Edukasion a Mangiturong iti Biag
1 Anian a makagunggona ti pannakakita kadagiti naragsak a matmata dagiti tattao no maawatanda ti kinapudno manipud iti Sao ti Dios! Pudno a makapnek ti panangiranud kadagiti sabsabali ti pannakaammo maipapan iti Dios ken iti panggepna iti sangatauan. Ti kasta nga edukasion iturongna ti maysa a tao iti agnanayon a biag.—Juan 17:3.
2 No Apay a Nasaysayaat: Maituktukon ita ti edukasion iti nganngani amin a posible a pamay-an ken iti tunggal topiko a mabalin a panunoten. (Ecl. 12:12) Ngem saan a maipadpad ti kasta a pannakaammo iti pateg ti “natan-ok a bambanag ti Dios.” (Ara. 2:11) Ti kadi edukasion nga ituktukon ti lubong ad-adda nga iyadanina ti sangatauan iti Namarsua ken iti panangammo iti panggepna? Tulonganna kadi dagiti tattao a mangtarus no ania ti mapasamak no mataytayo wenno no apay a nagadu ti agsagsagaba? Ipaayanna kadi dagiti tattao iti namnama? Makatulong kadi a mangpasayaat iti urnos ti pamilia? Saan. Masarakantayo laeng dagiti pudpudno a sungbat kadagiti kangrunaan a saludsod iti biag babaen ti edukasion nga ipapaay ti Dios.
3 Ti edukasion nga ipapaay ti Dios ituktukonna ti banag nga agkurkurang iti lubong ita—ti panangparang-ay iti moral a kababalin. Naan-anay a paruten ti Sao ti Dios ti panangidumduma iti puli, panangitandudo iti tribo, ken nasionalismo iti puso dagidiay umawat ken mangyaplikar kadagiti pannursurona. (Heb. 4:12) Tignayenna dagiti tattao a mangiwaksi iti amin a kita ti kinaranggas ken ‘mangikawes iti bagbagida iti baro a personalidad.’ (Col. 3:9-11; Mik. 4:1-3) Maysa pay, ti edukasion nga ipapaay ti Dios pinabilegna ti riniwriw a mangparut kadagiti nauneg ti pannakairamutna nga ar-aramid ken kababalin a di makaay-ayo iti Dios.—1 Cor. 6:9-11.
4 No Apay a Naganat Ita: Ipagpaganetget ti Naindaklan nga Instruktortayo ti panagbalintayo a nasiput iti kaipapanan dagiti panawen a pagbibiagantayo. Naglaon dagiti naimpadtuan a panangukomna iti kabaruan nga impormasion a masapul nga iwaragawag iti intero a daga. (Apoc. 14:6, 7) Agturturayen ni Kristo idiay langit, dandanin marebbek ti sangalubongan nga imperio ti palso a relihion, ken nakasaganan ti Pagarian ti Dios a mangdadael kadagiti amin a gobierno ditoy daga. (Dan. 2:44; Apoc. 11:15; 17:16) Gapuna, naganat para kadagiti tattao a bigbigenda ti agturturayen nga Ari a dinutokan ti Dios, rummuarda iti Babilonia a Dakkel, ken umawagda iti nagan ni Jehova buyogen ti pammati. (Sal. 2:11, 12; Roma 10:13; Apoc. 18:4) Sapay koma ta aramidentayo ti amin a kabaelantayo a mangiranud kadagiti sabsabali iti edukasion a mangiturong iti biag.