Espesial a Kampania a Panagiwaras iti Baro a Broshur
1 Adu a tattao ita ti maburburiboran kadagiti kasasaad ti lubong, ngem manmano ti makatarus no apay a mapaspasamak dagiti kasta a bambanag, no ania ti agur-uray iti masanguanan, ken no ania ti nasken nga aramidenda tapno maisalakanda inton dumteng ti panangukom. (Ezeq. 9:4) Tapno matulonganda a mangbigbig iti kaipapanan ti tiempotayo, maaramid ti espesial a kampania a panagiwaras iti baro a broshur nga Agtultuloyka nga Agbantay! iti intero a pagilian manipud Lunes, Marso 21, agingga iti Domingo, Abril 17.
2 Mabalin nga itukon daytoy a broshur no mamalaybalaytayo, agsarungkar, mangasaba iti di pormal, wenno no addatayo iti publiko a lugar. Ngem ti broshur nga Agtultuloyka nga Agbantay! ket saan koma a maited iti uray siasino lattan no di ket kadagidiay laeng mangipakita iti interes iti kuna ti Biblia maipapan iti kaipapanan dagiti pasamak iti lubong. Mabalin nga ikkan laengen iti polieto dagidiay saan nga interesado iti mensahe.
3 Mabalin a maalam ti atension ti maysa a tao no kunaem:
◼ “Adu a tattao ti maseknan kadagiti nadagsen a parikut ken nakaam-amak a pasamak a gagangay ita. [Mangdakamatkayo iti pagarigan a gagangay iti lugaryo.] Ammoyo kadi a naipadto iti Biblia dagita a bambanag? [Palubosanyo a sumungbat. Sa mangbasakayo iti teksto a maitutop iti nadakamatyo a pagarigan kas iti Mateo 24:3, 7, 8; Lucas 21:7, 10, 11; wenno 2 Timoteo 3:1-5.] Ipalgak ti Biblia no ania ti kaipapanan ti tiempotayo ken no ania ti masakbayan ti sangatauan. Kayatyo kadi a maammuan ti ad-adu pay? [Palubosanyo a sumungbat. Itukonyo ti broshur no interesado.] Libre daytoy a broshur. No kayatyo ti mangted iti donasion iti sangalubongan a trabahomi, siraragsakkami a mangawat iti dayta.”
4 Wenno mabalin nga epektibo daytoy a pamay-an:
◼ “Adu ita ti mariribukan gapu kadagiti nakaam-amak a pasamak wenno kadagiti nakas-ang a personal a pasamak. Masdaaw dagiti dadduma no apay a saan a makibiang ti Dios tapno malapdan dagita a bambanag. Ipanamnama kadatayo ti Biblia a dandanin agtignay ti Dios tapno pagpatinggaenna ti panagsagaba ti sangatauan. Imutektekanyo dagiti gunggona nga itden ti Dios iti sangatauan. [Basaenyo ti Salmo 37:10, 11.] Kayatyo kadi a maammuan ti ad-adu pay?” Ingudoyo kas iti nadakamat iti ngato.
5 Ikagumaanyo nga alaen ti nagan ken adres ti tunggal tao nga umawat iti broshur, sa iyurnosyo ti agsubli tapno parayrayenyo ti interesna. Dagiti singasing no kasano nga aramiden daytoy ket agparangto iti Abril 2005 a ruar Ti Ministeriotayo iti Pagarian. No interesado ti maysa a tao iti damo a pannakisaritayo kenkuana, mabalinyo nga irugi a dagus ti panagadal iti Biblia nga usarenyo ti Agtultuloyka nga Agbantay! wenno ti sabali a publikasion, kas iti broshur a Kalikaguman.
6 Magun-odan dagiti kopia ti baro a broshur kalpasan ti Gimong ti Serbisio a nakailawlawagan daytoy nga artikulo. Maisingasing kadagiti agibumbunannag ken payunir a mangalada laeng kadagiti kopia a kabaelanda nga ipaima bayat dagiti umuna nga aldaw ti kampania. Sapay koma ta bendisionan ni Jehova daytoy naisangsangayan nga aktibidad a pakaidayawanna ken pakagunggonaan dagiti napudno ti panagpuspusoda a tattao iti sadinoman.—Sal. 90:17.