No Ania ti Maibanag ti Ministeriotayo
1. Kasano ti panangmatmat ni Jehova iti ministeriotayo, ken ania ti reaksion dagiti tattao?
1 Deskribiren ti Sao ti Dios dagiti Kristiano a kas agmarmartsa a sibaballigi iti panagserbida ken ni Jehova, a kasla addada iti parada ti panagballigi. (2 Cor. 2:14-16) Bayat nga iwarwaragawagtayo ti pannakaammo ti Dios, kasla insienso a makaay-ayo ken ni Jehova ti panagserbitayo kenkuana. Maallukoy dagiti dadduma a tattao iti kinabanglo ti naimbag a damag; idinto ta di ikankano dayta dagiti sabsabali. Ngem ti di panangipangag dagiti kaaduan dina kayat a sawen a saan a naballigi ti trabahotayo. Usigentayo no ania ti maibanag ti ministeriotayo.
2. Ti ministeriotayo ipaayannatayo iti gundaway a mangipakita iti ania?
2 Panangitan-ok ken ni Jehova: Ipetpetteng ni Satanas nga agserserbi dagiti tattao ken ni Jehova gapu iti personal nga interes. (Job 1:9-11) Ti Nakristianuan a ministerio ipaayannatayo iti gundaway a mangipakita a pudpudno ti debosiontayo iti Dios. Iti laksid dagiti narikut a personal a kasasaad wenno ti kinaaleng-aleng dagiti tattao, adu nga agibumbunannag ti agtultuloy a mangtungtungpal iti bilin a mangasaba ken mangaramid kadagiti adalan. Ti kasta a kinasungdo paragsakenna ti puso ni Jehova!—Prov. 27:11.
3. Apay a nasken nga itultuloytayo nga ipakaammo ti nagan ken panggep ti Dios?
3 Maysa pay, adda paset ti ministeriotayo iti pannakatungpal ti panggep ti Dios. Mainaig iti um-umay a pannakadadael ti lubong ni Satanas, kuna ni Jehova: “Kasapulanto a maammuan dagiti nasion a siak ni Jehova.” (Ezeq. 39:7) Tapno maammuan dayta dagiti nasion, nasken nga itultuloy dagiti adipen ti Dios nga iwaragawag ti nagan ken panggepna “iti tunggal nasion ken tribu ken pagsasao ken ili.”—Apoc. 14:6, 7.
4. Kasano nga agserbi kas pangibatayan iti panangukom ti trabaho a panangasaba?
4 Pangibatayan iti Panangukom: Agserbi met kas pangibatayan iti panangukom ti panangasaba iti naimbag a damag. Kinuna ni apostol Pablo a balsento ni Kristo Jesus ‘dagidiay saan a makaammo iti Dios ken dagidiay saan nga agtulnog iti naimbag a damag maipapan ken Apotayo a Jesus.’ (2 Tes. 1:8, 9) Maukomto dagiti tattao depende iti panangipangagda wenno iti saanda a panangikankano iti naimbag a damag. Pudno a nadagsen a responsabilidad ti naipabaklay kadagiti adipen ti Dios! Tapno ditay makabasol iti dara, nasken a saantayo a bumdeng a mangipakaammo iti makaispal-biag a mensahe ti Pagarian.—Ara. 20:26, 27.
5. Kasano a naiparangarang ti asi ti Dios iti ministeriotayo?
5 Ti agtultuloy a panangikagumaantayo a mangtulong kadagiti kaarrubatayo a gumun-od iti anamong ti Dios ket ebkas ti asi ni Jehova. (1 Tim. 2:3, 4) Gapu ta ammotayo a kanayon nga agbaliwbaliw ti kasasaad ti biag dagiti tattao, maulit-ulit a mapantayo kadakuada tapno idagadag a birokenda ni Jehova bayat nga adda pay tiempo. No aramidentayo dayta, maiparangarangtayo ti “nadungngo a panangngaasi ti Diostayo,” a “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.”—Luc. 1:78; 2 Ped. 3:9.
6. Kasano nga agpaay a pagimbagantayo ti panagtalinaedtayo a naagawa iti panagserbi ken ni Jehova?
6 Pagimbagantayo: Maysa a proteksion kadatayo ti panagtalinaed a naagawa iti panagserbi ken ni Jehova. Tulongannatayo dayta nga agtalinaed a ‘silalagip iti kaadda ti aldaw ni Jehova’ ken salaknibannatayo tapno saannatayo a matulawan ti agdama a dakes a sistema ti bambanag. (2 Ped. 3:11-14; Tit. 2:11, 12) Ngarud, agbalintayo koma a ‘natibker, di magaraw, a kankanayon nga aduantayo ti aramiden iti trabaho ti Apo,’ nga ammotayo a saan nga ubbaw ti panagbannogtayo iti Nakristianuan a ministerio.—1 Cor. 15:58.