Saludsod

◼ Ania dagiti pagimbaganna no tumabunotayo iti kongregasion a makinteritoria iti pagnanaedantayo?

Babaen ti urnos ti kongregasion, umawattayo iti pammabileg a ‘mangparegta kadatayo iti ayat ken nasayaat nga ar-aramid.’ (Heb. 10:24, 25) Babaen ti kongregasion, masursurotayo ti kinapudno ken makabalantayo a mangitungpal iti annongentayo a mangaramid iti adalan. (Mat. 28:19, 20) Mapabilegtayo met a simamatalek a mangandur kadagiti pakasuotan ken addaantayo kadagiti naayat a manangaywan a tumulong kadatayo a mangsango kadagiti dadakkel a pakarigatan ken pakaringgoran. Nalawag, napateg ti kongregasion iti naespirituan a salun-attayo. Ngem adda kadi dagiti pagimbaganna no tumabunotayo iti kongregasion a makinteritoria iti pagnanaedantayo?

Agduduma ti kasasaad ti tunggal indibidual, ket dagiti bambanag a kas iti panggedan, di manamati nga asawa, ken transportasion apektaranda ti pangngeddeng ti maysa mainaig iti kongregasion a tabunuanna. Kaskasdi, adda dagiti nalawag a naespirituan ken dadduma pay a pagimbaganna no makitimpuyog ti maysa iti kongregasion a makinteritoria iti pagnanaedanna. No adda emerhensia, naparpartak a makontak dagiti panglakayen ti amin nga agibumbunannag. Naitampok kadagiti naglabas a Saludsod ti adu a dadduma pay a pagimbagan.—Hunio 1991, Mayo 1976, ken Marso 1967.

Kaaduanna a nalaklaka ti tumabuno kadagiti gimong iti asideg, a mabalintayo ti sumangpet a nasapa tapno makasaritatayo ti sabsabali, mangasikaso kadagiti nasken a banag, ken makiraman iti panglukat a kanta ken kararag. No kaarrubatayo dagiti kabbaro nga interesado, masansan a nalaklakatayo ida a makasarita, iyadalan iti Biblia, ken kaduaen kadagiti gimong a saan nga adayo kadakuada.

Agtalektayo a sikakararag nga usigen dagiti ulo ti pamilia daytoy a banag, nga utobenda dagiti amin a banag a nairaman iti panangikeddeng no ania ti kasayaatan maipaay iti naespirituan ken praktikal a pagimbagan ti pamiliada.—1 Tim. 5:8.