‘Iwayaam’

¹ Idi naminsan a kasasaona dagiti adalanna maipapan iti panagasawa, imbaga ni Jesus a ti kinaawan asawa ket maysa a ‘sagut.’ Sa kinunana: “Ti makaiwaya iti dayta iwayaanna koma dayta.” (Mat. 19:10-12) Sumagmamano a tawen kalpasanna, nagsurat ni apostol Pablo maipapan iti pagimbagan ti kinaawan asawa ken pinaregtana dagiti dadduma a tuladenda ti ulidanna iti panagtalinaed nga awanan asawa. (1 Cor. 7:7, 38) Adu ita ti ‘nangiwaya’ iti panagsolsolo ket tagtagiragsakenda dagiti bentaha nga itden dayta. Ania ti dadduma kadagitoy?

² Panagserbi nga “Awan ti Makasinga”: Naamiris ni Pablo a ti kinaawan asawana ti nangted kenkuana iti gundaway nga agserbi ken Jehova nga “awan ti makasinga.” Kasta met ita, ti di naasawaan a kabsat a lalaki mabalinna ti agaplay iti Ministerial Training School, ket ti awan asawana kadawyan a nawaywaya nga agpayunir, agadal iti sabali a pagsasao, umakar iti lugar a dakdakkel ti panagkasapulan, agserbi iti Bethel, wenno maikkan kadagiti naisangsangayan a pribilehio iti serbisio. Mabalin nga ad-adu ti panawen ken gundawayna para iti nauneg a personal a panagadal ken panagmennamenna ken pannakisao ken ni Jehova iti naimpusuan a kararag. Ti di naasawaan a tao kadawyan nga ad-adu ti panawenna a tumulong kadagiti dadduma. Amin dagita nga aktibidad ket ‘maipaay iti kabukbukodanna a pagsayaatan.’​—1 Cor. 7:32-35; Ara. 20:35.

³ Aglaplapusanan a bendision ti itden ti kasta a di masingsinga a panagserbi iti Dios. Kalpasan ti 27 a tawen a kaaddana idiay Kenya, insurat ti maysa a balasang a kabsat: “Nagadu dagiti gagayyemko ken adu ti aramidek! Agtitinnulongkami a mangaramid kadagiti bambanag [ken] agsisinnarungkarkami. . . . Yantangay awan asawak, nawayaak a mapan iti sadinoman tapno kanayon nga okupadoak iti ministerio, ket pagragsakak unay daytoy.” Innayonna: “Immuneg ti relasionko ken Jehova iti panaglabas dagiti tawen.”

⁴ Iwayaam: Kinuna ni Jesus a ti panggep ti di pannakiasawa ket “maigapu iti pagarian ti langlangit.” (Mat. 19:12) Kas iti aniaman a sagut, masapul nga umiso ti pannakausar ti panagsolsolo tapno makaparagsak ken makagunggona dayta. Gapu ta ap-aprobetsarenda dagiti oportunidad nga ipaay ti kinaawan asawa ken agpampannurayda iti sirib ken kired nga aggapu ken Jehova, adu dagiti awanan asawa a makabigbig iti pateg ti panangawat iti dayta a sagut.