Lagipenyo Dagiti Matalek a Lallakay ken Babbaket
1 Uray no balo ken baketen, “saan a pulos a limmanglangan idiay templo” ti 84 ti tawenna a ni Ana. Natignay ni Jehova a mangipaay kenkuana iti naisangsangayan a bendision gapu iti kinamatalekna. (Luc. 2:36-38) Iti kaaldawantayo, adu a kakabsat ti mangiparparangarang iti espiritu a kas ken Ana iti laksid dagiti narikut a kasasaad. Mabalin a maupay no dadduma dagitoy a matalek a kakabsat no agsagabada kadagiti parikut iti salun-at wenno limitasion gapu iti kinalakay. Usigentayo ti sumagmamano a praktikal a wagas no kasanotayo a maparegta ken matulongan ida a mangtaginayon iti nasayaat a naespirituan a rutina.
2 Dagiti Gimong ken ti Ministerio: Nalaklaka a makatabuno a regular kadagiti Nakristianuan a gimong dagiti lallakay ken babbaket no adda dagiti siaayat a mangitukon iti paglugananda. Makapabileg daytoy iti naespirituan kadagiti matalek a nabayagen nga agserserbi ken makagunggona met dayta iti kongregasion. Nakiramankayo kadin iti daytoy naimbag nga aramid?—Heb. 13:16.
3 Ti regular a pannakiraman iti ministerio ipaayanna dagiti pudno a Kristiano iti rag-o ken pannakapnek. Ngem mabalin a karit daytoy kadagiti lallakay ken babbaket kasta met kadagiti nakapuy ti salun-atda. Posible kadi a makaduadakayo dagitoy a maipatpateg kas “katrabahuan” iti dadduma a benneg ti trabaho a panangasaba? (Roma 16:3, 9, 21) Nalabit mabalin nga awisenyo ida a makiraman kadakayo a mangasaba babaen ti telepono wenno kumuyog kadakayo nga agsarungkar wenno mangyadal iti Biblia. No adda a kanayon iti balayna ti kabsat a lakay wenno baket, mabalin kadi nga iti pagtaenganna laengen a mayadalan iti Biblia ti maysa nga interesado?
4 Panagadal ken Pannakitimpuyog: Sagpaminsan, awisen ti dadduma ti maysa a kabsat a lakay, baket, wenno nakapuy ti salun-atna a makiraman iti panagadal iti Biblia ti pamiliada, wenno iti pay ketdin balay dayta a kabsat ti pagadalanda. Maysa nga ina ti nangipan kadagiti dua nga ubbing nga annakna iti balay ti baketen a kabsat tapno agadalda iti Ti Librok Dagiti Estoria ti Biblia. Naparegtada amin iti dayta a panaglalangenda. Apresiaren met dagita nga indibidual no maawisda a makipangan wenno iti dadduma a sosial nga okasion. No nakapuy unay dagiti masakit para iti napaut nga isasarungkar, nalabit mabalinyo nga awagan wenno sarungkaran iti apagbiit tapno ibasaan ida, agkararag a kaduada, wenno mangiranud iti makapabileg a kapadasan.—Roma 1:11, 12.
5 Ipatpateg ni Jehova dagiti matalek a lallakay ken babbaket. (Heb. 6:10, 11) Matuladtayo ti Dios babaen ti panangipategtayo kadakuada ken panangtulongtayo kadakuada a mangtaginayon iti nasayaat a naespirituan a rutina.