“Ti Sao a Naisao iti Umiso a Tiempo”
1 Maysa kadi a karit kadakayo ti panangiranud iti mensahe ti biag kadagiti sabsabali? Mariknayo aya a masapul a makaibagakayo iti nabagas a sasao a mangpasiddaaw kadagiti dumdumngeg kadakayo? Kinuna ni Jesus idi imbaonna dagiti adalanna: “Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” (Mat. 10:7) Ti mensahe ket saan a komplikado ken nalaka nga iranud. Kasta met la ita.
2 Masansan a kasapulan laeng ti sumagmamano a sasao tapno mairugi ti saritaan. Idi naam-ammo ni Felipe ti eunuko a taga Etiopia, insaludsodna: “Ammom kadi nga agpayso no ania ti basbasaem?” (Aramid 8:30) Anian a makagunggona a saritaan ti nagbanagan “ti sao a naisao iti umiso a tiempo”!—Prov. 25:11.
3 Mabalinyo nga usaren ti umasping a pamay-an iti ministerioyo. Kasano? Babaen ti panangpaliiw ken panangpili iti sasao a mayanatup iti kasasaad. Agsaludsodkayo, ket denggenyo ti sungbat.
4 Sumagmamano a Napateg a Salsaludsod: Tapno mairugi ti saritaan, mabalinyo a padasen ti aniaman kadagitoy a saludsod:
◼ “Us-usarenyo kadi ti Kararag ti Apo (wenno, ti Amami) iti panagdayawyo?” (Mat. 6:9, 10) Ibagayo ti maysa a paset, sa kunaenyo: “Isalsaludsod ti dadduma, ‘Ania ti nagan ti Dios a kinuna ni Jesus a masantipikar (wenno, madaydayaw)?’ Adda met dagiti agsaludsod iti kastoy, ‘Ania ti Pagarian a kinuna ni Jesus a rumbeng nga ikararagtayo?’ Nakasarakkay kadin kadagiti makapnek a sungbat kadagitoy a salsaludsod?”
◼ “Pinampanunotyo kadin: ‘Ania ti kaipapanan ti biag?’” Ilawlawagyo a nainaig dayta iti pannakaammo iti Dios.—Ecl. 12:13; Juan 17:3.
◼ “Ti panagkunayo maawanto kadi ti ipapatay?” Usarenyo ti Isaias 25:8 ken Apocalipsis 21:4 a mangipaay iti mapagtalkan a sungbat.
◼ “Adda kadi simple a solusion iti riribuk ditoy lubong?” Ipakitayo nga isursuro ti Dios nga “ayatem ti padam a tao.”—Mat. 22:39.
◼ “Dumtengto ngata ti tiempo a dungparen ken dadaelen ti sabali a planeta wenno kometa ti dagatayo?” Iranudyo ti kari ti Biblia nga agtalinaed ti daga iti agnanayon.—Sal. 104:5.
5 Iparangyo ti naimbag a damag iti simple, direkta ken naayat a pamay-an. Bendisionan ni Jehova ti panagreggetyo a mangiranud iti uray “maysa a sao” ti kinapudno kadagiti sabsabali.