“Agsilnag Koma ti Silawyo”
1 Ti lubong nga adda iti aglawlawtayo ket nasipngetan iti moral ken naespirituan. Ti lawag ti kinapudno ibutaktakna dagiti “di nabunga nga ar-aramid” ti kinasipnget tapno maliklikantayo dagita a makapapatay a pakaitibkolan. Gapuna, indagadag ni apostol Pablo kadagiti Kristiano: “Itultuloyyo ti magna kas annak ti lawag.”—Efe. 5:8, 11.
2 Maisungani unay “ti bunga ti lawag” iti kinasipnget ti lubong. (Efe. 5:9) Tapno mapataudtayo daytoy a bunga, kasapulan nga agbalintayo a naisangsangayan nga ulidan iti Nakristianuan a panagbiag, dagiti kita ti tattao nga anamongan ni Jesus. Masapul met nga ipakitatayo dagiti galad kas iti kinanaimpusuan, kinapasnek, ken kinagagar maipaay iti kinapudno. Kasapulan a maiparangarang daytoy a bunga iti inaldaw a panagbiagtayo ken iti ministeriotayo.
3 Agsilnag iti Tunggal Gundaway: Kinuna ni Jesus kadagiti adalanna: “Agsilnag koma ti silawyo iti sanguanan ti tattao.” (Mat. 5:16) Kas panangtulad ken Jesus, pagsilnagentayo ti lawag ni Jehova babaen ti panangikasaba iti Pagarian ti Dios ken ti pangpanggepna. Sumilnagtayo kas silsilaw no sumarungkartayo kadagiti tattao iti pagtaenganda ken no ipakaammotayo ti kinapudno idiay pagtrabahuan, idiay eskuelaan, kadagiti kaarrubatayo, wenno sadinoman nga adda gundawaytayo.—Fil. 2:15.
4 Kinuna ni Jesus a dagiti dadduma kagurada ti lawag. (Juan 3:20) Gapuna, saantayo a maupay no agkedked ti kaaduan a masilnagan “ti lawag ti nadayag a naimbag a damag maipapan ken Kristo.” (2 Cor. 4:4) Mabasa ni Jehova ti puspuso dagiti tattao ket saanna a kayat a maitipon iti ilina dagiti agar-aramid iti kinakillo.
5 No surotentayo ti daldalan ni Jehova ken tagiragsakentayo ti naespirituan a lawag, mabalintay nga isilnag dayta kadagiti dadduma. No mabigbigda nga ‘ik-ikutantayo ti silaw ti biag’ babaen ti kababalintayo, mabalin a matignayda met nga agbalbaliw tapno agbalinda a kas silsilaw.—Juan 8:12.
6 No pagsilnagentayo ti lawagtayo, maidaydayaw ti Namarsua kadatayo ken matulongantayo dagiti napasnek a tattao a mangammo kenkuana ken maaddaan iti namnama a biag nga agnanayon. (1 Ped. 2:12) Yantangay adda kadatayo ti lawag, usarentayo dayta a pangtulong kadagiti dadduma tapno makaruarda iti naespirituan a kinasipnget ken makapataud iti ar-aramid a kukua ti lawag.