Sursuruenyo ti Makirinnason Kadagiti Sabsabali
1. Ania a salaysay iti Biblia ti usigentayo, ken apay?
1 Ti palawag ni apostol Pablo iti sinagoga idiay Antioquia ti Pisidia, a nailanad iti Aramid 13:16-41, ket maysa a nasayaat nga ehemplo no kasano ti makirinnason kadagiti sabsabali. Inkabilangan ni Pablo ti nalikudan ken kapanunotan dagiti agdengdengngeg kenkuana ket imbagayna ti wagasna a nangidatag iti naimbag a damag. Bayat nga usigentayo daytoy a salaysay, kitaentayo no kasanotayo a maipakat dayta iti ministeriotayo.
2. Ania ti maadaltayo iti wagas a panangirugi ni Pablo iti palawagna?
2 Mangbirokkayo iti Banag a Pagtunosanyo: Nupay naisentro ti mensahe ni Pablo iti napateg nga akem ni Jesus iti pannakatungpal ti panggep ti Dios, saan nga inrugi ni Pablo ti palawagna babaen ti panangdakamatna iti dayta. Imbes ketdi, dinakamatna ti banag a pagtutunosanda kadagiti kaaduan a Judio nga agdengdengngeg—ti pakasaritaan dagiti Judio. (Ara. 13:16-22) Kasta met, ad-adda nga epektibo ti panangdanontayo iti puso dagiti sabsabali no sumapultayo iti banag a pagtunosantayo. Mabalin a nasken a paregtaentay ida a mangyebkas kadagiti kapanunotanda babaen kadagiti nataktika a saludsod ken agimdengtayo a nasayaat tapno maawatantayo no ania a talaga ti napateg kadakuada.
3. Apay a dagiti agdengdengngeg ken ni Pablo narigatda a patien a ni Jesus ti naikari a Mesias?
3 Iti panangisalaysayna iti pakasaritaan dagiti Judio, impalagip ni Pablo kadagiti agdengdengngeg kenkuana ti kari ti Dios a mangpataud iti Manangisalakan manipud iti kapuonan ni David. Ngem adu a Judio ti mangur-uray iti maysa a bannuar ti militar a mangwayawaya kadakuada iti turay a Romano ken mangitan-ok iti nasion a Judio kadagiti amin a sabsabali a nasion. Awan duadua nga ammoda a ni Jesus ket inlaksid dagiti Judio a panguluen ti relihion idiay Jerusalem, inyawatda kadagiti agtuturay a Romano, ken napapatay. Kasano a makombinsir ida ni Pablo nga Isu daytoy ti naikari a Mesias?
4. Kasano a sisisigo a nakirinnason ni Pablo kadagiti Judio nga agdengdengngeg kenkuana?
4 Ibagayyo ti Pamay-anyo: Gapu ta ammona ti pampanunoten dagiti agdengdengngeg kenkuana, inusar ni Pablo ti Kasuratan a nakirinnason kadakuada a naibatay kadagiti banag a patpatienda. Kas pagarigan, inyam-ammona ni Jesus kas kaputotan ni David ken kas daydiay maysa a tinukoy ni Juan a Mammautisar, a maibilang kas mammadto ti Dios. (Ara. 13:23-25) Impatuldo ni Pablo nga iti panangilaksidda ken ni Jesus ken panangipapatayda kenkuana, dagiti papanguluen ti relihion “tinungpalda ti bambanag nga inyebkas dagiti Mammadto.” (Ara. 13:26-28) Inlawlawagna pay nga adda dagiti nakasaksi iti pannakapagungar ni Jesus, ken inturongna ti atensionda kadagiti teksto ti Kasuratan a pamiliar kadakuada a natungpal iti panagungar ni Jesus.—Ara. 13:29-37.
5. (a) Kasano nga imbagay ni Pablo ti pamay-anna idi nagbitla kadagiti Griego? (b) Kasanotayo a matulad ti ulidan ni Pablo no mangasabatayo iti teritoriatayo?
5 Iti kasumbangirna, idi nagbitla kadagiti Griego idiay Areopago sadi Atenas, nagusar ni Pablo iti sabali a pamay-an. (Ara. 17:22-31) Ngem isu met la a mensahe ti indatagna, ket iti agpada a gundaway, nasayaat ti resulta ti panangikagumaanna. (Ara. 13:42, 43; 17:34) Kasta met ita, ad-adda nga epektibo ti ministeriotayo no ikagumaantayo ti mangbirok iti banag a pakitunosantayo kadagiti agdengdengngeg kadatayo ken no ibagaytayo ti pamay-antayo sigun iti nalikudan ken kapanunotanda.