Mangsaksi kas Naimbag a Kaarruba
1 Kinuna ni Jesus: “Ayatem ti padam a tao [wenno kaarrubam] a kas iti bagim.” (Mat. 22:39) Awan duadua, ‘ar-aramidenyo ti naimbag’ kadagiti kapammatianyo, ngem mapalawayo kadi ti ayatyo kadagiti kaarruba? (Gal. 6:10) Kadagiti ania a pamay-an?
2 Babaen ti Panangyam-ammoyo iti Bagiyo: Ammo kadi dagiti kaarrubayo a Saksikayo? No saan pay, apay a dikay sarungkaran ida bayat ti panagserbiyo iti tay-ak? Mabalin a maklaatkayo iti ibungana! Wenno no nalaklaka para kadakayo, padasenyo a kasabaan ida nga impormal. No addakayo iti ruar, nalabit makitayo ida nga agtartrabaho iti paraanganda wenno magmagna iti kalsada. Asitganyo ida a nakaisemkayo. Ikagumaanyo a dakamaten ti pammatiyo, ti lugar ti Kingdom Hall, ken no ania ti maar-aramid sadiay, ken ibagayo no siasino pay dagiti kaarruba a tumabtabuno. Awisenyo ida a makigimong. Determinadokay koma a mangsaksi a naan-anay maipapan iti naimbag a damag iti isuamin nga am-ammoyo.—Ara. 10:42; 28:23.
3 Babaen ti Mapagulidanan a Kababalinyo: Ti nainggayyeman a kababalinyo adu ti maibagana maipapan kadakayo ken nalabit luktanna ti gundaway a mangsaksi. ‘Arkosanna [met] ti sursuro ti Dios.’ (Tito 2:7, 10) Ipakitayo ti pudpudno nga interes kadagiti kaarrubayo. Mannakigayyemkayo koma ken mannakaawat. Raemenyo ti karbenganda nga agmaymaysa ken maaddaan iti naulimek nga aglawlaw. No adda masakit kadakuada, anusan ken tulonganyo. No adda kabbaro a pamilia a makikaarruba, dagasenyo nga abrasaen. Dagita a kinaimbag ket mangibati iti paborable nga impresion ken makaay-ayo ken Jehova.—Heb. 13:16.
4 Babaen ti Itsura ti Sanikuayo: Ti panagbalin a nasayaat a kaarruba ramanenna ti panangasikaso iti pagtaenganyo tapno makaay-ayo. Makaipaay met iti pammaneknek ti nadalus ken makaatrakar a pagtaengan ken arubayan. Ngem ti narugit ken nakawarwara a pagtaengan ket makadadael iti mensahe ti Pagarian. Ngarud, nasken unay a pagtalinaeden a nadalus ken presentable ti pagtaengan, arubayan, ken luganyo.
5 Ti pannakaseknan kadagidiay adda iti ruar ti kongregasion Kristiano ipasimudaagna ti ayatyo kadagiti kaarrubayo. Ania’t mabalin a pagbanaganna? Posible a ti dadduma kadakuada ‘dayawenda ti Dios kas bunga ti nasayaat nga ar-aramidyo nga isuda ti saksi kadagita.’—1 Ped. 2:12.