Isuroyo Kadagiti Dadduma ti Nasin-aw a Pagsasao
1 Nupay naggapu dagiti Saksi ni Jehova iti nadumaduma a ‘nasion, tribu, il-ili ken pagsasao,’ nagkaykaysada nga ili, a buklenda ti pudpudno a maysa nga internasional a panagkakabsat. (Apoc. 7:9) Nakaskasdaaw daytoy iti lubong a nasinasina. Kasano a posible daytoy? Agsipud ta naipaay kadatayo ti “panagbalbaliw nga agturong iti nasin-aw a pagsasao.”—Sof. 3:9.
2 Nagsayaat nga Epekto: Ania daytoy nasin-aw a pagsasao? Isu ti umiso a pannakaawat iti kinapudno maipapan ken ni Jehova ken kadagiti panggepna a masarakan iti Sao ti Dios, nangruna ti kinapudno maipapan iti Pagarian ti Dios. Kas impadto ni Jesus, maiburburay daytoy a kinapudno babaen ti makitkita a naindagaan a kalasugan, “ti matalek ken masirib nga adipen.” Kas resultana, dagiti tattao “manipud kadagiti amin a pagsasao ti nasnasion” ab-abrasaenda ti pudno a panagdayaw.—Mat. 24:45; Zac. 8:23.
3 Bayat a masursuro dagiti tao ti nasin-aw a pagsasao, matignayda nga agbiag a mayannurot kadagiti pagalagadan ni Jehova. Masursuroda ti agbalin nga ‘agkaykaysa iti isu met laeng a panunot ken iti isu met laeng a wagas ti panagpampanunot.’ (1 Cor. 1:10) Ti pannursuro ti Dios patanorenna met kadakuada ti umiso a kababalin ken makaay-ayo, napudno a panagsasao, nangnangruna no maipapan iti panangipakaammo iti naimbag a damag kadagiti dadduma. (Tito 2:7, 8; Heb. 13:15) Pakaidayawan ni Jehova dagitoy a nagsayaat a panagbalbaliw.
4 Kas pagarigan, adu dagiti saludsod ti maysa a lalaki a nakangngeg iti naimbag a damag, ket nasungbatan amin dagitoy babaen ti Biblia. Gapu iti nangngegna, inrugina ti nagadal iti Biblia iti mamindua iti kada lawas ken timmabuno kadagiti gimong. Nasdaaw iti nabara a panangabrasada kenkuana idiay Kingdom Hall, yantangay adu kadagiti nakigimong ti naggapu iti nadumaduma a puli. Di nagbayag, binalbaliwanda ken ni baketna ti kabibiagda ket nagpabautisarda. Manipud idin, agarup 40 a tattao ti natulongannan nga agserbi ken ni Jehova, a pakairamanan ti adu a kapamiliana. Iti laksid ti an-annayenna, iti di pay nabayag inrugina ti agserbi kas payunir.
5 Isuroyo Dagiti Dadduma: Gapu kadagiti pasamak iti lubong, adu dagiti napudno a tattao a mangut-utob iti panagpampanunot ken kabibiagda. Kas ken Jesus, kayattayo a tulongan ida. Ti epektibo a panagsarungkar ken panangyadal iti Biblia ti tulbek iti panangtulong kadagiti interesado nga agsursuro iti nasin-aw a pagsasao.
6 Napaneknekan nga epektibo ti panangikondukta iti apagbiit a panagadal iti Biblia iti mismo a ruangan ti pagtaengan dagiti okupado a tattao. (km 5/02 p. 1) Napadasyo kadin dayta? No agsagsaganakayo a sumarungkar, pumilikayo iti maysa a presentasion iti suplemento ti Mayo 2002 a Ti Ministeriotayo iti Pagarian a maitutop iti bumalay. Adu kadagiti presentasion iti dayta a suplemento ti nairanta a mangiturong a direkta iti panagsasarita iti broshur a Kalikaguman wenno iti libro a Pannakaammo. Ensayuenyo ti presentasionyo tapno siaannayas a mairugiyo a pagsaritaan ti maysa kadagiti parapo. Mangpilikayo iti maysa wenno dua a teksto iti parapo a basaen ken pagsaritaanyo, ken mangisaganakayo iti saludsod a mangiturong iti parapo a planoyo a pagsaritaan iti sumaruno nga isasarungkaryo.
7 Tagtagiragsaken ti ili ni Jehova ti adu a bendision kas resulta ti panagsursuroda iti nasin-aw a pagsasao. Sapay koma ta siaanep a tulongantayo dagiti dadduma a makikaykaysa kadatayo nga ‘umawag iti nagan ni Jehova’ ken ‘agserbi kenkuana iti abagan-abaga.’—Sof. 3:9.