Makikomunikarka!

¹ Tapno maitungpal ti annongentayo a mangasaba ken mangaramid kadagiti adalan, masapul nga iranudtayo ti impormasion kadagiti sabsabali. (Mat. 24:14; 28:19, 20) Mabalin a maysa a karit ti pannakikomunikar uray kadagiti gagayyem. Ania ti makatulong kadatayo tapno sibaballigi a maidanon ti naimbag a damag kadagiti ganggannaet?

² Agbalin a Gayyem Saan a Ganggannaet: Padasenyo nga isaad ti bagiyo iti lugar dagiti makasabaanyo. Gapu iti kasasaad ti lubong ita, mabalin nga agatap ti dadduma, wenno maamakda pay ketdi, kadagiti ganggannaet. Mabalin a daytoy ti manglapped iti komunikasion. Kasanom a maparmek ti panagamak dagidiay damo a makasaritam? Sakbay pay nga agsaotayo, ti maysa a wagas ti pannakikomunikartayo ket babaen ti naemma a panaglanglangatayo. Ti nanakman a kawes ken nadayaw a langa ket makatulong a mangikkat iti buteng.—1 Tim. 2:9, 10.

³ Ti maysa pay a makatulong iti pannakikomunikar ket ti kalmado, nainggayyeman a kababalin. Makatulong daytoy tapno natalged ti rikna dagiti dadduma ken ad-adda a sidadaanda a dumngeg. Kasapulan ti nasayaat a panagsagana iti daytoy a banag. No ammotayo ti ibagatayo, ad-adda a natalged ti riknatayo. Ket ti kalmado a kababalintayo maallukoyna dagiti sabsabali iti mensahetayo. Kastoy ti kinuna ti maysa a babai maipapan iti panagsarungkar ti maysa a Saksi: “Ti malagipko isu ti talna ti panunot a nayanninaw iti isemna. Naginteresak.” Daytoy ti nanglukat iti gundaway iti babai a dumngeg iti naimbag a damag.

⁴ Dagiti Makaallukoy a Kualidad: Masapul a maaddaantayo iti napasnek a personal nga interes kadagiti sabsabali. (Fil. 2:4) Saan koma a datayo ti sao a sao. Kinapudnona, ti komunikasion ramanenna ti panagimdeng. No awisentayo dagiti agdengdengngeg kadatayo a mangyebkas iti kapanunotanda ken interesadotayo nga agimdeng iti ibagbagada, mariknada a maseknantayo kadakuada. Gapuna, no agsao ti agdengdengngeg kenka, saanka nga agapura a mangbirok iti gundaway a mangiserrek iti insaganam a presentasion. Komendaram ida no maaramidmo a sipapasnek, ken ikagumaam nga ibagay ti sawem iti imbagada. No dagiti komentoda ket ipalgakda ti banag a pakaseknanda unay, ibagaymo ti presentasionmo tapno maipaayan iti atension dagiti pakaseknanda.

⁵ Ti kinaemma ken kinapakumbaba iti panagpampanunot pagbalinenna a naannayas ti komunikasion. (Prov. 11:2; Ara. 20:19) Immasideg dagiti tattao ken Jesus gapu ta ‘naalumamay ti kababalinna ken napakumbaba ti pusona.’ (Mat. 11:29) Iti sabali a bangir, ti nangato a panangipapan iti bagi ket mangyadayo. Gapuna, nupay kombinsidotayo nga adda kadatayo ti kinapudno, nainsiriban a liklikantayo ti agsao iti dogmatiko a wagas.

⁶ Kasano ngay no ti komento ti maysa iyanninawna dagiti sursuro a saan a maitunos kadagiti isursuro ti Biblia? Masapul kadi a korehirentayo? Wen, inton agangay, ngem saantay nga aramiden dayta iti damo a panagsarungkar. Masansan a makagunggona no dakamatem dagiti banag a pagtunosanyo a dua, sakbay nga iranudmo kenkuana dagiti sursuro ti Biblia a mabalin a narigatna a patien. Kalikaguman daytoy ti kinaanus ken kinataktika. Nangipaay ni Pablo iti ulidan iti daytoy a banag idi nangasaba kadagiti ukom iti Areopago.—Ara. 17:18, 22-31.

⁷ Kangrunaan iti amin, ti di agimbubukodan nga ayat tulongannatayo a makikomunikar a sieepektibo. Kas ken Jesus, masapul nga ipakitatayo ti asi kadagiti tattao a ‘nalalatan ken naiwarawara a kasla karkarnero nga awanan pastor.’ (Mat. 9:36) Daytoy ti mangtignay kadatayo a mangidanon kadakuada iti naimbag a damag ken tumulong kadakuada a magna iti dalan ti biag. Awittayo ti mensahe ti ayat, gapuna, itultuloytayo nga isarsarita dayta iti naayat a pamay-an. No aramidentayo dayta, tultuladentayo ni Jehova a Dios ken ni Jesu-Kristo​—dagiti kasayaatan iti uniberso no maipapan iti komunikasion.