“Agserbikayo ken Jehova Buyogen ti Panagrag-o”
1. Ania ti mangyeg iti dakkel a rag-o kadagiti adipen ni Jehova?
1 “Kankanayon nga agrag-okayo iti Apo,” insurat ni apostol Pablo. “Maminsan pay a kunaek, Agrag-okayo!” (Fil. 4:4) Mangyeg iti dakkel a rag-o ti pribilehio a mangipakaammo iti naimbag a damag ken tumulong kadagiti marakarnero a tattao nga agdayaw ken ni Jehova. (Luc. 10:17; Ara. 15:3; 1 Tes. 2:19) Nupay kasta, no awan ti rag-otayo no maminsan iti ministeriotayo, ania ti mabalintay nga aramiden?
2. Kasano a mangparayray iti rag-otayo ti pananglaglagip no siasino ti nangdutok kadatayo?
2 Trabaho nga Intuding ti Dios: Laglagipenyo a ni Jehova ti nangdutok kadatayo a mangasaba. Wen, anian a pribilehiotayo ti agbalin a ‘katrabahuan ti Dios’ iti panangiwaragawag iti mensahe ti Pagarian ken panangaramid kadagiti adalan! (1 Cor. 3:9) Adda kadatayo ni Kristo Jesus iti daytoy trabaho a dinto pulos mauliten. (Mat. 28:18-20) Aktibo met a makipaspaset dagiti anghel ken tumultulongda kadatayo iti dakkel a naespirituan a panagani a maar-aramid ita. (Ara. 8:26; Apoc. 14:6) Ti Kasuratan, agraman dagiti kapadasan dagiti adipen ti Dios, nalawag a paneknekanda a tumultulong ni Jehova iti daytoy a trabaho. Gapuna, no mangasabatayo, mapantayo “kas naibaon manipud iti Dios, iti imatang ti Dios, a maikuyog ken Kristo.” (2 Cor. 2:17) Anian a pagrag-oantayo unay daytoy!
3. Ania ti paset ti kararag iti panangtaginayon iti rag-otayo nga agserserbi iti Dios?
3 Nasken ti panagkararag tapno mataginayon ti rag-o iti panagserbi iti Dios. (Gal. 5:22) Yantangay ti Dios ti pagtaudan ti bilegtayo a mangitungpal iti trabahona, nasken a sipapasnek a dumawattayo iti espirituna, nga itedna a sipaparabur kadagidiay agdawat kenkuana. (Luc. 11:13; 2 Cor. 4:1, 7; Efe. 6:18-20) Ti panangikararag iti ministeriotayo tulongannatayo a mangtaginayon iti umiso a panangmatmat no iyaleng-aleng wenno busorendatayo. Dayta ti tumulong kadatayo nga agtultuloy a mangasaba a situtured ken siraragsak.—Ara. 4:29-31; 5:40-42; 13:50-52.
4. Kasano a ti panagsagana a naimbag parayrayenna ti rag-otayo a mangasaba, ket ania dagiti mabalintay nga aramiden kas panagsagana?
4 Agsagana a Naimbag: Rumayray ti rag-otayo iti ministerio no agsaganatayo a naimbag. (1 Ped. 3:15) Saan a kasapulan nga adu unay ti tiempo a mabusbos iti kasta a panagsagana. Sumagmamano la a minuto ti kasapulan iti panangrepaso kadagiti naisingasing a presentasion iti panangitukon kadagiti kabaruan a magasin wenno presentasion a maitutop iti literatura nga itukonyo. Para iti maitutop nga introduksion, mabalinyo a kitaen ti libro a Panakirinnason wenno dagiti napalabas a ruar Ti Ministeriotayo iti Pagarian. Kadagiti dadduma nga agibumbunannag iti Pagarian, makatulong ti panangisurat iti ababa a presentasion iti bassit a papel. Sagpaminsan a taldiapanda dayta tapno malagipda ti ibagada. Tumulong daytoy a mangikkat iti nerbios ken mangpatured kadakuada a mangasaba.
5. Kasano a ti rag-o ket makagunggona kadatayo ken kadagiti sabsabali?
5 Adu ti pagsayaatan nga itden ti rag-o. Ti naragsak a kababalin pagbalinenna nga ad-adda a makaallukoy ti mensahetayo. Ti rag-o pabilgennatayo nga agibtur. (Neh. 8:10; Heb. 12:2) Kangrunaan iti amin, pakaidayawan ni Jehova ti naragsak a panagserbitayo. Gapuna, ‘agserbitayo ken Jehova buyogen ti panagrag-o.’—Sal. 100:2.