Makapagserbikayo Kadi iti Lugar a Dakdakkel ti Pakasapulan?
1 Pinampanunotyo kadin ti umakar iti lugar nga agkasapulan iti ad-adu a manangiwaragawag iti Pagarian? No naawiskayo nga ‘umallatiw . . . ket tumulong,’ agtignaykayo kadi kas iti inaramid ni apostol Pablo? (Ara. 16:9, 10) Kadagiti adu a kongregasion, kasapulan dagiti pamilia a nataengan iti naespirituan, dagiti payunir a tumulong iti panangwanas iti teritoria, wenno dagiti kualipikado a panglakayen ken ministerial nga adipen a tumulong iti panangidaulo. Situtulokkay kadi nga agserbi tapno mapunnuan daytoy a pakasapulan? Kasano a makapagballigikayo iti dayta?
2 Kasapulan ti Pammati ken Panagtalek: Iti panangiturong ti Dios, pinanawan ni Abram ti ilina nga Ur ket nagdaliasat iti 1,000 a kilometro a nagturong idiay Haran a kaduana ti asawana, kaanakanna, ken ti lakayen nga amana a ni Tare. (Gen. 11:31, 32; Neh. 9:7) Kalpasan ti ipapatay ni Tare, binilin ni Jehova ti agtawenen iti 75 a ni Abram a panawanna ti Haran ken dagiti kabagianna ket agdaliasat nga agturong iti pagilian nga ipakita kenkuana ti Dios. Gapuna, da Abram, Sarai, ken Lot ‘rimmuarda a napan.’ (Gen. 12:1, 4, 5) Siempre, saan nga immakar ni Abram tapno agserbi iti lugar a dakdakkel ti pakasapulan kadagiti ministro. Ngem adda banag a kasapulan iti panagakarna. Ania dayta?
3 Kasapulan ni Abram ti pammati ken panagtalek tapno matungpalna dayta. Nasken a mabaliwan ti panagpampanunot ken wagas ti panagbiagna. Nasken a panawanna ti kinatalged nga ipapaay dagiti kabagianna. Ngem nagtalek iti panangtaripato ni Jehova kenkuana ken iti sangakabbalayanna. Adu ita ti nangiparangarang iti panagtalekda ken Jehova iti umasping a pamay-an.
4 Iyaakar Kadagiti Kongregasion nga Agkasapulan iti Tulong: Adu pay a kongregasion ditoy Pilipinas ti agkurang kadagiti panglakayen wenno ministerial nga adipen. No addakayo iti kongregasion nga aduan iti nataengan a kakabsat a lallaki ket kayatyo ti tumulong iti sabali a kongregasion iti sirkitoyo, ngarud nasayaat nga asitganyo ti manangaywan iti sirkitoyo. Kabesadona ti intero a sirkito ken dagiti pakasapulan ken maibagana no sadino a makatulongkayo. Masansan nga asitgan dagiti agdaldaliasat a manangaywan dagiti kakabsat a lallaki no ammoda nga adda panagkasapulan, ket no maasitgankayo, agboluntariokayo kadi a tumulong?
5 Dagiti Saan nga Agbayag nga Annongen: Napadasanyo kadin a tinagiragsak dagiti nabaknang a bendision gapu iti panagtrabaho kadagiti di naituding a teritoria, uray iti ababa laeng a tiempo? Iti saan pay a nabayag, dua kadagiti manangaywantayo iti sirkito ti nakapanunot a mangusar iti lawas ti panagpayunirda a mangbuangay kadagiti grupo dagiti situtulok a kakabsat a mangasaba kadagiti naiputputong a teritoria iti sirkitoda a saan a nawanwanas iti adun a tawen. Adda kadi nasayaat a nagbanaganna?
6 Maysa kadagitoy a manangaywan iti sirkito ti nangikuyog iti 35 a kakabsat a mangbisita kadagiti naiputputong a purok iti kabambantayan. Nagbalonda iti kanenda ket nagyanda iti sadinoman a mabalin bayat ti makalawas a panagwanas. Ti resultana? Nakasaoda dagiti tattao a di pay napnapanan dagiti Saksi iti nganngani 30 a tawen. Nakaipaimada iti 60 a libro, 186 a magasin, 50 a broshur, ken 287 a tract. Nakairugida met iti 74 a panangyadal iti Biblia. Ania ti narikna dagitoy a kakabsat? Kinuna ti manangaywan ti sirkito: “Ti kastoy a kita ti manmano a panangasaba pudno a pinatibkerna saan laeng a dagiti singgalut ti nainkabsatan nga ayatmi no di ket uray ti pammatimi ken Jehova.” Tallo a kakabsat ti naragsakan unay iti dayta nga uray la natignayda nga agaplikar kas regular pioneer.
7 Ti panangawat iti temporario nga annongen nga agserbi iti lugar a dakdakkel ti pakasapulan itungpalna ti sabali pay a panggep. Dagidiay mangaramid iti dayta makagun-odda iti napateg nga impormasion a mangtulong kadakuada a ‘mangpattapatta iti magastos’ iti iyaallatiw iti sabali a paset ti pagilian.—Luc. 14:28.
8 Iyaakar iti Lugar a Dakdakkel ti Pakasapulan: Determinado ni Jehova a maikasaba ti naimbag a damag “iti intero a mapagnaedan a daga” sakbay nga umay ti panungpalan. (Mat. 24:14) Gapu iti daytoy, situtulokkay kadi nga umakar uray iti ruar ti sirkitoyo a sadiay dakdakkel ti pakasapulan?
9 Retiradokayo kadi? Addaankayo kadi iti natalged a pagsapulan? No saan, makasapulkayo kadi iti bukodyo a pamastrekan? No saanyo a mabalin ti umakar, matulonganyo kadi ti maysa a miembro ti pamiliayo nga agserbi iti sabali a lugar?
10 No kalpasan ti nainkararagan a panangutobyo ket mariknayo a kabaelanyo ti umallatiw iti lugar a dakdakkel ti pakasapulan, iyumanyo dayta a banag iti pamiliayo ken kadagiti panglakayen iti kongregasionyo. Nasayaat met nga iyumanyo dayta iti manangaywan iti sirkitoyo, yantangay mabalin nga ammona dagiti lugar iti kabangibang nga agkasapulan iti tulong. No tarigagayanyo ti umakar iti ad-adayo a lugar, mabalinyo ti agsurat iti Service Department iti sanga nga opisina. Itedyo ti surat kadagiti panglakayen tapno mairagpinda dagiti komento ken rekomendasionda sakbay a maipatulod dayta iti Sosiedad.
11 Ania ti rumbeng nga iramanyo iti suratyo? Ti edadyo, petsa ti pannakabautisaryo, dagiti pagrebbenganyo iti kongregasion, no adda wenno awan pay ti asawayo, ken no adda ti menor de edad nga annakyo. Napateg nga ilanadyo a masuportaranyo ti pinansial a pakasapulanyo. Inagananyo dagiti probinsia a kayatyo a pagserbian, sigun kadagiti personal a pakasapulanyo.
12 Ipalubos kadi dagiti kasasaadyo a makapagserbikayo iti lugar a dakdakkel ti pakasapulan? No kasta, imutektekanyo ngarud no kasano a ni Jehova agtultuloy nga ibukbokna dagiti nabaknang a pamendisionna kadagidiay agtalek kenkuana bayat nga ipakpakitada ti managsakripisio nga espiritu!—Sal. 34:8; Mal. 3:10.