Tuladenyo ti Kinahustisia ni Jehova
1 “Ni Jehova ket managayat iti kinahustisia.” (Sal. 37:28) Dayta ti gapuna a nupay inkeddengna a dadaelen daytoy nakillo a lubong, ipapaipakdaarna pay nga umuna dayta. (Mar. 13:10) Daytoy ti mangipaay kadagiti tattao iti gundaway nga agbabawi tapno maisalakanda. (2 Ped. 3:9) Ikagkagumaantayo kadi a tuladen ti kinahustisia ni Jehova? Gapu iti nakalkaldaang a kasasaad ken panagsagaba ti sangatauan, iranranudtayo kadi kadagiti sabsabali ti maipapan iti Pagarian a namnama ti sangatauan? (Prov. 3:27) Ti panagayat iti kinahustisia tignayennatayo a mangasaba a sigaganetget.
2 Mangasaba a Di Mangidumduma: ‘Watwatwatentayo ti kinahustisia’ no ipakaammotayo ti panggep ti Dios iti tunggal maysa a ditay mangidumduma. (Mik. 6:8) Masapul a sarangtentayo ti pagannayasan a mangipato kadagiti sabsabali maibatay iti makinruar a langada. (Sant. 2:1-4, 9) ‘Pagayatan ni Jehova a maisalakan koma dagiti amin a kita ti tattao ken dumtengda iti umiso a pannakaammo iti kinapudno.’ (1 Tim. 2:4) Nakaskasdaaw a panagbalbaliw ti maaramidan ti sao ti Dios iti biag dagiti tattao. (Heb. 4:12) Ti panangbigbig iti daytoy mabalin a tignayennatayo a di bumdeng a makisarita kadagiti tattao, uray kadagidiay nalabit nagkedked idi a dumngeg.
3 Iti panangasabana iti tiendaan, medio maamak ti maysa a kabsat a babai iti langa ti maysa a lalaki a masansan nga umay aggatang. Nupay kasta, idi nakasarak iti maitutop a gundaway, pinadasna a kinasabaan ti lalaki maipapan iti Paraiso nga inkari ti Dios. Sigugubsang a kinuna ti lalaki nga isu ket saan a mamati iti sarsarita ken maysa daytoy a hippie ken adikto iti droga. Ngem nagporsegi ti kabsat. Maysa nga aldaw, dinamag kenkuana ti lalaki no ania ti makunana iti atiddog a buokna. Sitataktika nga inlawlawag ti kabsat no ania ti kuna ti Biblia maipapan iti dayta. (1 Cor. 11:14) Iti sumuno nga aldaw, nasdaaw ken naragsakan ti kabsat idi makitana nga awanen ti barbas ti lalaki ken nagpapukisen! Imbagana a kayatna ti agadal iti Biblia, ket siraragsak nga inyadalan ti maysa a kabsat a lalaki. Rimmang-ay agingga a nagdedikar ken nagpabautisar. Kas iti daytoy a lalaki, adu nga agserserbi itan ken ni Jehova ti agyamyaman gapu iti di panangidumduma, ken panagporsegi dagidiay nangidanon kadakuada iti mensahe maipapan iti Pagarian.
4 Din agbayag, punasento ni Jehova ti kinakillo iti rabaw ti daga. (2 Ped. 3:10, 13) Iti ababa a natda a tiempo, sapay koma ta tuladentayo ti kinahustisia ni Jehova babaen ti panangipaay iti amin a tao iti gundaway a makalasat iti um-umay a pannakadadael ti nakillo a lubong ni Satanas.—1 Juan 2:17.