Nagannak—Isuroyo Kadagiti Annakyo Dagiti Nasayaat nga Ugali
1 Saan a naikasigudan wenno basta tumanor lattan dagiti nasayaat nga ugali. Imbes ketdi, masapul ti panawen tapno maisuro dagita kadagiti annak. In-inut ti panangisuro. Nasken nga agporsegi dagiti nagannak tapno ‘maitultuloyda a mapadakkel [dagiti annakda] iti disiplina ken panangiturong-panunot ni Jehova.’—Efe. 6:4.
2 Irugi Manipud Kinamaladaga: Nakaskasdaaw ti abilidad dagiti ubbing nga agadal ken agaramid kadagiti baro a banag. Nupay masansan a narigat para kadagiti nataengan ti agadal iti baro a pagsasao, dagiti di pay ages-eskuela nga ubbing kabaelanda a paggigiddanen a sursuruen ti dua wenno tallo a pagsasao. Diyo pulos panunoten nga ubing pay unay ti anakyo tapno sukayenna dagiti nasayaat nga ugali. No nasapa ken agtultuloy a maisuro kenkuana ti kinapudno a linaon ti Biblia, mapnonto ti isipna iti pannakaammo a ‘mamagsirib kenkuana maipaay ti pannakaisalakan’ bayat nga isut’ dumakdakkel.—2 Tim. 3:15.
3 Iruam iti Panangasaba: Ti makagunggona nga ugali a nasken a maisuro a nasapa iti ubing isu ti regular a panangikasaba iti naimbag a damag ti Pagarian ti Dios. Adu a nagannak ti nangirugi iti daytoy babaen ti panangikuyogda kadagiti annakda a mangasaba bayat a maladagada pay. Ti regular a pannakiraman dagiti nagannak iti trabaho a panangasaba tulonganna dagiti annakda a mangpatanor iti apresasion ken regta para iti ministerio ken maipakitada kadakuada no kasano ti mangasaba iti nadumaduma a benneg ti ministerio.
4 Makatulong met kadagiti ubbing ti pannakipasetda iti Teokratiko nga Eskuelaan ti Panagministro. Masursuroda dagiti nasayaat nga ugali iti panagadal ken ti panagbasa nga addaan pannakaawat. Masursuroda no kasano ti makisarita maipapan iti Biblia, agsarungkar, ken mangikondukta kadagiti panagadal iti Biblia. Ti kasta a panagsanay mabalin nga ituggodna ida nga agpayunir ken gumaw-at kadagiti dakdakkel a pribilehio iti serbisio. Adu a Bethelite ken misionero ti maragragsakan no malagipda dagiti damo a panagpasetda iti Teokratiko nga Eskuelaan ti Panagministro ket matmatanda dayta kas maysa a probision a nakatulong kadakuada a nangpatanor kadagiti nasayaat nga ugali.
5 Kaslatay amin pila iti ima ti Naindaklan a Managdamili, ni Jehova. (Isa. 64:8) Nalaklaka a sukogen ti pila bayat a nabasa pay. Ngem tumangken daytoy no mabaybay-an nga agmaga. Kasta met ti tattao. Bayat nga ub-ubingda, nalaklakada a maisuro. Ti panawen ti kinaganusda ket tiempo ti panagsursuro, a mangikeddeng no anianto ti pagbalinanda. Kas naayat a nagannak, rugianyo nga isuro kadagiti annakyo dagiti nasayaat nga ugali iti Nakristianuan a ministerio.