Kayatyo Kadi nga Ad-adu Pay ti Maaramidanyo?
1 Inyarig ni Jesus ti Pagarian iti di magatadan a gameng. (Mat. 13:44-46) Napateg met a gameng ti panangirakurak iti mensahe ti Pagarian. Rumbeng laeng a mayun-una daytoy a trabaho iti biagtayo, uray no ti naan-anay a pannakiraman iti daytoy kalikagumanna ti panangisakripisio kadagiti personal nga interestayo. (Mat. 6:19-21) Kayatyo kadi nga ad-adu pay ti maaramidanyo a panagserbi iti Pagarian?
2 Usigenyo Dagitoy Napateg a Banag: Adda sumagmamano a nesesita a banag tapno ad-adu ti maaramidantayo iti ministerio: (1) determinasion nga iyun-una dagiti interes ti Pagarian iti biagtayo (Mat. 6:33); (2) panangiparangarang iti pammati ken panagtalek ken Jehova (2 Cor. 4:1, 7); (3) panagpatulong iti Dios babaen ti napasnek ken napinget a kararag (Luc. 11:8-10); (4) panagregget ken panagtignay maitunos iti kararagtayo.—Sant. 2:14, 17.
3 Dagiti Pamay-an a Mapalawa ti Ministeriotayo: Mabalintay amin a pagbalinen a kalat ti makiraman a regular iti ministerio kada bulan. Ngem pinanunotyo met kadi nga usaren ti tunggal gundaway a mangasaba iti impormal, ikagumaan a pasayaaten ti presentasionyo, aramiden nga ad-adda nga epektibo ti panagsarungkar, ken pagreggetan ti mangikondukta iti narang-ay a panagadal iti Biblia? Mabalinyo kadi ti ag-auxiliary wenno ag-regular pioneer wenno agserbi iti lugar a dakdakkel ti panagkasapulan? No bautisadokayo a kabsat a lalaki, ikagkagumaanyo kadi ti makualipikar kas ministerial nga adipen wenno kas panglakayen? (1 Tim. 3:1, 10) Mapalawayo pay kadi ti ministerioyo babaen ti panagaplikar iti Bethel wenno iti Ministerial Training School?—Luc. 10:2.
4 Naparegta nga ag-regular pioneer ti maysa a kabsat a lalaki a mangmangged ken mangbusbusbos iti adu a panawen iti isports. Nangrugi kas auxiliary pioneer sana binaliwan ti kasasaadna tapno makastrek iti amin-tiempo a ministerio. Kalpasanna, nageskuela iti Ministerial Training School, a nangisagana kenkuana iti agdama nga annongenna kas manangaywan iti sirkito. Agyaman unay ta impangagna ti pammaregta kenkuana, ket ammona a dakdakkel ti ragsakna gapu ta inkeddengna nga ad-adu ti aramidenna a panagserbi iti Pagarian.
5 Bendisionan ni Jehova dagidiay madadaan nga agserbi. (Isa. 6:8) Diyo ipalubos nga adda manglapped iti panangpalawayo iti ministerioyo. Iti kasta, matagiragsakyo ti dakdakkel a pannakapnek ken bang-ar kas resultana.