“Paneknekanyo a Sisasaganakayo”
1 Iti naisangsangayan a padtona maipapan iti panagpatingga daytoy sistema ti bambanag, namakdaar ni Jesus a ditay koma maigamer kadagiti gagangay a pakaringgoran iti biag. (Mat. 24:36-39; Luc. 21:34, 35) Tangay mabalin a dumteng ti dakkel a rigat iti aniaman a kanito, nasken nga ipangagtayo ti pammagbaga ni Jesus: “Paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.” (Mat. 24:44) Ania ti makatulong kadatayo iti daytoy a banag?
2 Panangparmek Kadagiti Pakaringgoran ken Pakasingaan: Ti maysa kadagiti naespirituan a palab-og a nasken a pagannadantayo ket dagiti “pakaringgoran iti biag.” (Luc. 21:34) Iti sumagmamano a pagilian, narigat a gun-oden dagiti masapsapul iti biag gapu iti kinapanglaw, kinaawan iti panggedan, ken kinangina dagiti gagatangen. Iti dadduma a pagilian, gagangay ti gumun-od kadagiti material a sanikua. No dagiti material a banag laeng ti pampanunotentayo, mabalin a maliwayantayo dagiti banag a mainaig iti Pagarian. (Mat. 6:19-24, 31-33) Dagiti Nakristianuan a gimong tulongannatayo tapno saantayo a makaliway. Ikagkagumaanyo kadi a tabunuan ti amin a gimong?—Heb. 10:24, 25.
3 Napno ti lubong ita kadagiti pakasingaan a nalaka a mangagaw iti napateg a tiempotayo. Agbalin a palab-og ti panagusar iti kompiuter no adu unay ti panawentayo a mangsawar iti Internet, agbasa ken agipatulod iti E-mail, wenno agay-ayam kadagiti computer game. Mabalin nga adu nga oras ti mabusbos iti panagbuya iti telebision, pelikula, pagpalpaliwaan, panagbasa kadagiti sekular a material, ken isport, ket bassit laengen ti tiempo wenno pigsatayo nga agpaay kadagiti naespirituan a banag. Nupay temporario a makapabang-ar ti panaglinglingay ken panagaliwaksay, mangted iti manayon a gunggona ti personal ken sangapamiliaan a panagadal iti Biblia. (1 Tim. 4:7, 8) Inaldaw kadi nga iwaywayaanyo nga utoben ti Sao ti Dios?—Efe. 5:15-17.
4 Anian a yamantayo ta nangyurnos ti organisasion ni Jehova iti programa a pakasursuruantayo kadagiti naespirituan a banag tapno ‘agballigitayo iti pananglisi kadagiti amin a banag a naikeddeng a mapasamak, ken iti panagtakder iti sanguanan ti Anak ti tao’! (Luc. 21:36) Sapay koma ta aprobetsarentayo a naan-anay dagitoy a probision ken ‘paneknekantayo a sisasaganatayo’ tapno ti pammatitayo agbalin koma a “pakaigapuan ti pannakaidayaw ken dayag ken dayaw inton pannakaipanayag ni Jesu-Kristo.”—1 Ped. 1:7.