“Maaramid Koma ti Isuamin a Bambanag a Maipaay a Pakapabilgan”
1 Iti pannakilangen kadagiti kakabsattayo, aramidentay koma ti naimbag tapno mapabilegda. Kaipapanan daytoy ti pannakaseknantayo a mangsalaknib iti naespirituan a pagimbaganda. No addaantayo iti sekular a trabaho a mainaig iti panangyam-ammo iti maysa a produkto wenno serbisio, masapul nga annadantayo nga awan koma ti aramidentayo a pakaitibkolan dagiti kakabsattayo.—2 Cor. 6:3; Fil. 1:9, 10.
2 Adda sumagmamano a nakiraman iti nadumaduma a di natalged a negosio, a matmatanda dagiti padada a Kristiano kas potensial a parokiano. Addada agtagtagilako nga organisasion a mangiparegta kadagiti ahenteda a matmatanda ti tunggal maysa kas potensial a parokiano—agraman dagidiay kapammatianda. Nangorganisar ti dadduma a kakabsat kadagiti dadakkel a taripnong dagiti Saksi tapno paregtaenda ida a makiraman iti negosio. Iyam-ammo dagiti dadduma ti negosioda babaen ti panagiwarasda kadagiti di nakiddaw a pagbasaan, broshur, impormasion iti Internet, wenno tape kadagiti kapammatianda. Umiso kadi nga usaren ti maysa a Kristiano dagiti nateokratikuan a relasionna tapno gundawayanna dagiti naespirituan a kakabsatna? Saan!—1 Cor. 10:23, 24, 31-33.
3 Agannad Koma Dagiti Kakabsat: Dina kayat a sawen a di mabalin a makinegosio ti Kristiano iti maysa a kabsat. Personal a banag dayta. Nupay kasta, addada dagidiay mangyussuat kadagiti negosio a mangiparparegta iti kinaagum, ket gutugotenda dagiti kapammatianda a makisosio kadakuada wenno agpuonan. Adu kadagitoy a negosio ti malugi, ket dakkel a kantidad ti mapukaw dagiti agnegosio. Nupay mabalin a naallukoy dagidiay a nakisugpon iti negosio gapu iti tarigagayda a makaganansia a dagus, saan koma nga ipapan ti nangorganisar a saanen a mapabasol no malugi ti negosio. Panunotenna koma a nasakbay no kasano a maapektaran ti naespirituan ken pisikal a kasasaad dagiti kakabsatna no kas pagarigan ta di agballigi ti negosio. Nangnangruna koma nga agannad dagidiay addaan kadagiti teokratiko a rebbengen no maipapan kadagiti sekular a trabahoda agsipud ta pagraraeman ken pagtalkan unay ida dagiti sabsabali. Di umiso a gundawayan dayta a panagtalek. Mabalin a mapukaw dagiti pribilehio iti sagrado a serbisio no mapukaw ti maysa a kabsat ti panagtalek dagiti sabsabali.
4 Ti kalattayo ket “maaramid koma ti isuamin a bambanag a maipaay a pakapabilgan.” (1 Cor. 14:26) Masapul a liklikantayo ti aniaman a panangyam-ammo kadagiti negosio iti uneg ti kongregasion wenno ti panangiparegta kadagita. Awan pakainaigan dagita kadagiti Nainkasuratan a rason ti panagtataripnongtayo.—Heb. 10:24, 25.