Itultuloyyo ti Mangasaba
1 Agbibiagtayo iti napeggad a tiempo. Gagangayen ti panagbibinnusor dagiti umili, dagiti gubat gapu iti puli, kalamidad, ken dadduma pay a nakaap-aprang a pasamak. Dagiti tattao ad-adda a kasapulanda ita ti naimbag a damag. Ngem adu dagiti di maseknan kadagiti naespirituan a banag. Iti dadduma a lugar, mabalin a narigat a madanon dagiti tattao iti pagtaenganda ken ad-adda pay a narigat ti makasarak kadagiti tattao a dumngeg kadatayo wenno mayat nga agadal iti Biblia. Nupay kasta, nasken nga itultuloytayo nga ikasaba ti naimbag a damag maipapan iti naipasdeken a Pagarian ti Dios.—Mat. 24:14.
2 Panagayat Kadagiti Tattao: Ti panangasabatayo itampokna ti ayat ni Jehova kadagiti tattao. “Saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Ped. 3:9; Ezeq. 33:11) Dayta ti gapuna nga inkeddengna a, kas kinuna ni Jesus, masapul a “maikaskasaba nga umuna ti naimbag a damag” kadagiti amin a nasion. (Mar. 13:10) Ti Dios aw-awisenna dagiti tattao nga agkamang kenkuana tapno makalasatda inton dumteng ti pannakaukom ti lubong ni Satanas. (Joel 2:28, 29, 32; Sof. 2:2, 3) Ditay kadi agyaman ta inikkannatayo ni Jehova iti kasta a gundaway?—1 Tim. 1:12, 13.
3 Ipakita ti sangalubongan a report nga iti 2004 a tawen serbisio, agpromedio iti 6,085,387 a panangyadal iti Biblia ti maikonkondukta iti binulan, ken agpromedio iti 5,000 a baro nga adalan ti mababautisaran iti linawas! Nasarakan ti dadduma kadagitoy a kabbaro a dedikado gapu iti panangbendision ni Jehova iti agtultuloy a panangikagumaan dagiti agibumbunannag a makisarita kadagiti tattao iti naituding a teritoriada. Anian a rag-o ti inyeg daytoy kadagiti kongregasion, ken anian a pribilehio ti agbalin a katrabahuan ti Dios iti daytoy trabaho a mangispal iti biag!—1 Cor. 3:5, 6, 9.
4 Panangidaydayaw iti Nagan ti Dios: Itultuloytayo ti mangasaba tapno maidaydayaw ni Jehova iti publiko ken masantipikar ti naganna iti imatang ti intero a sangatauan. (Heb. 13:15) Iyaw-awan ni Satanas “ti intero a mapagnaedan a daga” tapno patien dagiti tattao a di kabaelan ti Dios a risuten dagiti parikut ti sangatauan, di maseknan iti panagsagaba ti tao, wenno tapno patienda nga awan ti Dios. (Apoc. 12:9) Babaen ti panangasabatayo, itantandudotayo ti kinapudno maipapan iti nadayag a nailangitan nga Amatayo. Sapay koma ta itultuloytayo nga idaydayaw ti naganna—ita ken iti agnanayon.—Sal. 145:1, 2.