Makalapped Kadi Dayta iti Panangasaba?
1 Okupado ti kaaduan a tattao. Dagiti Saksi ni Jehova ti maysa kadagiti kaokupaduan unay—agad-adalda iti Sao ti Dios, makigimongda iti kongregasion, ken mangaskasabada. Maysa pay, okupadotayo a mangged, agtagibalay wenno mangasikaso kadagiti leksion iti eskuelaan, ken adu pay a pagrebbengan, ket agkasapulan amin dagitoy iti panawen. Nangnangruna a karit daytoy kadagiti ulo ti pamilia.
2 Gapu iti kinarigat ti biag iti dadduma a lugar, dagiti ulo ti pamilia nasken a naunday ken igaedda ti agtrabaho tapno adda pagbiagda. Gapu ta alaen ti sekular a trabahoda ti adu a tiempo ken pigsada, manmanoda laengen a mangasaba. Marikna ti dadduma a limitado ti pannakiramanda iti panangasaba gapu iti obligasionda a mangipaay iti material a kasapulan ti pamiliada. (1 Tim. 5:8) Pudno, adu ita ti pakarikutan mainaig iti pananggun-od kadagiti kasapulan iti biag. Ngem saan koma a malappedan ti panangasaba gapu iti sekular a trabaho. (Mar. 13:10) Nasken ngarud nga usigentayo ti aktual a kasasaadtayo.
3 Gapu ta agtultuloy ti panagbaliw ti kasasaad iti lubong, nalabit mapilitan ti ulo ti pamilia a mangbusbos iti ad-adu nga oras nga agtrabaho tapno makaurnong iti kuarta agpaay iti panawen ti emerhensia. (1 Cor. 7:31) Nupay agparang a makatulong ti kanayonan a panagtrabaho tapno matagiragsak dagiti kanayonan a material a sanikua wenno ad-adu a panaglinglingay ken panagpalpaliwa, pagbalinenna kadi daytoy nga ad-adda a naragsak ken kontento ti pamilia no maisakripisio dagiti naespirituan a raragpaten ken ti regular a pannakigimong? Sigurado a kayattayo a liklikan ti aniaman a mamagpeggad iti espiritualidadtayo. Nainsiriban ti panangipangag iti balakad ni Jesus nga ‘agurnong kadagiti gameng idiay langit,’ ket agbalin a “nabaknang iti Dios.”—Mat. 6:19-21; Luc. 12:15-21.
4 Ipangpangruna Dagiti Interes ti Pagarian: Insuro ni Jesus kadagiti adalanna nga iyun-unada ti naespirituan a bambanag ngem iti aniaman. Indagadagna kadakuada: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’” Apay a kasta ti kunana? Inlawlawagna: “Ta ammo ti nailangitan nga Amayo nga amin dagitoy a banag ket kasapulanyo.” No talaga a kombinsidotayo iti dayta, awan ti tubeng a makalapped kadatayo a mangaramid iti sumaruno a kinuna ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a [nesesita a material a] bambanag mainayonto kadakayo.” Ti Dios ti makaammo iti dayta! (Mat. 6:31-33) Saanen a panawen ita a masinga gapu iti nalabes a pannakaseknan iti pagbiag wenno iti tarigagay a maaddaan iti nasaliwanwan a biag iti sistema dagiti bambanag nga asidegen a madadael.—1 Ped. 5:7; 1 Juan 2:15-17.
5 Ti kangrunaan a panggep no apay a mangged isu daytoy: tapno magun-od dagiti material a kasapulan. Ngem kasano kaadu ti kasapulantayo? Insurat ni apostol Pablo: “No adda pagtaraon ken pagkawestayo, mapnektayon kadagitoy a banag.” Nalablabes pay kadi ngem iti dayta ti gunggun-odentayo? No wen, nalabit sagabaentayo dagiti pagdaksan nga impakdaar ni Pablo: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” (1 Tim. 6:8, 9; Mat. 6:24; Luc. 14:33) Kasanotay a maibaga a laplapdannatayon ti nalabes a tarigagay?
6 No manmano laengen a makiramantayo iti panangasaba wenno ditay kayat ti agsakripisio agpaay iti naimbag a damag gapu kadagiti sekular a raragpaten, iti kasta masapul a balbaliwantayo dagiti prioridadtayo. (Heb. 13:15, 16) Dakkel ti maaramidan ti simple nga estilo ti panagbiag tapno malisian daytoy a tubeng iti panangasabatayo. Kanayon koma nga ipangpangrunatayo dagiti interes ti Pagarian no maipapan iti panangusar iti tiempo ken pigsatayo.
7 Ti Panagbannog a Saan nga Ubbaw: Paregtaennatayo ti sasao ni Pablo a kanayon koma nga ‘aduantayo iti aramiden iti trabaho ti Apo, nga ammotayo a ti panagbannogtayo ket saan nga ubbaw mainaig iti Apo.’ (1 Cor. 15:58) Ti kangrunaan a “trabaho ti Apo” isu ti panangikasaba iti Pagarian ken ti panangaramid iti adalan. (Mat. 24:14; 28:19, 20) Tapno mabaelantayo ti makiraman a naan-anay no mabalbalin, masapul nga iyeskediultayo ti rummuar kada lawas ket ikagumaan a di usaren dayta a tiempo iti sabali a raragpaten. (Efe. 5:15-17) Iti kasta, saan a makalapped iti ministeriotayo ti sekular a trabaho wenno ti aniaman a banag.
8 No ikagumaantayo nga iranud iti sabsabali dagiti kinapudno a linaon ti Biblia, masagraptayo ti dakdakkel a ragsak kas resulta ti panangted. (Ara. 20:35) No itultuloytayo nga ikasaba ti Pagarian, manamnamatayo iti masanguanan buyogen ti kompiansa a “saan a nakillo ti Dios tapno lipatenna ti aramid[tayo] ken ti ayat nga impakita[tayo] maipaay iti naganna.”—Heb. 6:10.