Panangtulong Kadagiti Sabsabali a Mangidayaw ken Jehova
1 Adda napateg a mensahe a maiwarwaragawag kadagiti tattao iti intero a daga: “Agbutengkayo iti Dios ket idayawyo, agsipud ta dimtengen ti oras ti panangukomna, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” (Apoc. 14:6, 7) Pribilehiotayo ti makiraman a mangiwaragawag iti dayta. Ania ti masapul a maammuan dagiti tattao maipapan ken ni Jehova tapno agbuteng ken agdayawda kenkuana?
2 Ti Naganna: Masapul a maammuan dagiti tattao ti nagan ti maymaysa a pudno a Dios, a naiduma kadagiti adu a didiosen a madaydayaw ita. (Deut. 4:35; 1 Cor. 8:5, 6) Kinapudnona, nasurok a 7,000 a daras nga inaramat dagiti nagsurat iti Biblia ti naindaklan a nagan ni Jehova. Nupay maitutop nga agannadtayo no kaanotay nga iyam-ammo ti nagan ti Dios, pulos a ditay koma ilemmeng wenno bumdeng a mangusar iti dayta a nagan. Pagayatan ti Dios a maammuan koma ti intero a sangatauan ti naganna.—Sal. 83:18.
3 Ti Personalidadna: Tapno maidaydayawda, nasken a maammuan dagiti tattao no ania a kita a Dios ni Jehova. Masapul nga isarsaritatayo kadakuada ti naisangsangayan nga ayatna, di maartapan a siribna, naan-anay a kinahustisiana, ken naindaklan a pannakabalinna, agraman ti asi, naayat a kinamanangngaasi, ken dadduma pay nga agkakaimbag a galadna. (Ex. 34:6, 7) Masapul met a masursuroda a patanoren ti umiso a panagbuteng iti Dios, pagraemanda, a bigbigenda a ti mismo a biagda ket agpannuray iti anamong ni Jehova.—Sal. 89:7.
4 Iyaadani iti Dios: Tapno maisalakan dagiti tattao iti um-umay a panangukom ti Dios, masapul nga umawagda ken Jehova a buyogen ti pammati. (Roma 10:13, 14; 2 Tes. 1:8) Saan laeng a panangammo iti nagan ken kadagiti galad ti Dios ti kaipapanan daytoy. Masapul a tulongantay ida a mangpatanor iti personal a relasion ken Jehova, nga agtalekda kenkuana iti amin a pusoda. (Prov. 3:5, 6) No iyaplikarda dagiti masursuroda, sipapasnek nga agkararagda iti Dios, ken mapasaranda ti tulongna iti biagda, dumakkel ti pammatida, ket iti kasta, sumingedda ken Jehova.—Sal. 34:8.
5 Sapay koma ta sireregta nga ipakaammotayo ti nagan ti Dios ken tulongantayo dagiti sabsabali nga agtalek a naan-anay ken agbuteng kenkuana. Mabalin nga adu pay ti matulongantayo a mangammo ken ni Jehova ken mangidayaw kenkuana kas ti ‘Dios ti pannakaisalakanda.’—Sal. 25:5.