Aramatenyo a Siuumiso ti Sao ti Dios
1 Idi kasabaanna ti maysa nga opisial, “linuktan ni Felipe ti ngiwatna ket, mangrugi iti [maysa a] Kasuratan, indeklarana kenkuana ti naimbag a damag maipapan ken Jesus.” (Ara. 8:35) ‘Siuumiso nga inaramat [ni Felipe] ti sao ti kinapudno.’ (2 Tim. 2:15) Ita, nupay kasta, napaliiw dagiti agdaldaliasat a manangaywan nga adu nga agibumbunannag ti manmano a mangusar iti Biblia no mangasabada. Ar-aramatenyo kadi ti Biblia iti ministerioyo?
2 Ti Sao ti Dios ti gubuayan ti tunggal banag a patpatien ken isursurotayo. (2 Tim. 3:16, 17) Dayta ti mangyasideg kadagiti tattao ken Jehova ken mangisuro kadakuada maipaay iti biag. Dayta ti makagapu a napateg a mausar ti Biblia iti ministeriotayo imbes a basta makitungtong laeng maipapan kadagiti topiko a paginteresantayo. (Heb. 4:12) Gapu ta bassit ti ammo dagiti tattao maipapan iti Biblia, kasapulan a maibasa dayta tapno maipakita kadakuada ti praktikal a panangiwanwanna ken ti masakbayan nga agur-uray iti sangatauan.
3 Direkta a Basaen iti Biblia: Mabalin a padasenyo ti mangasaba a di ag-bag iti dakkel. Mabalinyo nga ikabil ti maitukon a literatura iti bassit a bag ken iggaman wenno ibulsayo ti Bibliayo. Kalpasanna, no adda makatungtongyo, iruaryo ti Biblia iti pamay-an a diyo maiparikna iti tao nga umaykayo mangsermon. Agpuestokayo iti wagas a mabasa ti agdengdengngeg kadakayo ti Bibliayo. Nalabit kiddawenyo nga ibasana a napigsa ti maysa a bersikulo. Dakdakkel ti epekto kenkuana no mabasana a mismo ti ibagbaga ti Biblia imbes a mangngegna laeng kadakayo. Siempre, tapno matulongan a mangtarus iti punto ti teksto, ipaganetget dagiti pannulbek a sasao.
4 Presentasion Babaen ti Maysa Laeng a Kasuratan: Kalpasan a mayam-ammoyo ti bagiyo, mabalinyo a kunaen: “Agsapsapul ti adu a tao iti nagduduma a gubuayan a mangibagnos iti panagbiagda. Iti panagkunayo, ania ti kasayaatan a gubuayan ti praktikal a panangiwanwan? [Palubosan a sumungbat.] Ania ti makunayo iti daytoy a teksto? [Basaen ti Proverbio 2:6, 7.] Napaneknekan a nagbassit ti maaramidan ti sirib ti tao, ket nagresulta dayta iti pannakaupay ti adu a tattao. Ngem ti sao ti Dios ket napaneknekan a kanayon a mapagtalkan ken makagunggona.” Kalpasanna, ipakitayo ti publikasion nga ituktukonyo, ket mangpili iti dayta ti maysa a pagarigan ti praktikal a kinasirib ti Dios.
5 Inusar ni Jesus ti Kasuratan a tumulong kadagidiay napudno ti panagpuspusona a tattao. (Luc. 24:32) Pinatalgedan ni Pablo dagiti insurona babaen ti Kasuratan. (Ara. 17:2, 3) Rumayray ti kompiansa ken rag-otayo iti ministerio bayat a lumalaingtayo a mangusar a siuumiso iti Sao ti Dios.