Ipakaammoyo ti Nagan ti Dios
1. Ania ti mabalin nga epektona kadagiti tattao ti pannakaammoda iti personal a nagan ti Dios?
1 Ania ti reaksionyo idi damo a naammuanyo ti nagan ti Dios? Ti reaksion dagiti adu ket kas iti reaksion ti maysa a babai a nagkuna: “Nakasangitak idi damo a makitak iti Biblia ti nagan ti Dios. Natukay ti riknak a nakaammo a mabalinko nga ammuen ken usaren ti personal a nagan ti Dios.” Para kenkuana, ti panangammo iti nagan ti Dios ket napateg nga addang iti panangam-ammo ken ni Jehova kas maysa a persona ken iti pannakirelasion kenkuana.
2. Apay a masapul nga isurotayo kadagiti sabsabali ti maipapan ken Jehova?
2 Apay nga Ipakaammotayo? Ti panangammo iti nagan ti Dios kaipapananna ti panangammo kadagiti galad, panggep, ken aramidna. Kaipapananna met dayta ti pannakaisalakan. “Tunggal maysa nga umawag iti nagan ni Jehova maisalakanto,” insurat ni apostol Pablo. Ngem ‘kasano ti panangawagdanto kenkuana,’ kinuna ni Pablo, malaksid no ammuen nga umuna dagiti tattao ti maipapan ken ni Jehova ken ipakitada ti pammatida kenkuana? Gapuna, masapul nga ipakaammo dagiti Kristiano kadagiti sabsabali ti nagan ti Dios ken ti amin nga itakderan dayta. (Roma 10:13, 14) Nupay kasta, adda napatpateg pay a rason no apay a masapul a maipakaammo ti nagan ti Dios.
3. Ania ti kangrunaan a makagapu a mangaskasabatayo?
3 Idi dekada 1920, naawatan ti ili ti Dios manipud iti Kasuratan ti sapasap nga isyu maipanggep iti pannakaalangon ti kinasoberano ti Dios ken pannakasantipikar ti naganna. Sakbay a dadaelen ni Jehova dagiti nadangkes tapno maikkat ti umsi a naibuntuon iti naganna, masapul a ‘maipakaammo iti intero a daga’ ti kinapudno maipapan kenkuana. (Isa. 12:4, 5; Ezeq. 38:23) No kasta, ti kangrunaan a makagapu a mangaskasabatayo ket tapno maidaydayaw ni Jehova iti publiko ken masantipikar ti naganna iti imatang ti intero a sangatauan. (Heb. 13:15) Ti panagayat iti Dios ken iti kaarruba tignayennatayo a makiraman a naan-anay iti daytoy a trabaho nga imbilin ti Dios.
4. Kasano a nainaig dagiti Saksi ni Jehova iti nagan ti Dios?
4 “Ili a Maipaay iti Naganna”: Idi 1931, inawattayo ti nagan a Saksi ni Jehova. (Isa. 43:10) Manipud idin, sisasaknap nga ipakpakaammo dagiti adipen ti Dios ti naganna, isut’ gapuna a kuna ti libro a Manangiwaragawag, panid 124: ‘Iti intero a lubong, mailasin a dagus kas maysa kadagiti Saksi ni Jehova ti siasinoman a siwayawaya a mangaramat iti nagan a Jehova.’ Maysaka kadi kadakuada? Ti panagyaman iti kinaimbag ni Jehova rumbeng a tignayennatayo a ‘mangbendito iti naganna,’ agsao iti maipapan kenkuana iti amin a maitutop a gundaway.—Sal. 20:7; 145:1, 2, 7.
5. Kasano a nainaig ti konduktatayo iti panangawit iti nagan ti Dios?
5 Kas “ili a maipaay iti naganna,” masapul nga itandudotayo dagiti pagalagadanna. (Ara. 15:14; 2 Tim. 2:19) Masansan a ti nasayaat a kondukta dagiti Saksi ni Jehova ti umuna a mapaliiw dagiti tattao. (1 Ped. 2:12) Pulos a ditay kayat a matabbaawan ti naganna babaen ti di panangikabilangan kadagiti nadiosan a prinsipio wenno babaen ti panamagbalin a maikadua laeng iti biagtayo ti panagdayawtayo kenkuana. (Lev. 22:31, 32; Mal. 1:6-8, 12-14) Imbes ketdi, ti wagas ti panagbiagtayo ipakitana koma nga ipatpategtayo ti pribilehio a mangawit iti nagan ti Dios.
6. Ania a pribilehio ti matagiragsaktayo ita ken iti agnanayon?
6 Makitkitatay ita a matungtungpalen ti kinuna ni Jehova: “Manipud iti ileleggak ti init agingga a mismo iti ilelennekna naindaklanto ti naganko iti tengnga dagiti nasion.” (Mal. 1:11) Itultuloytayo nga ipakaammo ti kinapudno maipapan ken ni Jehova ken ‘bendituen ti nasantuan a naganna agingga iti tiempo a di nakedngan, iti mismo nga agnanayon.’—Sal. 145:21.