Dagiti Bendision a Masagrap iti Panagpayunir
1, 2. Ania dagiti bendision a nainaig unay iti panagpayunir, ken apay?
1 “Ammok nga awan ti sabali a trabaho a makaited kaniak iti pannakapnek nga itden ti panangiranud iti kinapudno,” kinuna ti maysa a payunir. Kinuna ti maysa pay: “Iti ngudo ti tunggal aldaw, naimas ti turogko, ken napno ti pusok iti rag-o.” Dagitoy a payunir maibilangda kadagiti kakabsat iti sadinoman a mangsagsagrap kadagiti bendision nga iyeg ti panagpayunir.—Prov. 10:22.
2 Pudno a makapnek ti panangtulong kadagiti sabsabali a gumun-od iti makaispal-biag a pannakaammo iti Sao ti Dios. (Ara. 20:35; 1 Tes. 2:19, 20) “Makaparagsak ken makapabileg iti pammati ti pannakakita iti bileg ti Sao ti Dios a manggutugot kadagiti tattao a mangbalbaliw iti kabibiagda,” insurat ti nabayagen a payunir. Wen, babaen ti madadaan a panangtulongda kadagiti tattao ken panangikonduktada kadagiti panagadal iti Biblia, dagiti payunir masagrapda dagiti bendision a kas kadagitoy.
3, 4. Kasano a ti panagpayunir suruanna ti maysa nga agpannuray ken ni Jehova, ken kasano a makatulong daytoy iti maysa a rumang-ay iti naespirituan?
3 Panagpannuray ken ni Jehova: Ti inaldaw a panagpannuray iti espiritu ti Dios bayat ti panangitungpalda iti ministerioda tulonganna dagiti payunir a mangpatanor kadagiti “bunga ti espiritu” ken agserbi a proteksion kadakuada. (Gal. 5:16, 22, 23) Maysa pay, yantangay kanayonda nga usaren ti Sao ti Dios, masansan a nasigo dagiti payunir a mangaramat iti Kasuratan a mangidepensa iti kinapudno ken mangpabileg kadagiti sabsabali. (2 Tim. 2:15) Kinuna ti maysa a kabsat a lalaki a pinullo a tawenen a payunir: “Ti panagpayunir natulongannak a nangpauneg iti pannakaammok iti Biblia, nga us-usarek a tumulong kadagiti adu a tattao a mangammo ken ni Jehova ken kadagiti panggepna.” Anian a makagunggona!
4 Dagiti regular pioneer masapul nga agpannurayda met ken ni Jehova iti adu a dadduma pay a wagas. Mapabileg ti pammatida iti pannakakitada no kasano a bembendisionan ni Jehova ti panangikagumaanda a mangpaadda kadagiti kasapulanda iti biag. Kinuna ti 72 ti tawenna a kabsat a 55 a tawenen nga agserserbi kas regular pioneer: “Pulos a dinak pinaay ni Jehova.” Kanayonanna, babaen ti panangtaginayonda iti simple a panagbiag, masalakniban dagiti payunir iti adu a pakaringgoran iti biag. Makaay-ayo kadi daytoy kadakayo?—Mat. 6:22; Heb. 13:5, 6.
5. Kasano a ti panagpayunir tulonganna ti maysa a suminged ken ni Jehova?
5 Panagbalin a Nasinged iti Dios: Ti relasiontayo ken ni Jehova ket nagpateg a sanikua. (Sal. 63:3) No makiramantayo a naan-anay iti ministerio gapu iti ayattayo ken ni Jehova, suminged dayta a relasion. (Sant. 4:8) Kinuna ti maysa a kabsat a nasurok a 18 a tawenen a payunir: “Ti panagpayunir ikkannatayo iti gundaway a ‘mangnanam ken mangkita a ni Jehova naimbag,’ nga inaldaw a pabilgenna ti relasiontayo iti Namarsua kadatayo.”—Sal. 34:8.
6. Ania ti masapul nga adda kadagiti payunir, ken siasino pay dagiti magunggonaan malaksid kadagiti payunir a mismo?
6 Malaksid nga ipalubos ti kasasaadda, dagiti payunir masapul nga addaanda iti natibker a pammati, pudpudno nga ayat iti Dios ken iti kaarruba, ken situtulokda nga agsakripisio. (Mat. 16:24; 17:20; 22:37-39) Nupay kasta, kas ipakita dagiti nararagsak a rupa dagiti payunir, awan ti makaartap kadagiti bendision nga iyeg ti panagpayunir. (Mal. 3:10) Saan laeng a dagiti payunir ti magunggonaan, no di ket magunggonaan met unay dagiti pamiliada ken ti kongregasion iti nasayaat nga espiritu nga ipakpakita dagiti payunir.—Fil. 4:23.