Usarentayo a Nainsiriban Dagiti Naibatay iti Biblia a Literaturatayo
1, 2. Ania ti makuna ti adu a tattao maipapan iti literaturatayo, ken ania a saludsod ti patauden daytoy?
1 “Sipud pay idi 1965 agbasbasaakon kadagiti publikasionyo. Agkonsultaak iti Biblia no agbasaak, ket maitunos iti Biblia dagiti amin nga adda iti literaturayo. Kanayon a sapsapulek ti kinapudno maipapan iti Dios ken ni Jesus, ket maikunak a masarsarakakon dagiti pudno a sungbat babaen kadagiti pagbasaanyo ken ti Biblia.” Kasta ti insurat ti maysa a lalaki iti hedkuarter dagiti Saksi ni Jehova. Iti dayta met la a surat, nagkiddaw iti panagadal iti Biblia.
2 Kas iti dayta a managyaman a lalaki, riniwriw a tattao iti intero a lubong ti mangap-apresiar kadagiti katulongan iti panagadal iti Biblia nga ipapaay “ti matalek ken masirib nga adipen.” (Mat. 24:45) Tinawen a nakaad-adu a literatura ti mapatpataud kas pangtulong kadagiti napudno ti panagpuspusoda a tattao tapno “dumtengda iti umiso a pannakaammo iti kinapudno.” (1 Tim. 2:4) Kasano a mausartayo a nainsiriban dagiti naibatay iti Biblia a literaturatayo?
3. Ania ti mabalintayo nga aramiden tapno saan a masayang dagiti literaturatayo?
3 Saanyo a Sayangen: Iti panaglabas ti tiempo, mabalin nga ad-adu a literatura ti maurnongtayo ngem iti talaga a masapultayo. Ania ti maaramidantayo tapno saan a masayang dagiti napateg a publikasiontayo? Nasken ti kinasaririt no mangalatayo iti literatura nga usarentayo iti ministerio. Imbes a mangalatayo iti adu a kopia ti publikasion nga itukontayo, mabalin a mangalatayo laeng iti maysa wenno dua a kopia satayto mangala manen no naipaimatayon dagitoy. Makatulong daytoy tapno saantayo a maurnongan iti adu a suplay ti literatura iti pagtaengantayo. Umasping iti dayta, no adu a magasin ti ditay maipapaima, nasaysayaat no kissayantayo ti pediduentayo.
4. Ania ti mabalin nga aramiden no sobra ti suplay a literatura iti kongregasion?
4 Sobra a Suplay ti Literatura: No sobra ti suplay a literatura iti kongregasion, ti mangay-aywan iti literatura mabalinna ti makiuman kadagiti kabangibang a kongregasion tapno maammuanna no kasapulanda ti kanayonan a literatura. Mabalin nga itukon dagiti agibumbunannag dagiti nabayagen a publikasion kadagiti di manamati a miembro ti pamilia, iyad-adalan iti Biblia, ken kadagiti sabsabali. Dagidiay kabbaro a naitimpuyog iti kongregasion mabalin a kayatda ti maaddaan kadagiti daanen a publikasion para iti personal a teokratiko a librariada.
5. Kasanotayo a maiparangarang ti apresasiontayo kadagiti literaturatayo?
5 Kayattayo nga usaren dagiti literaturatayo iti talaga a nakaisangratanna—ti panangtulong kadagiti napasnek a tattao a makaammo iti ad-adu pay maipapan kadagiti nakaskasdaaw a panggep ni Jehova. Kas ken ni Jesus a saanna a sinayang dagiti natedda a taraon kalpasan ti namilagruan a panangpakanna kadagiti bunggoy, ikagumaantayo koma nga usaren iti kasayaatan a pamay-an dagiti napateg a naibatay iti Biblia a literaturatayo. (Juan 6:11-13) Ti makaispal-biag a mensahe a linaon dagiti publikasiontayo ket saanna a matukay ti puso dagiti tattao nga agannayas iti kinalinteg no agtalinaed dagita kadagiti estantetayo wenno kadagiti bagtayo. Gapuna, nasken a nainkalintegantayo no mangalatayo kadagiti literatura nga aramatentayo iti ministerio ken usarentayo a nainsiriban dagita tapno magunggonaan dagiti sabsabali.—Fil. 4:5.