Internasional a Panagibangon Kadagiti Kingdom Hall iti Dadduma a Pagilian ti Europa
1 Kadagiti kallabes a dekada, naparitan ti trabaho dagiti Saksi ni Jehova iti sumagmamano a pagilian ti Europa, a pakairamanan ti Makindaya a Europa. Kaaduanna, nakaro unay ti panangiparit. Narigat idi ti aggigimong a sipapanayag, ken gistay imposible ti maaddaan iti Kingdom Hall a paggigimongan. Ngem kadagiti kallabes a tawen, “nagaramid ni Jehova iti naindaklan a banag iti daydiay naaramidanna kadatayo. Nagbalintayo a narag-o.”—Sal. 126:3.
2 Nangrugi idi 1983, saan unayen a nakaro ti pannakairurumen dagiti Saksi ni Jehova. Idi 1989, naipaayan iti legal a pannakabigbig dagiti Saksi ni Jehova idiay Poland ken Hungary. Idi 1991, legal a nairehistro dagiti Saksi ni Jehova idiay Russia. Manipud idin, rimmang-ay ti trabaho idiay Russia ken kadagiti dati a republika ti Union Soviet. Iti nagbaetan ti Marso 1996 ken Oktubre 1998, inaprobaran ti Bagi a Manarawidwid ti 359 a Kingdom Hall loan a kiniddaw dagiti sanga nga opisina a mangimatmaton iti 11 a pagilian ti Europa.
3 Bayat a matmatmatanyo dagiti ladawan iti daytoy a suplemento, panunotenyo dagiti naindaklan ken nakaskasdaaw a banag nga inaramid ni Jehova a maipaay iti ilina. (Sal. 136:4) Maragsakankayo a makaammo a nasayaat ti pannakausar dagiti kontribusion dagiti kakabsat iti sangalubongan, a mangyanninaw iti imbaga ni Jesus, kas nailanad iti Juan 13:35: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”
4 Karaman ti Romania kadagiti pagilian ti Europa a mabembenepisiaran iti urnos a tumulong a mangbangon kadagiti Kingdom Hall kadagiti pagilian a limitado ti kabaelanda. Addan 36 a Kingdom Hall a naibangon sadiay manipud idi Hulio 2000. Babaen ti panangusar iti kadawyan a plano para iti gistay amin a Kingdom Hall-da, 61 ti naibangon idiay Ukraine idi 2001 ken 76 pay idi 2002. Iti tulong dagiti kuarta a naidonar para iti Kingdom Hall Fund, ginasuten a Kingdom Hall ti naibangon idiay Bulgaria, Croatia, Macedonia, Moldova, Russia, ken Yugoslavia.
5 Saan a nalaka ti agibangon kadagiti Kingdom Hall iti dadduma a pagilian, ken adu a trabaho ti kasapulan sakbay a mairugi ti aktual a panagibangon. Masansan nga adu a panawen ti kasapulan. Maysa pay, dakdakkel nga adayo ti magastos iti panagibangon iti Kingdom Hall iti dayta a paset ti Europa ngem iti adu a paset ti Africa wenno Makin-abagatan nga America. Nupay kasta, gapu iti napartak a panagadu dagiti agdaydayaw ken Jehova, ginasut a Kingdom Hall ti kasapulan pay kadagiti pagilian ti Europa a limitado ti kabaelanda!
6 Anian a nagsayaat a makita ti kasta a napartak a panagrang-ay iti panagibangon kadagitoy a Kingdom Hall! Nagsayaat a pammaneknek ti maipapaay kadagiti lugar a nakaibangonan dagitoy, kas ipakita ti adu a kapadasan. Iti dadduma a lugar, raemen dagiti lokal nga autoridad ti kinatulok dagiti kakabsat a mangsurot kadagiti pagannurotan iti panagibangon.
7 Maitutop la unay ti impadto ni Isaias maipapan iti irarang-ay ti pudno a panagdayaw iti daytoy a panawen. Babaen iti dayta a propeta, impakpakauna ti Dios: “Siak, ni Jehova, papardasekto dayta iti bukodna a tiempo.” (Isa. 60:22) Nalawag a ti napalabas a dekada ket panawen ni Jehova para iti irarang-ay idiay Makindaya a Europa. Sapay koma ta itultuloy nga iburay ni Jehova ti nabaknang a pammendisionna iti panagreggettayo a mangpapartak iti panagibangon kadagiti Kingdom Hall iti adu a pagilian bayat nga agtultuloy a suportarantayo ti Kingdom Hall Fund! Agresulta daytoy iti ad-adu pay a Kingdom Hall a mainayon kadagiti pagilian a limitado ti kabaelanda. Makatulong dayta iti idudur-as ti nasin-aw a panagdayaw iti adu a paset ti Europa ken iti dakdakkel a pammaneknek a maipapaay “agingga iti ungto ti daga.”—Ara. 13:47.
[Dagiti Ladawan iti panid 3]
Kingdom Hall Complex Moscow, Russia
[Dagiti Ladawan iti panid 4-6]
Dagiti Baro a Kingdom Hall Idiay Makindaya a Europa
Strumica, Macedonia
Daruvar, Croatia
Bitola, Macedonia
Sokal, Lviv District, Ukraine
Bitola, Macedonia
Mladost, Bulgaria
Plovdiv, Bulgaria
Kurdzhipskoye, Maykop, Russia
Bački Petrovac, Yugoslavia
Tlumach, Ivano-Frankivsk District, Ukraine
Rava-Ruska, Lviv District, Ukraine
Stara Pazova, Yugoslavia
Zenica, Bosnia ken Herzegovina
Sokal Lviv District, Ukraine
Zhydachiv, Lviv District, Ukraine