Panagbiag a Mayannurot iti Dedikasiontayo
1 Nabiit man wenno nabayagkayon a nabautisaran, mabalin a malaglagipyo dayta a napateg a pagteng iti biagyo. Ti bautismotayo ket saan nga isu ti pagpatinggaan, no di ket pangrugian ti tungpal-biag a dedikado a panagserbi a mabalin nga agpaut iti agnanayon. (1 Juan 2:17) Ania ti nairaman iti panagbiag a mayannurot iti dedikasiontayo?
2 Tuladenyo ni Kristo: Idi nabautisaran ni Jesus, “rinugianna ti trabahona,” nga inwaragawagna “ti naimbag a damag ti pagarian ti Dios.” (Luc. 3:23; 4:43) Kasta met, idi nagpabautisartayo kas simbolo ti panagdedikartayo ken Jehova, nagbalintayo nga ordinado a ministro ti naimbag a damag. Nupay adu a panawen ken rigat ti kasapulan tapno maaddaantayo kadagiti masapsapultayo iti biag, ti Nakristianuan a ministerio ti kangrunaan a trabahotayo. (Mat. 6:33) Imbes nga umagawada nga agpabaknang wenno gumun-od iti dayaw, ikagumaan dagiti dedikado iti Dios a ‘padayagen ti ministerioda,’ kas ken apostol Pablo. (Roma 11:13) Ipatpategyo kadi ti pribilehioyo nga agserbi ken ni Jehova ken ar-aramidenyo ti amin a kabaelanyo nga agserbi?
3 Kas ken Jesus, masapul a ‘busorentayo ti Diablo.’ (Sant. 4:7) Kalpasan ti bautismona, ni Jesus ket sinulisog ni Satanas. Punpuntiriaen met ni Satanas dagiti dedikado nga adipen ni Jehova iti kaaldawantayo. (Luc. 4:1-13) Gapu ta addatayo iti tengnga ti lubong ni Satanas, masapul a disiplinaentayo ti bagbagitayo, a liklikantayo ti aniaman a mangtulaw iti panunottayo wenno mamagruker iti pusotayo. (Prov. 4:23; Mat. 5:29, 30) Nabagbagaan dagiti Kristiano a ‘dida mabalin ti makiraman iti “lamisaan ni Jehova” ken iti lamisaan dagiti sairo.’ (1 Cor. 10:21) Masapul ngarud nga idiantayo ti dakes a paglinglingayan, dakes a pannakitimpuyog, ken dagiti peggad iti Internet. Masapul met nga idiantayo dagiti impormasion a naggapu kadagiti apostata. No siputantayo dagitoy ken dadduma pay a taktika ni Satanas, makapagbiagtayo a maitunos iti dedikasiontayo.
4 Gundawayanyo Dagiti Probision ni Jehova: Tapno makapagbiagtayo a mayannurot iti dedikasiontayo, nangipaay ni Jehova iti tulong babaen ti Saona ken ti kongregasion Kristiano. Inaldaw a basaenyo ti Biblia ken agkararag ken ni Jehova. (Jos. 1:8; 1 Tes. 5:17) Tagiragsakenyo dagiti gimong iti kongregasion. (Sal. 122:1) Makilangenkayo kadagidiay agbuteng ken ni Jehova ken mangtungtungpal kadagiti bilinna.—Sal. 119:63.
5 Iti tulong ti Dios, makapagbiagkayo a mayannurot iti dedikasionyo ken ni Jehova ken matagiragsakyo ti agserbi kenkuana iti agnanayon.—Sal. 22:26, 27; Fil. 4:13.