Pagtalinaedenyo ti Panaglinglingay iti Umiso a Lugarna
1 Kadagitoy narikut a tiempo, kasapulan nga agaliwaksaytayo sagpaminsan. Umiso ti panagaliwaksay. Nupay kasta, no adu unay ti panawen a mausartayo iti panaglinglingay, panagpalpaliwa, ken pannakikadkadua kadagiti gagayyem, mabalin a bumasbassit a bumassit ti panawentayo para kadagiti naespirituan a banag. Masapul a pagtalinaedentayo ti panaglinglingay iti umiso a lugarna. (Mat. 5:3) Kasano a posible daytoy? Babaen ti panangsurot iti balakad a masarakan iti Efeso 5:15-17.
2 Mangipasdek Kadagiti Limitasion: Insurat ni Pablo nga ‘itultuloy [koma dagiti Kristiano] ti agaluad a siiinget’ no kasano ti nainsiriban a panagbiagda. Nasken ti kinatimbeng ken panagteppel tapno maaramid laeng ti panaglinglingay no kasapulan. Nasayaat a sipapasnek a panunotentayo no kasanotay nga usaren ti nawaya a tiempotayo. Adda koma makagunggona a panggep ti panagpalpaliwa imbes a masayang laeng ti panawentayo wenno mapaksuyantayo. No malidayan, di napnek, ken agbabbabawitayo kalpasan ti panaglinglingay, ipasimudaagna dayta a nasken ti panagbalbaliw iti panangusartayo iti tiempotayo.
3 Agbalin a Rasonable: Imbalakad ni Pablo a ‘gatangentayo ti nainggundawayan a tiempo’ maipaay iti napatpateg a bambanag iti biag, a saantay nga agbalin a “di nainkalintegan.” Saan a mabalin nga isentro dagiti dedikado a Kristiano ti biagda iti panagaliwaksay. Nupay mapapigsatayo iti pisikal no aginana ken agaliwaksaytayo, ti gubuayan ti naespirituan a pigsatayo ket ti aktibo a puersa ti Dios. (Isa. 40:29-31) Maawattayo ti espirituna babaen kadagiti nateokratikuan nga aktibidad—panagadal iti Biblia, itatabuno kadagiti gimong ti kongregasion, pannakipaset iti tay-ak ti serbisio—saan a babaen ti panagpalpaliwa.
4 Mangipasdek Kadagiti Prioridad: Binilin ni Pablo dagiti Kristiano nga ‘itultuloyda a lasinen no ania ti pagayatan ni Jehova.’ Insuro ni Jesus a dagiti aktibidadtayo rumbeng a maipamaysa iti Pagarian ti Dios kas kangrunaan iti biagtayo. (Mat. 6:33) Nasken nga unaentayo dagiti banag a tumulong kadatayo nga agbiag a mayannurot iti dedikasiontayo ken Jehova. Kalpasanna, mapagtalinaed ti panagaliwaksay iti umiso a lugarna. No maaramid dayta, addanto nasayaat nga epektona, ken ad-adda a matagiragsaktayo dayta.—Ecl. 5:12.