Dagiti Bendision ti Panangapresiar iti Panagayat ni Jehova—Paset 1
1 Insurat ni apostol Juan: “No maipapan kadatayo, agayattayo, agsipud ta isu [ni Jehova] ti immuna a nagayat kadatayo.” (1 Juan 4:19) No panunotentayo dagiti amin nga impaay ni Jehova kadatayo, magutugottayo met a mangipakita iti nauneg nga apresasion. Inyulidan ni Jesus ti panangaramid iti daytoy babaen ti situtulnog a panangikasabana iti nagan ken Pagarian ti Dios. (Juan 14:31) Makagunggona nga utoben ti sumagmamano a pamay-an a mabalintayo nga ipakita ti apresasiontayo iti panagayat ni Jehova ken kadagiti iyegna a bendision.
2 Panagbalaybalay: Insuro ni Jesus kadagiti adalanna no kasano nga ikasaba ti Pagarian. Nalawag nga ipakita ti pammilinna a napanda iti binalaybalay, nga insaknapda ti naimbag a damag. (Luc. 9:1-6; 10:1-7) Masapul nga addaantay iti panagayat iti Dios ken iti kaarruba tapno maitultuloytayo ti mapan iti tunggal ruangan uray adda ti panangyaleng-aleng ken ibubusor. Ngem bayat ti panagbalaybalay, personal a magunggonaantayo agsipud ta ad-adda a tumibker ti pammati, bumileg ti kombiksion, ken rumaniag ti namnamatayo.
3 Babaen ti panagtrabahotayo iti sidong ti panangiturong dagiti anghel, nabirokantayo ti adu a mabisbisinan ken mawaw iti kinapudno. (Apoc. 14:6) Adda dagiti bumalay a nangibaga nga ikarkararagda ti tulong idi umay dagiti Saksi iti ruanganda. Dua a Saksi ken maysa nga ubing ti nagbalaybalay iti maysa a puro ti Caribe. Idi inkeddeng dagiti nataengan nga agawiddan, maymaysa ti ubing a napan nagtuktok iti sumaruno a ruangan. Maysa nga agtutubo a babai ti nanglukat iti ruangan. Idi makita daytoy dagiti nataengan, napanda ket kinasaritada ti babai. Pinastrekna ida ket inlawlawagna a kalkalpasna laeng nga inkararag a mangibaon koma ti Dios kadagiti Saksi a mangyadal kenkuana iti Biblia!
4 Panangasaba Kadagiti Lansangan: Yantangay manmano a madanon dagiti tattao iti pagtaenganda iti dadduma a lugar, ti panangasaba kadagiti lansangan ket epektibo a pamay-an tapno makasabaanda. Kasta met, adu a tattao ti agnanaed kadagiti nabakudan a komunidad wenno nainget a mabambantayan a pasdek ket ditay mabalin a pindaen. Nupay kasta, ti apresasiontayo iti panagayat ni Jehova ti manggutugot kadatayo a mangaprobetsar iti tunggal posible a pamay-an a mangidanon iti mensahe ti Pagarian kadagiti tattao, agraman ti panangasaba kadagiti lansangan.—Prov. 1:20, 21.
5 Panagsarungkar: Yantangay sapsapulentayo dagiti “sipapanunot iti naespirituan a kasapulanda,” kayattayo nga aramiden ti kabaelantayo a mangpennek iti dayta a panagkasapulan. (Mat. 5:3) Kalikaguman daytoy nga agsublitayo tapno sibugan dagiti bin-i ti kinapudno nga immulatayo. (1 Cor. 3:6-8) Maysa a kabsat a babai idiay Australia ti nangipaima iti tract iti maysa a babai nga agparang a saan unay nga interesado. Ngem intultuloy nga inkagumaan ti kabsat a maranaan ti babai iti pagtaenganna. Idi madanonna kamaudiananna, naammuan ti kabsat a gimmatang ti babai iti nangina a Biblia kalpasan ti damo nga isasarungkarna. Rinugian nga inyadalan ti kabsat!
6 Panangyadal iti Biblia: Daytoy ti mabalin a kararagsakan ken makagunggona unay a paset ti ministeriotayo. Anian a bendision ti tumulong kadagiti tattao a mangammo iti maipapan ken Jehova, a makita ti panagbalbaliw iti biagda tapno maay-ayoda ti Dios, ket kalpasanna masaksian ti Nakristianuan a bautismoda kas simbolo ti dedikasionda Kenkuana!—1 Tes. 2:20; 3 Juan 4.
7 Iti sumaganad nga isyu, usigentayo ti ad-adu pay a pamay-an a nabendisionantayo gapu iti panangipakita iti apresasion iti panagayat ni Jehova.