Taginayonem a Simple Dagiti Matam
1. Ania ti kaipapanan ti maaddaan iti simple a mata, ken apay a napateg dayta?
1 Iti Sermonna iti Bantay, imbatad ni Jesus ti dakkel nga epekto ti piguratibo wenno naespirituan a mata iti intero a panagbiagtayo. Kinunana: “No, ngarud, simple ti matam, ti intero a bagim naraniagto; ngem no nadangkes ti matam, ti intero a bagim nasipngetto.” (Mat. 6:22, 23) Ti simple a mata ket sikikita iti maymaysa a panggep—ti panangaramid iti pagayatan ti Dios—a di masinga iti nalabes a pannakaringgor kadagiti material a banag. (Mat. 6:19-21, 24-33) Ania ti makatulong kadatayo a mangtaginayon iti simple a mata?
2. Ania a panangmatmat kadagiti material a banag ti iparparegta ti Sao ti Dios?
2 Panangsukay iti Pannakakontento: Nainkasuratan nga obligasion ti panangipaay iti umdas a kasapulan ti sangakabbalayan. (1 Tim. 5:8) Ngem dina kayat a sawen nga awan patinggana a gun-odentayo dagiti kasayaatan ken kabaruan a banag. (Prov. 27:20; 30:8, 9) Imbes ketdi, idagadag ti Kasuratan a makontentotayo koma iti “pagtaraon ken pagkawestayo,” dagiti kasapulan iti biag. (1 Tim. 6:8; Heb. 13:5, 6) No ipangagtayo dayta a balakad, mataginayontayo ti matatayo a naipamaysa iti umiso a kalat.
3. Ania ti makatulong kadatayo tapno ditay mapadagsenan ti bagitayo?
3 Masiribtayo no ditay padagsenan dagiti bagitayo iti saan a nesesita a panagutang ken kadagiti sanikua wenno kalat nga agkasapulan iti adu a tiempo ken atension. (1 Tim. 6:9, 10) Kasanotayo a maaramidan dayta? No adda pampanunotentayo nga aramiden, sikakararag nga usigen dayta ken sipapasnek a timbengen no makalapped dayta kadagiti naespirituan a kalattayo. Determinadotayo koma a mangipangpangruna iti biagtayo kadagiti naespirituan a banag.—Fil. 1:10; 4:6, 7.
4. Apay nga agsapultayo kadagiti pamay-an a mangpasimple iti panagbiagtayo?
4 Pagbalinem a Simple ti Panagbiagmo: Ti sabali pay a makatulong tapno saannaka a maguyugoy ti materialismo isu ti panangsapulmo kadagiti pamay-an a mangpasimple iti panagbiagmo. Idi naamiris ti maysa a kabsat a makapagbiag ti pamiliana uray awan dagiti kanayonan a material, kinunana: “Ad-adda a mapagserbiak itan dagiti kakabsat iti kongregasion. Kombinsidoak a bendisionan ni Jehova dagiti amin nga adipenna no ipangpangrunada ti pudno a panagdayaw imbes a dagiti personal a pagimbagan.” Mapasimplem kadi ti panagbiagmo tapno matagiragsakmo dagiti dakdakkel a bendision?
5. Apay a kasapulan nga itultuloy nga ikagumaan a pasimplien ti matatayo?
5 Kasapulan ti agtultuloy a panagregget tapno masaranget ti impluensia ni Satanas, ti materialistiko a lubongna, ken ti bukodtayo a kinaimperpekto. Imbes a komporme ti kitaentayo, ti matatayo agtultuloy koma a naipamaysa iti panagaramid iti pagayatan ti Dios ken iti nagpateg a namnamatayo a biag nga agnanayon.—Prov. 4:25; 2 Cor. 4:18.