulidanan ken raraemen ti kongregasion. Dagiti nadayaw ken napnuan iti panagraem a kararagda ipalgakna koma nga adda nasayaat a relasionda ken Jehova a Dios. Ti artikulo a “Panagkararag iti Imatang Dagiti Dadduma a Buyogen ti Napakumbaba a Puso” iti Mayo 15, 1986, a ruar ti Pagwanawanan dakamatenna dagiti napateg a prinsipio a nangnangruna a makatulong kadagidiay mangikararag iti publiko a mangibagi iti kongregasion.
Saan a pangikararagen dagiti panglakayen ti maysa a kabsat nga am-ammoda nga addaan iti mapagduaduaan wenno di nasayaat a kababalin. Saan a mangikararag ti maysa a kabsat a nalaka a masasair wenno adda pagannayasanna a mangusar iti publiko a kararag tapno agibutaktak kadagiti personal a di pagkikinnaawatan. (1 Tim. 2:8) Uray pay nabautisaranen ti maysa a tin-edyer a kabsat a lalaki, nasken a tingitingen dagiti panglakayen no nataenganen iti naespirituan tapno mangikararag iti kongregasion.—Aramid 16:1, 2.
Kadagiti taripnong para iti panagserbi idiay tay-ak, no dadduma mabalin a kasapulan ti bautisado a kabsat a babai a mangikararag no awan kualipikado a kabsat a lalaki a mangibagi iti grupo. Masapul nga agusar iti maitutop a dalungdong. No nalablabit awanto ti kualipikado a kabsat a lalaki kadagiti taripnong para iti serbisio, mangdutok koma dagiti panglakayen iti kualipikado a kabsat a babai a mangidaulo.
Kadawyan a ti tserman ti Palawag Publiko ti mangipaay iti panglukat a kararag. Nupay kasta, kadagiti dadduma a gimong ti kongregasion, no adu ti kualipikado a kakabsat a lallaki, mabalin a sabali a kabsat ti maayaban a mangikararag kadagiti panglukat wenno pangserra a kararag imbes a daydiay kabsat a mangilukat iti gimong wenno daydiay addaan iti maudi a paset. Aniaman ti kasasaad, mapakaammuan koma a nasaksakbay ti kabsat a madutokan a mangikararag iti gimong ti kongregasion tapno mapanunotna no ania ti ibagana. Iti kasta, makaipaay iti naurnos, napasnek a kararag a maitutop iti dayta a partikular a gimong.
Saan a masapul nga atiddog dagita a kararag. No mangikararag ti maysa a kabsat iti publiko, masansan a nalaklaka a matarusan no agtakder, umdas ti kapigsa ti bosesna, ken agsao a silalawag. Iti kasta, mangngegan amin a dimmar-ay dayta a kararag ket maibagada ti naimpusuan nga “Amen!” iti ngudo ti kararag.—1 Cron. 16:36; 1 Cor. 14:16.